اقمولا وبلىسىنا جۇمىس ساپارىمەن كەلگەن پرەمەر-ءمينيستردىڭ ورىنباسارى داريعا نازارباەۆا وڭىردەگى بىرقاتار الەۋمەتتىك نىسانداردىڭ جۇمىسىمەن تانىستى.
ۆيتسە-پرەمەر داريعا نۇرسۇلتانقىزى الدىمەن اقكول قالاسىندا بولىپ, وسىندا جاڭادان سالىنعان 250 ورىندىق ەمحانانىڭ اشىلۋ سالتاناتىنا قاتىستى. وسىندا دارىگەرلەر ۇجىمىمەن كەزدەسىپ, ەلىمىزدە مەديتسينا سالاسىن دامىتۋ باعىتىندا قولعا الىنعان جۇمىستار تۋرالى ايتىپ بەردى. سونداي-اق, №1 اقكول بالالار ۇيىندەگى جەتىم جانە اتا-اناسىنىڭ قامقورلىعىنسىز قالعان بالالارمەن دە كەزدەستى. مەكەمە ديرەكتورى راۋزا قاناتوۆا ۆيتسە-پرەمەرگە مەملەكەت تاراپىنان كورسەتىلىپ جاتقان قامقورلىعى ءۇشىن العىسىن ءبىلدىرىپ, قازىرگى جاعداي جايىندا بايانداپ بەردى. بالالار ءۇيى 1969 جىلى قۇرىلعان بولاتىن. مۇندا بىلتىرعى جازدا كۇردەلى جوندەۋ جۇمىستارى باستالدى. عيماراتتى جاڭعىرتۋعا 279 ميلليون تەڭگە قارجى قاراستىرىلعان. وسىنىڭ ارقاسىندا مەكەمەدە وقۋ-تاربيە ءىسىنىڭ ساپاسى اناعۇرلىم ارتىپ وتىر. كەزدەسۋدە تاربيەلەنۋشىلەر ۆيتسە-پرەمەرگە وزدەرىنىڭ شىعارماشىلىق جۇمىستارىن ۇسىنىپ, ونەرلەرىن كورسەتتى. سونىمەن قاتار, داريعا نازارباەۆا ەڭبەكشىلدەر اۋدانىنىڭ قوعام اۋىلىنداعى شايمەردەن قوسشىعۇلوۆ اتىنداعى ورتا مەكتەپتىڭ, بۋراباي اۋدانىنداعى كوپسالالى اۋدانارالىق اۋرۋحانانىڭ جانە «مەرەي» بالاباقشاسىنىڭ جۇمىسىمەن تانىستى. اتالعان بالاباقشادا مەكتەپكە دەيىنگى ءبىلىم بەرۋ جۇيەسىن دامىتۋ جونىندە دوڭگەلەك ۇستەل وتكىزىلدى. وبلىستىڭ ءار وڭىرىنەن كەلگەن پەداگوگتاردىڭ باسىن قوسقان جيىندا مەكتەپكە دەيىنگى ءبىلىم بەرۋ ماسەلەلەرى تالقىلاندى. داريعا نازارباەۆا بولاشاق ۇرپاقتى تاربيەلەۋ قوعامنىڭ ورتاق ءارى ابىرويلى بورىشى ەكەندىگىن اتاپ كورسەتتى. بۇل ورايدا, گاۋحار حامزينا جەتەكشىلىك ەتەتىن جەكەمەنشىكتىك «مەرەي» بالالار باقشاسى كەشەنى قىزمەت ءورىسىن كەڭىتىپ وتىرعانى جاقسى قىرىنان اتالىپ, مەملەكەت-جەكەمەنشىك ارىپتەستىگىن قولداۋدىڭ تۇپكى قايتارىمىنا ماڭىز ارتىلدى. پرەمەر-ءمينيستردىڭ ورىنباسارى كوكشەتاۋ قالاسىنداعى «بۋراباي» سپورت سارايىندا, جەكەمەنشىك «اۆيتسەننا» مەديتسينا ورتالىعىنداعى جۇمىستارمەن تانىسۋ بارىسىندا الەۋمەتتىك سالاداعى باسەكەلەستىك ورتانى دامىتۋدىڭ تيىمدىلىگىن اتاپ كورسەتتى. داريعا نازارباەۆانىڭ ايتۋىنشا, قازاقستاندىقتار ۇلت جوسپارىن جۇزەگە اسىرۋدان تۋىندايتىن مۇمكىنشىلىكتەردى ءبىلۋى جانە ونى پايدالانا ءبىلۋى قاجەت. مۇنىڭ العاشقى قادامدارى جاسالىپ جاتىر. ۇلت جوسپارىنىڭ تابىستى جۇزەگە اسىرى- لۋى قازاقستانعا دامۋدىڭ جاڭا دەڭگەيىنە كوتەرىلۋگە, ەكونوميكالىق ءوسىم ءۇشىن لايىقتى جاعداي جاساۋعا جانە بارشا قازاقستاندىقتاردىڭ ءومىرىن جاقسارتۋعا مۇمكىندىك بەرەدى. ۇكىمەت باسشىسىنىڭ ورىنباسارى «دوستىق» ۇيىندە ەتنومادەني ورتالىقتار مەن بىرلەستىكتەر وكىلدەرىنىڭ قاتىسۋىمەن دوڭگەلەك ۇستەل ءماجىلىسىن وتكىزدى. قازاقستان پرەزيدەنتى ن.