قاراعاندى. 2 ءساۋىر. قاراعاندىداعى «الەم» ساۋدا ۇيىندەگى بۋتيك يەلەرى ۇرىلار توناپ اكەتكەن التىن بۇيىمدارىنىڭ جالپى قۇنى 226 ميلليون تەڭگەنىڭ شاماسىندا بولعانىن ايتتى. بۇل تۋرالى nv.kz سايتىنا سىلتەمە جاساعان egemen.kz ءتىلشىسى حابارلادى.
بۇل سوما ازىرگە شارتتى تۇردە الىنعان. قازىرگى كەزدە بۋتيك يەلەرى رەسمي تۇردە ەسەپ-قيساپ جۇرگىزەتىن اۋديتور ىزدەستىرۋدە. تەكسەرىستەن كەيىن زارداپ شەككەن كاسىپكەرلەر ساۋدا ءۇيىنىڭ اكىمشىلىگى شىعىننىڭ ءبارىن وتەۋى كەرەك دەگەن تالاپ قويدى.
ازىرگە پوليتسيا قىزمەتكەرلەرىنىڭ قولىندا كۇدىكتىلەر تۋرالى ەشقانداي دەرەك جوق. ءبىر بەلگىلىسى – ساۋدا ءۇيىن ەكى كۇدىكتى توناعان. ولار اياقتارىنا باحيلا, قولدارىنا قولعاپ كيىپ, ارام ىستەرىن جۇزەگە اسىراردا اسا ساق قيمىلداپتى. ال سول كۇنى ساۋدا ۇيىندە كەزەكشىلىكتە بولعان كۇزەتشى ۇشتى-كۇيلى جوعالعان.
قايرات ءابىلدينوۆ.
دەرەك, فوتو: nv.kz.