وسكەمەندە قازاقستاننىڭ ۆولەيبولدان ايەلدەر كوماندالارى اراسىندا XXIV ۇلتتىق ليگا چەمپيوناتى مارەگە جەتتى. ونىڭ قورىتىندىسىندا جەرگىلىكتى «التاي» كلۋبى چەمپيون اتاندى.
وسكەمەندىكتەر فينالدىق كەزدەسۋدە تالدىقورعاننىڭ «جەتىسۋىن» ۇتتى. چەمپيوندارعا التىن مەدال مەن كۋبوگتى شىعىس قازاقستان وبلىسىنىڭ اكىمى دانيال احمەتوۆ تابىس ەتتى. جەڭىمپازدار, سونداي-اق, وبلىس اكىمدىگىنىڭ 5 ميلليون تەڭگەلىك سەرتيفيكاتىن الدى. «التايدىڭ» ءۇش ويىنشىسى ۆولەيبول فەدەراتسياسىنىڭ ارنايى سىيلىعىنا يە بولدى. اتاپ ايتقاندا, بىرىنشىلىكتە ەرەكشە كوزگە تۇسكەن يرينا لۋكومسكايا – ۇزدىك بايلانىستىرۋشى, ولگا بيريۋكوۆا ۇزدىك شابۋىلشى دەپ تانىلسا, يننا ماتۆەەۆا ەڭ باعالى ويىنشى اتاندى. ەندى «التاي» ايەلدەر ۆولەيبول كلۋبى اعىمداعى جىلدىڭ 3-13 قىركۇيەك كۇندەرى فيليپپيندە وتەتىن كلۋبتىق كوماندالار اراسىنداعى ازيا بىرىنشىلىگىنە قاتىسادى.
ەستەرىڭىزگە سالا كەتەيىك, وسىدان بىرنەشە كۇن بۇرىن شىعىس قازاقستان وبلىسىنىڭ «التاي» ەرلەر ۆولەيبول قۇراماسى دا ەل چەمپيوناتىن ۇتىپ, قۇرلىقتىق باسەكەگە جولداما العان بولاتىن.
دۋمان اناش,
«ەگەمەن قازاقستان».
وسكەمەن.