جاڭعىرتىلعان جادىگەرلەر

كەشە ورتالىق كوممۋنيكاتسيالار قىزمەتىنىڭ ءباسپاسوز زالىندا «ەجەلگى زامان زاتتارى مەن ەسكەرتكىشتەرىن قايتا قالپىنا كەلتىرۋ جانە كونسەرۆاتسيالاۋ» تاقىرىبىندا ءباسپاسوز ءماسليحاتى بولىپ ءوتتى. جيىنعا مادەنيەت جانە سپورت مينيسترلىگىنىڭ مادەنيەت جانە ونەر ىستەرى دەپارتامەنتى ديرەكتورى ا. رايىمقۇلوۆا, «قازقايتاجاڭعىرتۋ» رەسپۋبليكالىق مەملەكەتتىك كاسىپورنىنىڭ ديرەكتورى ا. قارىمساقوۆ, «قازقايتاجاڭعىرتۋ» ديرەكتورىنىڭ كەڭەسشىسى ق. تۇياقباەۆ, «وستروۆ كرىم» جشس ديرەكتورى ق. التىنبەكوۆ, ۇلتتىق مۇراجاي ديرەكتورىنىڭ عىلىمي جۇمىستار جونىندەگى ورىنباسارى ج. تايماعانبەتوۆ قاتىسىپ, ورامدى ويلارىن ورتاعا سالدى. مادەنيەت جانە سپورت مينيسترلىگى ۇلتتىق مۋزەيدە «قازقايتاجاڭعىرتۋ» رەسپۋبليكالىق مەملەكەتتىك كاسىپورنى مەن «وستروۆ كرىم» جاۋاپكەرشىلىگى شەكتەۋلى سەرىكتەستىگى عىلىمي قايتا قالپىنا كەلتىرۋ زەرتحاناسىنىڭ كونە زامان جادىگەرلەرى مەن ەسكەرتكىشتەرىن جاڭعىرتۋ بويىنشا اتقارعان جۇمىس ناتيجەلەرىنە ارنالعان «وتكەن كۇنگى بەينەلەردىڭ بۇگىنگى كورىنىسى» اتتى كورمە ۇيىمداستىردى. تاۋەلسىزدىكتىڭ 25 جىلدىعىنا ارنالعان وسى شارا اياسىندا قايتا قالپىنا كەلتىرىلگەن ارحەولوگيالىق جادىگەرلەر ۇلتتىق مۋزەي قورىنا تاپسىرىلادى. مۋزەي­گە كەلۋشىلەر ەجەلگى زامان زاتتارىن مۋ­زەيدىڭ اتريۋمىندا اشىلعان كورمەدەن تاماشالاي الادى. سونداي-اق, كورمەدە «وستروۆ كرىم» عىلىمي قايتا قالپىنا كەلتىرۋ زەرتحاناسىنىڭ رەستاۆراتورلارى ورگانيكالىق ارتە­فاكتىلەردى العاشقى قايتا قالپىنا كەلتىرۋ بويىنشا پراكتيكالىق ساباق جۇرگىزەدى. كورمەنى تاماشالاۋشىلار ءۇشىن ەلىمىزدىڭ رەستاۆراتورلارىنىڭ ماڭداي تەرىن توككەن شىن مانىندەگى زور ەڭبەگىمەن تىكەلەي تانىسۋ مۇمكىندىگى تۋماق, دەدى العاش بولىپ ءسوز العان اقتوتى رايىمقۇلوۆا. وسى شارا اياسىندا ەجەلگى ارتە­فاكتىلەردى ساقتاپ قالۋ بويىنشا اتقارىلعان كوپجىلدىق ەڭبەكتىڭ ناتيجەسى تانىستىرىلاتىنىن دا ەس­تەرىڭىزگە سالا كەتسەك دەيمىز. سولاردىڭ ىشىندە, شىعىس قازاقستان وبلىسى اۋماعىندا ورنالاسقان وبالاردان تابىلعان 968 ارحەولوگيالىق جادىگەر مۋزەيگە وتكىزىلۋگە دايىندالدى. مۋزەيگە وتكىزىلەتىن بارلىق زاتتىڭ ساقتاۋ شار­تى بويىنشا ۇسىنىستار بەرىلگەن رەستاۆراتسيالىق پاسپورتى بار, دەدى «قازقايتاجاڭعىرتۋ» رەسپۋبليكالىق مەملەكەتتىك كاسىپورنىنىڭ ماماندارى. راۋان قايدار, «ەگەمەن قازاقستان».