اقتوبە. 4 ءساۋىر. ەۋرازيالىق توپ قۇرامىنا كىرەتىن «قازحروم» تۇك» اق ءدوڭ تاۋ-كەن بايىتۋ كومبيناتىنىڭ ءبىرىنشى ۇساتىپ بايىتۋ فابريكاسىندا ورناتىلعان گيدروجىكتەمە سىناقتان ءساتتى ءوتتى. بۇل تۋرالى egemen.kz ءتىلشىسى حابارلادى.
جاڭا قوندىرعىنىڭ ارقاسىندا ەندى بايىتىلۋى قيىن شلام قالدىقتارىن قايتا وڭدەپ, ودان قوسىمشا كونتسەنترات الۋعا بولادى.
2015 جىلى ءبىرىنشى ۇساتىپ بايىتۋ فابريكاسىندا «سەتكو قازاقستان» كومپانياسى عىلىمي-زەرتتەۋ جۇمىستارىن جۇرگىزىپ, ونەركاسىپتىك گيدروجىكتەمە قوندىرعىسىن اكەلىپ, ورناتقان بولاتىن. بۇل قوندىرعى ۇساق تۇيىرشىكتى ماتەريالداردى ىرىلىگى مەن قالىڭدىعىنا سايكەس بولشەكتەپ, شيكىزاتتى گراۆيتاتسيالىق بايىتۋعا دايىنداۋ ءۇشىن قولدانىلادى.
جاڭا وندىرىستىك جەلى سىناق جۇمىستارى كەزەڭىندە وزىنىڭ تيىمدىلىگىن تانىتتى. قوندىرعى بۇعان دەيىن وندىرىستىك قالدىق سانالىپ كەلگەن بايىتىلۋى قيىن شلام قالدىقتارىن قايتا وڭدەپ, قوسىمشا بايىتۋعا العىشارت جاسايدى. وسىلايشا بۇرىن سۋشايۋ كارتاسىنا جونەلتىلىپ كەلگەن شلام قالدىقتارىنان ەندىگى جەردە نەگىزگى كومپونەنت – حرومدى ءبولىپ الۋعا بولادى. ءوز كەزەگىندە بۇل ايىنا قوسىمشا 800 توننا كونتسەنترانت وندىرۋگە مۇمكىندىك بەرىپ وتىر.
«وسى قۇرىلعى جۇمىسىنىڭ ناتيجەلەرىن ەسكەرە وتىرىپ, تاعى دا ءبىر گيدروجىكتەمە قوندىرعىسىن ساتىپ الۋ جونىندە شەشىم قابىلداندى», دەدى ۇساتىپ بايىتۋ فابريكاسىنىڭ باس تەحنولوگى الەكساندر لۋحمەنوۆ.
بۇل ەۋرازيالىق توپتىڭ 2016 جىلعا ارنالعان تاۋاردىڭ وزىندىك قۇنىن 10 پايىز تومەندەتۋ جانە تيىمدىلىكتى ارتتىرۋ جونىندەگى باعدارلاماسىنىڭ نەگىزىگى باعىتتارىنىڭ ءبىرى بولىپ تابىلادى.
ساتىبالدى ءساۋىرباي.
دەرەك, فوتو: egemen.kz