پرەزيدەنت نۇرسۇلتان نازارباەۆ بيىلعى «نۇرلى جول – بولاشاققا باستار جول» اتتى جولداۋىندا يندۋستريالىق ينفراقۇرىلىمداردى دامىتۋعا كوپ كوڭىل ءبولۋىمىز كەرەك ەكەنىن اتاپ وتكەن بولاتىن. وسىعان وراي ەلباسى تاپسىرماسىن ورىنداۋ ماقساتىندا سەمەيدە كوپتەگەن يگى ىستەر اتقارىلىپ, اسىرەسە, وتاندىق وندىرۋشىلەردىڭ تاۋارلارى كەڭىنەن ناسيحاتتالۋدا. «سەمەيپلاستكوم» زاۋىتىنداعى جۇمىس ۋاقىتى بۇل كۇندەرى ەكى اۋىسىمعا بولىنگەن. سەبەبى, بۇل جەردە قوسىمشا جۇمىس قولدارى كەرەك بولعان كورىنەدى. ۋاقىت وتكەن سايىن جەرگىلىكتى تاۋار وندىرۋشىلەردىڭ ونىمىنە دەگەن سۇرانىس ارتىپ كەلەدى. اسىرەسە, سەمەيلىك زاۋىتتىڭ ءتۇرلى ونىمىنە دەگەن قىزىعۋشىلىق ەرەكشە. «سەمەيپلاستكوم» زاۋىتى 2008 جىلى «سەمپلاستكوم» نەگىزىندە اۋەل باستا قۇيۋ تسەحى رەتىندە جۇمىسىن باستاعان بولاتىن. تسەح بار بولعانى 90ح18 شارشى مەتر اۋماقتى الىپ, قوسىمشا ساۋدا ۇيىمەن عانا ەرەكشەلەندى. 2012 جىلى تۇرمىستىق كەشەن سالىنىپ, پلاستماسسا ۋاتقىش تسەح پەن 40 شاقتى تەحنيكاعا ارنالعان گاراج قولدانۋعا بەرىلدى. سول جىلى قۋاتتىلىعى 0,7 گيگاكالوري بولاتىن سۋ جىلىتقىش قازاندىقتاردى دايىنداپ شىعاراتىن قازاندىق تا ىسكە قوسىلادى.
پلاستيك قۇبىرلاردى جاساپ شىعارۋ ءۇشىن ساپالى شيكىزات وڭتۇستىك كورەيا مەن رەسەي سياقتى ەلدەردەن اكەلىنەدى ەكەن. پلاستيك قۇبىرلاردى قازاقستاننىڭ بارلىق ەلدى مەكەندەرىندە قولدانادى. سونداي-اق, كاسىپورىن ەلەكتر قۇرال-جابدىقتارىن, تەمىر جابدىقتاردى دا شىعارۋمەن اينالىسىپ كەلەدى. جاڭادان سالىنعان عيماراتتاردا ينجەنەرلىك جۇيەلەردى قۇرىپ, رەتكە كەلتىرەتىن ءموبيلدى توپ جۇمىس ىستەيدى.
– العاش شارۋاشىلىقتى قولعا العان كەزدە وتاندىق ونىمدەردى ءوندىرۋدى ويلادىق, بۇل ويىمىز جۇزەگە استى, – دەيدى «سەمەيپلاستكوم» جشس ديرەكتورى الەكساندر شماتەنكو, – شارۋامىزدى ءبىر ىزگە كەلتىرگەننەن كەيىن يننوۆاتسيالىق تىڭ جوبا ويلاستىرا باستادىق. ول جوبانى جۇزەگە اسىرۋ كەزىندە قوماقتى قارجى كەتپەيتىن جانە بىزبەن ەشكىم باسەكەگە تۇسە المايتىن بولۋى كەرەك دەگەن ماقساتتى الدىمىزعا قويدىق. نارىقتىق ەكونوميكاداعى جاعدايدى ساراپتاي وتىرىپ, ەلىمىزگە قاي جاعىنان دا پايدا اكەلەتىن جوبانى قولعا الۋدى ءجون سانادىق. پلاستيك قۇبىرلاردى شىعارۋ ارقىلى كوممۋنالدىق شارۋاشىلىقتارعا قاجەتتى بۇيىمدار شىعارساق, ۇتىلمايتىنىمىزدى بىلدىك. ويتكەنى, قازىر كەز كەلگەن جەردە پلاستيك قۇبىرلارسىز تۇرمىستى ەلەستەتۋ مۇمكىن ەمەس. بۇل جەردەگى تسەحتاردى ءبىز جاڭادان دەرلىك جاساپ, جاڭادان تۇرعىزدىق. ءبىز پوليەتيلەن, پوليپروپيلەندىك, كاناليزاتسيالىق سۋ, جىلۋ قۇبىرلارىن شىعارامىز. قازىر مۇندا 200 ادام تۇراقتى جۇمىسپەن قامتىلعان. شىعارىلاتىن ءونىم قۇرىلىس, اۋىل شارۋاشىلىعى سالالارى مەن كۇندەلىكتى تۇرمىستا پايدالانۋعا باعىتتالعان. بۇل كۇندەرى ەلىمىز عانا ەمەس, كۇللى تمد ەلدەرىندە ەرەكشە ورىن الىپ تۇرعان پلاستيكالىق قۇرىلىس ماتەريالدارى ۇلكەن سۇرانىسقا يە. سوعان وراي الداعى ۋاقىتتا «سەمەيپلاستكوم» زاۋىتىنىڭ ءونىمدەرى سۇرانىسقا دا, تالاپقا دا ساي بولاتىنىنا سەنىمىمىز مول.
راۋشان نۇعمانبەكوۆا.سەمەي.