نازارباەۆ سالتاناتتى جاعدايدا اشقان عيماراتتىڭ ءون-بويى دوستىق پەن تاتۋلىق اۋانىمەن تەربەلىپ تۇرعانداي اسەر قالدىرادى. وسىدان بولسا كەرەك, اڭگىمە جەلىسى دە ەركىن ارقاۋ تارتتى. قازاقستان حالقى اقمولا اسسامبلەياسى توراعاسىنىڭ ورىنباسارى, چۋۆاش ەتنومادەني ورتالىعىنىڭ ءتورايىمى ەلەنا ماششينسكايا, اقمولا وبلىستىق ارداگەرلەر كەڭەسىنىڭ توراعاسى عوسمان تولەعۇل, وبلىستىق پولياك قاۋىمداستىعىنىڭ توراعاسى الەكساندر سۋحوۆەتسكي, شاحمەت قۇسايىنوۆ اتىنداعى قازاق دراما تەاترىنىڭ اكتەرى جاراس قالداروۆ وبلىس اۋماعىندا تۇراتىن جۇزدەن استام ۇلت پەن ۇلىس وكىلىنىڭ تاتۋ-ءتاتتى تىرشىلىگىنەن تاراتىپ ءتالىمدى اڭگىمە ءوربىتتى. پرەمەر-ءمينيستردىڭ ورىنباسارى د.نازارباەۆا مەملەكەت باسشىسىنىڭ «ماڭگىلىك ەل» جالپىۇلتتىق پاتريوتتىق يدەياسىنىڭ قۇندىلىقتارى نەگىزىندە قازاقستاندىق بىرتەكتىلىك پەن بىرلىكتى نىعايتۋ جانە دامىتۋ تۇجىرىمداماسىن ىسكە اسىرۋدا جەتەكشى ءرول قازاقستان حالقى اسسامبلەياسىنا بەرىلەتىندىگىن اتاپ كورسەتتى. وسىعان بايلانىستى قازاقستان حالقى اسسامبلەياسى بىرقاتار قاعيداتتى مىندەتتەردى شەشۋدى جۇزەگە اسىرۋدا. ايقىن ماقساتى, جاسامپاز جاراستىعى بار ەلىمىز بيىك بەلەستەردەن كورىنە بەرەتىنى ايقىن. ويتكەنى, ەل بىرلىگى بارلىق ىزگى نيەتتەرىمىزدىڭ تىرەگى بولىپ تابىلادى. ۇكىمەت باسشىسىنىڭ ورىنباسارى بۇدان كەيىن №2 ورتا مەكتەپتە, ماعجان جۇماباەۆ اتىنداعى وبلىستىق امبەباپ كىتاپحانادا, شوقان ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىندە بولدى. بولاشاق – ءبىلىمدى ۇرپاقتىڭ قولىندا. داريعا نازارباەۆانىڭ اتالعان ۋنيۆەرسيتەتتىڭ وقىتۋشى-پروفەسسورلىق قۇرامى مەن ستۋدەنتتەرمەن كەزدەسۋى وسى تاقىرىپتى تەرەڭدەتۋگە ارنالدى. ۇكىمەت تاراپىنان جاسالىپ جاتقان جاڭا قادامداردىڭ مازمۇنى اشىپ كورسەتىلدى. بۇگىنگى كۇنى ءبىلىم جانە عىلىم سالاسىندا فۋنكتسيالىق ساۋاتتىلىق كورپۋسى قالىپتاسۋدا. ونى بايىپتىلىقپەن جەتىلدىرە ءتۇسۋ قاجەت. وسى ماقساتتا 2016-2019 جىلدارعا ارنالعان قازاقستان رەسپۋبليكاسىنىڭ مەملەكەتتىك ءبىلىم جانە عىلىمدى دامىتۋ باعدارلاماسى قابىلداندى, دەدى ول ءوز سوزىندە. ۆيتسە-پرەمەر داريعا نازارباەۆانىڭ جۇمىس ساپارى بارىسىندا وبلىس اكىمى سەرگەي كۋلاگين بىرگە بولدى.
باقبەرگەن امالبەك,
«ەگەمەن قازاقستان».
اقمولا وبلىسى.