استانا. 5 ءساۋىر. بۇگىن قازاقستان رەسپۋبليكاسى ۇلتتىق مۋزەيىندە «وتكەن كۇنگى بەينەلەردىڭ بۇگىنگى كورىنىسى» كورمەسىنىڭ تۇساۋكەسەرى ءوتتى. بۇل تۋرالى egemen.kz ءتىلشىسى حابارلادى.
كورمەدە قالپىنا كەلتىرىلگەن جادىگەرلەردى العاشقى بولىپ تاماشالاعانداردىڭ اراسىندا «قايسار» سپورت كلۋبىنىڭ اربالى سپورتشىلارى, ەلىمىزدىڭ پاراليمپيالىق قۇراماسىنىڭ مۇشەلەرى دە بولدى. بۇل شارا «نۇر وتان» پارتياسى – «بىرلىك» استانا قالالىق فيليالىنىڭ «مادەنيەت» باستاۋىش پارتيا ۇيىمىنىڭ قولداۋىمەن ۇيىمداستىرىلدى.
كونە ەسكەرتكىشتەر مەن ەسپوناتتاردان العان اسەر تۋرالى اربامەن بيلەۋ جانە ۇستەل تەننيسى كوماندالارىنىڭ مۇشەسى ءابۋوۆ قۇرمانالى ءبولىستى.
«مەن ۇلتتىق مۋزەيگە ءبىرىنشى رەت كەلىپ وتىرمىن. حالقىمىزدىڭ, قازاق حاندىعىنىڭ تاريحى تۋرالى كوبىرەك اقپارات العانىمنان كەرەمەت اسەر الدىم. بىرەگەي تاريحي ەسكەرتكىشتەردى العاش رەت ءوز كوزىممەن كوردىم. كورگەن نارسەلەردىڭ بارلىعى دا مەن ءۇشىن ۇلكەن جاڭالىق بولدى», دەدى قۇربانالى ءابۋوۆ.
سونىمەن قاتار, ول قازاقستاندىق ارحەولوگتار مەن قايتا قالپىنا كەلتىرۋشى عالىمداردىڭ قازاق حالقىنىڭ تاريحىن زەرتتەۋ جانە ناسيحاتتاۋداعى ەرەن ەڭبەكتەرى ءۇشىن العىسىن ءبىلدىردى. «عالىم ارحەولوگ, رەستاۆراتورلارعا ءوز تابىستارىن جاسىرىپ قويماي, حالىق كورسىن دەگەن نيەتپەن مۋزەيگە تاپسىرىپ جاتقاندارى ءۇشىن راحمەت ايتامىن. ولاردىڭ ەڭبەكتەرىنىڭ ارقاسىندا ءبىز بابالارىمىزدىڭ ەرتەدە قالاي ءومىر سۇرگەندىگى تۋرالى, قانداي بۇيىمداردى قولدانعاندىعى جونىندە اقپارات الدىق. وسى تاريحي قۇندىلىقتارىمىزدى ۇرپاقتان ۇرپاققا جەتكىزۋ ماڭىزدى شارۋا ەكەنىن ەسكەرۋىمىز قاجەت», دەدى ول.
داستان كەنجالين.
دەرەك, فوتو: مادەنيەت جانە سپورت مينيسترلىگى.