استانادا 1995 جىلعى 7 ساۋىردە تاجىك-اۋعان شەكاراسىندا جاۋىنگەرلىك بورىشىن وتەۋ كەزىندە قازا تاپقان قازاقستان رەسپۋبليكاسى ىشكى اسكەرىنىڭ جاۋىنگەرلەرىن ەسكە الۋعا ارنالعان شارا بولدى, دەپ حابارلادى سەناتتىڭ ءباسپاسوز قىزمەتى.
وعان ەلىمىزدىڭ ىشكى ىستەر مينيسترلىگى مەن ۇلتتىق ۇلاننىڭ باسشىلارى, پارلامەنت دەپۋتاتتارى, قوعام قايراتكەرلەرى, شەتەلدەردىڭ اسكەري اتتاشەلەرى, اسكەري جانە جەرگىلىكتى سوعىس ارداگەرلەرى مەن كادەتتەر قاتىستى.
شارادا ءسوز العان سەنات توراعاسىنىڭ ورىنباسارى سەرگەي گروموۆ: «دوستاستىقتىڭ وڭتۇستىك شەپتەرىن قورعاپ, قازا تاپقان قازاقستاندىق اسكەرلەر بىزگە ەرجۇرەكتىك پەن اسكەري انتقا ادالدىقتىڭ ونەگەسى بولدى», – دەدى.
«تمد-نىڭ ۇجىمدىق ءبىتىم-
گەرشىلىك كۇشتەرىنىڭ قۇرامىندا قازاقستاننىڭ تاجىكستاندا بولۋى ورتالىق ازيا ايماعىن تۇراقتاندىرۋدا ماڭىزدى ماسەلە بولدى, – دەدى ءارى قاراي سەنات توراعاسىنىڭ ورىنباسارى. – قازاقستاننىڭ اسكەري بولىمشەلەرى قارۋلى قاقتىعىستاردىڭ ورشۋىنە ءارى سوعىس قيمىلدارىنىڭ كورشى ەلدەرگە تارالماۋىنا جول بەرمەستەن, العا قويىلعان جاۋىنگەرلىك مىندەتتەرىن تابىستى ورىنداپ شىقتى».
س.گروموۆ تاريحتىڭ قايعىلى ساباقتارىن ۇمىتپاۋعا جانە قازىرگى زامانداعى قاتەرلەرگە قارسى تۇرۋعا ءازىر بولۋعا شاقىردى. ارميا مەن الەۋەتتى قۇرىلىمدار قازىرگى كەزدەگى اسكەري جانە تەرروريستىك قاۋىپتەردىڭ الدىن الۋ مەن بولدىرماۋدا ماڭىزدى ءرول اتقارۋى ءتيىس.
شاراعا قاتىسۋشىلار تاعزىم اللەياسىنداعى ەسكەرتكىشكە گۇل شوقتارىن قويدى. قازا تاپقان اسكەرلەردىڭ قۇرمەتىنە ۇلتتىق ۇلاننىڭ استانالىق گارنيزونىنىڭ قۇرامى سالتاناتتى تۇردە ساپپەن ءوتتى.