ەندى «قولىن مايلاي المايتىن» بولدى
ءازىل-وسپاق دەگەنمەن, ءار ءازىلدىڭ تۇبىندە شىندىق جاتادى عوي. كەزىندە ءوزى اۆتوينسپەكتور بولىپ جۇمىس جاساعان, زەينەتكە شىققان اقساقال ءوز ءىزىن جالعاستىرىپ ماي قىزمەتكەرى بولعان بالاسىن تاڭەرتەڭگىلىك جۇلقىلاپ وياتىپ جاتىر دەيدى.
– ءاي, تۇرسايشى, ساعات سەگىزدەن اسىپ بارادى. شوپىرلار تاڭعى التى-جەتىدەن بەرى تەگىن ءجۇرىپ ءجۇر, – دەپ.
سول ايتقانداي, الا تاياقتى جول-كولىك ينسپەكتورىن كورگەندە ماشينا جۇرگىزۋشىلەرى ساسقالاقتاپ قالاتىندىعى راس. اتاقتى جازۋشى سافۋان شايمەردەنوۆ «وسى جاس جىگىتتەرگە شوپىرلار نەگە ءيىلىپ امانداسادى دەپ رەنجۋشى ەدىم. ماشينا الىپ, ءبىر-ەكى توقتاتقاننان كەيىن مەن دە ولاردىڭ قاراسى كورىنگەندە جىميىپ, باسىمدى ءيىپ امانداساتىن بولدىم», دەپ جازعانى بار.
ماي قىزمەتكەرلەرى تۋرالى, اسىرەسە, شىمكەنت ينسپەكتورلارى تۋرالى اڭگىمە كوپ. كىم قالاي ايتسا دا وڭتۇستىكتىڭ جىگىتتەرىنىڭ تەرىسى كەڭ, قاناعاتى بار.
ءبىر جۋرناليست دوسىمىز تەمىرلانعا اسىعىپ بارا جاتىپ, جىلدامدىقتى اسىرىپ جىبەرەدى. ماي قىزمەتكەرى توقتاتادى. قالتاسىن قاراسا اقشا جوق. شىنىن ايتادى.
– جارايدى كوكە, كەيىن بەرەرسىز, – دەيدى ينسپەكتور.
شىنىندا دا, دوسىمىز كەلەسى جولى تەمىرلانعا بارا جاتىپ, الگى ينسپەكتوردىڭ ناپاقاسىن بەرىپ كەتىپتى.
ەندى ونداي كەلىسىمگە جول جوق. ەندى ماي قىزمەتكەرىمەن «شىمكەنتشە كەلىسىمگە» كەلۋگە بولمايدى. جول-كولىك پوليتسەيىمەن ءسويلەسسەڭىز, بارلىق اڭگىمە ونىڭ ءوڭىرىندەگى بەينەجەتونعا جازىلادى. كامەراسى بار بەينەجەتون شىمكەنت قالالىق جول-كولىك ينسپەكتورلارىنا كەزەكشىلىككە شىققاندا بەرىلەدى. شەشىپ الساڭ تارتىپتىك جازاعا تارتىلاسىڭ. بەينەجەتون جۇرگىزۋشى مەن پوليتسەيدىڭ اراسىنداعى بار ارەكەتتى جازىپ الادى.
– جول-كولىك پوليتسەيلەرى تۋرالى ەل اۋزىندا الىپقاشپا اڭگىمە كوپ, – دەيدى شىمكەنت قالالىق جەرگىلىكتى پوليتسيا قىزمەتىنىڭ باسشىسى دانيار مەيىرحان. بەينەجەتون پوليتسەيلەردىڭ سىبايلاس جەمقورلىققا جول بەرمەۋىنە ءارى قىزمەتىن تازا, ءادىل اتقارۋىنا, پوليتسيا قىزمەتكەرلەرىنىڭ ءيميدجىن كوتەرۋگە ءمۇمكىندىك بەرەدى. سونىمەن قاتار, جول-كولىك پوليتسياسىن كەلىسىمگە كەلۋگە ءماجبۇرلەيتىن, پارا ۇسىنعىسى كەلەتىن جۇرگىزۋشىلەرگە دە ساباق بولادى ءارى ولاردى تاربيەلەيدى. مۇنداي ارەكەتكە سانالى تۇردە بارىپ وتىرمىز.
كەزەكشىلىكتەن سوڭ پوليتسەيلەر بەينەجەتوندى بولىمگە تاپسىرادى.
ال, ونداعى سويلەسۋلەر وقو ءىىد-ءنىڭ وپەراتيۆتىك باسقارۋ ورتالىعىنىڭ بازاسىنا جازىلىپ الىنىپ, بىرنەشە ايعا ساقتاۋعا قويىلادى.
جەتوننىڭ ساقتاۋ كولەمى 32 گيگابايت, بەينەجازۋى مەن داۋىسى جوعارى دەڭگەيدە. جەرگىلىكتى پوليتسيا قىزمەتكەرلەرىنىڭ ايتۋى بويىنشا, جول-كولىك ەرەجەسىن بۇزعانعا بايلانىستى كۇنىنە 150 پروتوكولعا دەيىن تولتىرىلادى.
ارينە, جەرگىلىكتى پوليتسيا قىزمەتتىڭ بۇل ءتۇرىن اۋەدەن العان جوق.
ەلباسىنىڭ 5 ينستيتۋتتىق رەفورمانى جۇزەگە اسىرۋداعى «100 ناقتى قادام» ۇلت جوسپارىندا جول-كولىك پوليتسەيلەرىنىڭ كەزەكشىلىك كەزىندە بەينەرەگيستراتورلارمەن جابدىقتالىپ, بارلىق ارەكەتى قاداعالاناتىندىعى ءجونىندە تاپسىرما بەرىلگەن بولاتىن.
شىمكەنت پوليتسياسىنىڭ قولعا الىپ جاتقان شارۋاسى – مەملەكەت باسشىسىنىڭ تاپسىرماسىن جۇزەگە اسىرۋ.
بۇل ارەكەت تەك جول-كولىك پوليتسياسىنا عانا قاتىستى ەمەس, تۇرعىندارمەن قويان-قولتىق جۇمىس جاسايتىن ۋچاسكەلىك ينسپەكتورلارعا دا بەينەجەتون بەرىلەتىن بولادى.
وركەنيەتتى ەلدەر ۇلگىسى وزىق ەلدەردىڭ قاتارىنا كىرۋدى ماقسات ەتكەن قازاقستاننىڭ ءار سالاسىندا وسىلاي كورىنىس تاۋىپ جاتىر.
باقتيار تايجان,
«ەگەمەن قازاقستان».
وڭتۇستىك قازاقستان وبلىسى.