استانا. 30 ناۋرىز. قازاقستان پرەزيدەنتى نۇرسۇلتان نازارباەۆ ەۋروپالىق كەڭەس توراعاسى دونالد تۋسكپەن كەزدەستى. بۇل تۋرالى akorda.kz-كە سىلتەمە جاساعان egemen.kz ءتىلشىسى حابارلادى.
كەزدەسۋ بارىسىندا تاراپتار ساياسي, ساۋدا-ەكونوميكالىق, مادەني-گۋمانيتارلىق سالالارداعى قازاقستان مەن ەۋروپالىق وداقتىڭ ىنتىماقتاستىعى ماسەلەلەرىن تالقىلادى.
مەملەكەت باسشىسى ەۋرووداق قازاقستاننىڭ سىرتقى ساياساتىنداعى ماڭىزدى ۆەكتوردىڭ ءبىرى ەكەنىن جانە ساۋدا-ەكونوميكالىق ءوزارا ءىس-قيمىلدىڭ باسىمدىعى بار باعىتى بولىپ سانالاتىنىن ايتتى. قازاقستان پرەزيدەنتى ەلىمىزدىڭ سىرتقى ساۋدا اينالىمىنىڭ جارتىسىنان استامى ەۋرووداقتىڭ ۇلەسىنە تيەتىنىنە نازار اۋداردى.
سونداي-اق, نۇرسۇلتان نازارباەۆ وسى ايدا قازاقستان رەسپۋبليكاسى پارلامەنتى سەناتى ەۋروپالىق وداقپەن اراداعى كەڭەيتىلگەن جانە ستراتەگيالىق سەرىكتەستىك تۋرالى كەلىسىمدى راتيفيكاتسيالاعانىن ايتىپ, بۇل وقيعا تاراپتاردىڭ ىنتىماقتاستىعىن جاڭا ساپالى دەڭگەيگە كوتەرەتىنىنە سەنىم ءبىلدىردى.
دونالد تۋسك قازاقستان مەن ەۋرووداقتىڭ تىعىز سەرىكتەستىگى الەمدىك ەكونوميكاداعى داعدارىس ۇردىستەرىنە قاراماستان نىعايا بەرەدى دەپ ۇمىتتەنەتىنىن ايتتى.
سونىمەن قاتار, تاراپتار كەزدەسۋ بارىسىندا كۇن تارتىبىندەگى حالىقارالىق ماسەلەلەرگە توقتالدى. اتاپ ايتقاندا, ۋكرايناداعى جانە اۋعانستانداعى احۋال, تەرروريزمگە قارسى ءىس-قيمىل ماسەلەلەرى تالقىلاندى.
تالعات رايىمبەك.
دەرەك, فوتو: akorda.kz.