كەشە ورتالىق كوممۋنيكاتسيالار قىزمەتىندە «100 ناقتى قادام» ۇلت جوسپارىنىڭ 10-قادامى – «مەملەكەتتىك قىزمەتكەرلەردى مانساپتىق جوعارىلاتۋ ءۇشىن كونكۋرستىق نەگىزگە كوشۋدى» جۇزەگە اسىرۋعا باعىتتالعان ءىس-شارالار جونىندە بريفينگ وتكىزىلدى. وندا مەملەكەتتىك قىزمەت ىستەرى مينيسترلىگى مەملەكەتتىك قىزمەت دەپارتامەنتىنىڭ ديرەكتورى ءالي كومەكباەۆ اتالعان سالا بويىنشا جۇرگىزىلگەن جۇمىستار جونىندە جانە قولعا الىنعان تىڭ باستامالار جايىندا ايتىپ بەردى.
ءا.كومەكباەۆتىڭ سوزىنە قاراعاندا, بۇگىندە مينيسترلىك مەملەكەتتىك قىزمەتتى جەتىلدىرۋ ءۇشىن اۋقىمدى جۇمىستار جۇرگىزۋدە. جاڭادان قابىلدانعان «قازاقستان رەسپۋبليكاسىنىڭ مەملەكەتتىك قىزمەتى تۋرالى» زاڭنىڭ ءناتيجەسىندە مەملەكەتتىك قىزمەتتىڭ مانساپتىق مودەلىن جۇزەگە اسىرۋ باستاۋ العان. «بۇل جۇمىستار مەريتوكراتيا قاعيداتى, اشىقتىق, ادەپتىلىك, سىبايلاس جەمقورلىققا ءمۇلدەم توزبەۋشىلىك نەگىزىندە ءجانە كومپەتەنتسيالىق تاسىلدەر ارقىلى مەملەكەتتىك اپپاراتتى كاسىبيلەندىرۋدىڭ وڭتايلى وزىق ءولشەمدەرىنە ايتارلىقتاي جاقىنداتا ءتۇستى», – دەيدى دەپارتامەنت ديرەكتورى.
سونىمەن قاتار, شارا بارىسىندا 2016 جىلدان باستاپ مەملەكەتتىك قىزمەتكە ۇمىتكەرلەردى ىرىكتەۋ ۇدەرىسىنە كومپەتەنتسيالىق ءتاسىلدى ەنگىزۋ ماقساتىندا ولاردىڭ جەكە قاسيەتتەرىن اۆتوماتتاندىرىلعان تۇردە باعالاۋ ءادىسى قولعا الىنعانى بەلگىلى بولدى. وسىعان قاتىستى ءا.كومەكباەۆ: «مۇنداي قادام مەملەكەتتىك قىزمەتتىڭ نەگىزگى قۇندىلىقتارىنا دەگەن شىنايىلىقتى انىقتايدى. ودان بولەك, اتالعان باعدارلاما باستاماشىلىق, كوممۋنيكاتيۆتىلىك, ساراپتامالىق, ادەپتىلىك, ستراتەگيالىق ويلاۋ سىندى قاسيەتتەر دەڭگەيىن انىقتاۋعا سەپتىگىن تيگىزەدى. ال ءۇمىتكەرلەردىڭ بازالىق دەڭگەيىن باعالاۋ ءۇشىن ءۇش ساتىلى ىرىكتەۋ جۇيەسى ەنگىزىلدى», – دەدى.
مينيسترلىك وكىلىنىڭ ايتۋىنشا, مەملەكەتتىك قىزمەتكە العاش كەلگەندەر 3 ايلىق سىناق مەرزىمىنەن وتەدى. قازىرگى تاڭدا ولار ءۇشىن ءتالىمگەرلىك ينستيتۋتىنىڭ ءرولى كۇشەيتىلۋدە. بۇل ءتاسىل سىناق مەرزىمىنىڭ ءساتتى وتۋىنە وڭ اسەرىن تيگىزبەك. سونداي-اق, دەپارتامەنت باسشىسى مەملەكەتتىك قىزمەتشىلەردى ىنتالاندىرۋ ماقساتىندا جۇمىسىنىڭ ناتيجەلىلىگىنە قاراي باعالاۋ مەن سىياقى بەرۋ جۇيەسى زاڭنامالىق دەڭگەيدە جۇرگىزىلىپ, سوعان ساي تولەماقى جاساۋ شارالارى قابىلدانىپ جاتقانىن نازارعا الدى.
مەملەكەتتىك قىزمەتشىلەردىڭ مانساپتىق ءوسۋ مودەلى ءجونىندە ءالي امانتاي ۇلى: «بۇدان ءارى مەملەكەتتىك قىزمەت ءوز ماماندارىن وزدەرى قالىپتاستىرادى. مەملەكەتتىك قىزمەتشىنىڭ مانساپتىق جوسپارلاۋى بىلىكتىلىگى مەن جيناعان تاجىريبەسىنە بايلانىستى بولماق. بۇگىندە «ب» كورپۋسىنىڭ جوعارى لاۋازىمدارىنا ورنالاسۋ تەك تومەنگى لاۋازىمداعى مەملەكەتتىك قىزمەتشىلەر قاتارىنان كونكۋرستىق نەگىزدە جۇزەگە اسىرىلۋدا. وسى ماقساتتا مەريتوكراتيا قاعيداتىن بەكىتۋ ۇدەرىسى جالعاسىپ جاتىر. مانساپتىق مودەل بويىنشا جالپى كونكۋرس – تومەنگى لاۋازىمدار, ال ىشكى كونكۋرس جوعارى لاۋازىمدار ارقىلى جۇرگىزىلەدى. سوندىقتان جوعارى لاۋازىمدارعا تاعايىندالۋ ءۇشىن مىندەتتى تۇردە تومەنگى لاۋازىمداردا تاجىريبەنىڭ بولۋى تالاپ ەتىلەدى», – دەدى.
بۇدان بولەك, بريفينگتە مانساپتىق مودەل مەن كەڭ اۋقىمدى كونكۋرستىق ىرىكتەۋ ناتيجەسىندە جانە اۋىسۋ تارتىبىمەن تاعايىندالۋ ينستيتۋتىن جويۋ ارقىلى مەملەكەتتىك قىزمەتتەگى كوماندالىق اۋىس-ءتۇيىس جولدارىنا بارىنشا توسقاۋىل قويىلعانى ايتىلدى. سونداي-اق, جاڭا جىلدان باستاپ بۇرىن تەستىلەۋدەن وتكەن قىزمەتشىلەر ىشكى لاۋازىمدار ءۇشىن ۇيىمداستىرىلعان كونكۋرستارعا قاتىسسا, قايتادان اتالعان سىناقتى تاپسىرمايتىنىن اتاپ وتكەن ءجون. ياعني, تەستىلەۋ سىناعى تەك تومەنگى لاۋازىمدارعا كەلگەن جاڭا مەملەكەتتىك قىزمەتشىلەر ءۇشىن ۇيىمداستىرىلادى.
ەلامان قوڭىر,
«ەگەمەن قازاقستان».