«ادام كوركى – شۇبەرەك» دەگەن ءسوزدىڭ استارىندا تەرەڭ ءمان بار. زاماننىڭ تالابىنا ساي تالعاممەن كيىنۋ – قازىرگى ولشەممەن العاندا تابىسقا باستايتىن العىشارتتىڭ ءبىرى. قاراعاندىلىق كاسىبي تىگىنشى, تالانتتى كونسترۋكتور-مودەلەر ءالفيا گۋماروۆا وسىنداي ۇستانىمعا جۇگىنەدى.
ءالفيانىڭ اناسى دا ءوز ءىسىنىڭ حاس شەبەرى. مانزۋما ءجۇنىسوۆا وبلىس ورتالىعىنداعى تىگىن تسەحىندا ەڭبەك ەتتى. وتكەن عاسىردىڭ 70-ءشى جىلدارى بۇل تسەحتىڭ اۋماعى اتشاپتىرىمداي بولۋشى ەدى. ءبىر مەزگىلدە قۇرامىندا 6-7 تىگىنشىدەن بار 5-7 بريگادا قاتار جۇمىس ىستەيتىن. ول كەزدە شەتەلدىك كيىمگە ەكىنىڭ ءبىرى قولى جەتە بەرمەۋشى ەدى. سوندىقتان دا جۇرت كيىمنىڭ بارلىق تۇرىنە تاپسىرىس بەرىپ جاتاتىن.
ءالفيا بەس جاسقا تولعانىندا اناسى الماتىعا بارىپ, مودەلەر ماماندىعى بويىنشا ءبىلىم الدى. ودان كەيىن ريگاعا اتتانىپ, ول جاقتا ءپىشۋشى-مودەلەر كۋرسىندا وقىدى. ءبىر سوزبەن ايتقاندا, ءوز ىسىنە شىن بەرىلگەن ەڭبەكقور جان ىزدەنۋدەن ءبىر تانبادى. اناسىنىڭ جانىندا ءجۇرىپ ءالفيا دا كورگەنىن كوكەيىنە تۇيە بەردى. سول كەزدىڭ وزىندە تالاپتى قىز قۋىرشاقتارىنا ارناپ كيىمدى ءوزى تىگىپ الاتىن.
ءالفيا 10-شى سىنىپ وقىپ جۇرگەنىندە وزىنە ارناپ ءساندى كيىمدەردى تىگە باستادى. بىرەۋدىڭ ۇستىنەن وزىنە ۇناعان كيىمدى كورە قالسا بولدى, ۇيگە كەلە سالا سونى اينىتپاي ءپىشىپ, تىگىپ الا قوياتىن. «انا كورگەن تون پىشەر» دەگەن وسى عوي!
ورتا مەكتەپتى اياقتاعان سوڭ, تاۋلى التاي تەحنولوگيالىق تەحنيكۋمىنا ءتۇستى. وقۋىن ءبىتىرگەننەن كەيىن اناسى جۇمىس ىستەيتىن «سارىارقا» فيرماسىندا ەڭبەك جولىن باستادى.
توقسانىنشى جىلدارداعى توقىراۋدا تىگىن تسەحى جابىلدى دا, ءوڭكەي شەبەر تىگىنشىلەر جان-جاققا تاراپ كەتتى. امال جوق, ءالفيا دا ۇيدە وتىرىپ, كيىم تىگۋگە ءماجبۇر بولدى.
بىردە ول دۇڭگىرشەكتەن «بۋردا» ءسان جۋرنالىن كەزدەيسوق كورىپ قالدى. ءالفيا وسى جۋرنالدى قولىنان تاستاماي, وزدىگىنەن تالماي ۇيرەنىپ, تالاي ءساندى دۇنيەلەردى ومىرگە اكەلدى. ءسويتىپ جۇرگەنىندە سايات دوسىباەۆ دەگەن تەلەجۋرناليستىڭ «مودا ەكسكليۋزيۆ» دەگەن اۆتورلىق باعدارلاماسىنا شاقىرتۋ الدى. مۇندا ءالفيا ەفيردە ەننا بۋردا جۇيەسى بويىنشا كيىم ءپىشۋ كۋرسىن جۇرگىزەتىن بولدى. ءبىر قىزىعى, تەلەۆيزيالىق شاعىن شەبەرحانا ءالفيانىڭ ۇيىنەن ورىن العان ەدى. بۇل كەز ەركىن شىعارماشىلىققا ەسىك ايقارا اشىلعان جىلدار بولدى. جالپى, جوبا ءۇش جىلداي جەمىستى جۇمىس ىستەدى. وسى ۋاقىت ىشىندە تالاي جاس تىگىنشى, دارىندى پىشۋشىلەر ومىرگە جولداما الىپ, كاسىبي مامان رەتىندە قالىپتاستى.
