استانا. 31 ناۋرىز. بەلگىلى ارحيتەكتور ءارى ديزاينەر زاحا حاديد 65 جاسىندا قايتىس بولدى. بۇل تۋرالى «ينتەرفاكس» اقپارات اگەنتتىگىنە سىلتەمە جاساعان egemen.kz ءتىلشىسى حابارلادى.
ول فلوريدا شتاتىنا قاراستى مايامي قالاسىندا جەرگىلىكتى اۋرۋحانالاردىڭ بىرىندە جۇرەك تالماسىنان قايتىس بولدى.
زاحا حاديد دەكونسترۋكتيۆيزمنىڭ وكىلى بولعان. 2004 جىلى پريتتسكەر سىيلىعىن جەڭىپ العان العاشقى ايەل-ارحيتەكتور اتاندى. ونىڭ باسشىلىعىمەن الەمنىڭ بىرنەشە جەرىندە ءزاۋلىم عيماراتتار سالىنعان. ولاردىڭ اراسىندا ماسكەۋدەگى Dominion Tower بيزنەس ورتالىعى, باكۋدەگى گەيدار اليەۆتىڭ مادەني ورتالىعى, لوندونداعى سۋ سپورت تۇرلەرىنىڭ ورتالىعى, ريمدەگى XXI عاسىرداعى ۇلتتىق ونەر مۇراجايى بار. سونداي-اق, ارحيتەكتۋرالىق جارىستاردا كوپتەگەن جەڭىستەرگە جەتكەن.
ايان ءابدۋالي.
دەرەك, فوتو: «ينتەرفاكس».