تەلەۆيزيالىق جوبادان كەيىن ءالفيا دا ءوز الدىنا جەكە كاسىپ اشىپ, جۇمىس ىستەي باستادى. ءوزىنىڭ شاعىن عانا ۇجىمىمەن كۇنى بۇگىنگە دەيىن كيىم تىگىپ, ءساندى كيىنگىسى كەلگەن جەرلەستەرىن تاماشا دۇنيەلەرمەن قۋانتىپ كەلەدى. ءالفيانى ۇلاعاتتى ۇستاز دەپ تە بەك سەنىممەن ايتۋعا بولادى. ول ءوز شەبەرحاناسىندا ساندىك ءپىشۋ ساباقتارىن وتكىزەدى. ءوڭىردىڭ ءار تارابىنان ونداعان قىز-كەلىنشەكتەر كەلىپ, شەبەردىڭ قالىپتاسقان نۇسقاۋلىعى بويىنشا تىگىن ءىسىنىڭ قىر-سىرىنا قانىعادى. بۇل جەردەن وقىپ-ۇيرەنىپ, ءتالىم-تاربيە العان جاس تىگىنشىلەردىڭ كوبىسى قازىرگى ۋاقىتتا ءوز الدىنا ءىس باستاپ, جەرلەستەرىن ءساندى كيىمدەرمەن قامتاماسىز ەتىپ ءجۇر.
ءالفيا وتباسىندا دا ۇلگىلى انا. وتاعاسى ەكەۋى ءۇش ۇلدى تاربيەلەپ وسىرگەن.
بۇگىنگى كۇندە ءالفيانى كاسىبي تۇرعىدا مازالايتىن ماسەلە از ەمەس. سونىڭ ءبىرى تۋرالى ول بىلايشا وي تولعايدى. «قازىر قاراعاندىدا قولى التىن مىقتى ءتىگىنشىلەر كوپ, – دەيدى ءالفيا. – وسى شەبەرلەردىڭ باسىن قوسىپ, ورتاق ىسكە جۇمىلدىرسا عوي. وكىنىشكە قاراي, قاراعاندىلىق تىگىنشىلەر كۇنكورىس قامى ءۇشىن استاناعا بارىپ جۇمىس ىستەۋگە ءماجبۇر... ال قاراعاندىعا تۇركيا مەن بىشكەكتەن ارزان تاۋارلار ءالى اعىلىپ كەلىپ جاتىر...».
ءالفيا گۋماروۆانىڭ تىگىن سالاسىندا جۇرگەنىنىڭ وزىنە دە قىرىق جىل بولىپتى. ءوز ءىسىن كاسىبي تۇرعىدا ابدەن مەڭگەرگەن كونسترۋكتور-مودەلەرگە بەرىلەتىن تاپسىرىس تا ءارالۋان. كەڭسە كيىمى, كەشكى جانە ۇيلەنۋ تويىنىڭ كويلەكتەرى, پالتولار مەن توندار, دجينسى, بي كيىمدەرى دەيسىڭ بە, وسىنىڭ ءبارى دە ءالفيانىڭ شەبەرحاناسىنان تۇتىنۋشىلارىنا تىكەلەي جول تارتىپ جاتادى. تاپسىرىس بەرگەندەر بۇيىمنىڭ ساپاسىنا قاراپ تاڭداي قاقسا, ال ولاردىڭ كوڭىلدەرىنەن شىعۋ دەگەن ءالفيا جانە ونىڭ كومانداسىنا دا زور مەرەي. قازىرگى تاڭدا استانا مەن الماتىدان دا تالعامى جوعارى جاندار تاراپىنان تاپسىرىس تۇسە باستاعان. بۇل ەندى كاسىبي شەبەرلىكتى مويىنداۋ دەگەن ءسوز!
قايرات ءابىلدينوۆ,
«ەگەمەن قازاقستان».
قاراعاندى.
سۋرەتتى تۇسىرگەن
لينار گاليموۆ.