تاراز. 30 ناۋرىز. بيىل جامبىل وبلىسىندا قانت قىزىلشاسىنىڭ كولەمىن 6 مىڭ گەكتارعا جەتكىزۋ جوسپارلانۋدا. بۇل تۋرالى egemen.kz ءتىلشىسى حابارلادى.
وسىعان بايلانىستى وبلىس كولەمىندە ورنالاسقان اۋىل شارۋاشىلىعى قۇرىلىمدارىنىڭ اينالىمدىق قاراجاتىنىڭ جوعىن ەسكەرە وتىرىپ, قانت قىزىلشاسى داقىلىنا قاجەتتى تۇقىمدى ساتىپ الۋ ماقساتىندا وبلىستىق بيۋدجەتتەن 220 ملن. تەڭگە ءبولىندى. «ورتاازيالىق» قانت كورپوراتسياسىمەن كەلىسسوزدەر جۇرگىزىلىپ, ءوتىنىش بەرىلدى. قانت زاۋىتتارىنان الىنعان تۇقىمنىڭ قۇنىن اۋىلشارۋاشىلىق تاۋار وندىرىشۋلەرىنە بولاشاقتاعى ءونىمىنىڭ ەسەبىنەن تولەيدى. بۇدان باسقا مەركى اۋدانىندا 157,5 جانە شۋ اۋدانىندا 316,5 سەبۋ بىرلىگى قۇرايتىن قانت قىزىلشاسىنىڭ تۇقىمى قولدا بار.
جامبىل وبلىسى اكىمدىگىنىڭ اۋىل شارۋاشىلىعى باسقارماسىنىڭ باسشىسى نۇرجان نۇرجىگىتوۆتىڭ ايتۋىنشا, وبلىس بويىنشا قانت قىزىلشاسى داقىلىنىڭ اگروتەحنيكالىق ءىس-شارالارىن اتقاراتىن 244 بىرلىك اۋىل شارۋاشىلىعى تەحنيكالار بار. وسى اتالعان تەحنيكالار بۇگىنگى كۇندە قانت قىزىلشاسىن وڭتايلى مەرزىمدە اتالعان ءىس-شارالاردى اتقارۋعا جەتىسپەيدى. سوندىقتان وبلىستىق بيۋدجەتتەن تەحنيكالاردى ساتىپ الۋعا 200 000 مىڭ تەڭگە قارجى ءبولىندى.
«بۇدان بولەك, شۋ جانە قورداي اۋداندارى «مەركى قانت زاۋىتى» جشس-نەن شالعاي ورنالاسۋىنا بايلانىستى, «ورتاازيالىق قانت كورپوراتسياسى» جشس-مەن تاسىمالداۋعا كەتەتىن شىعىندارىنىڭ ءبىر بولىگىن قانت زاۋىتتارى ساتىپ الۋ قۇنىنا قوسىپ تولەۋ ءۇشىن كەلىسىم سوزدەر جۇرگىزىلدى. سونىمەن قاتار, بۇگىنگى كۇنگە قانت زاۋىتتارى جانە اۋىل شارۋاشىلىعى مينيسترلىگىمەن قانت قىزىلشاسىنىڭ ساتىپ الۋ باعاسىنا بەرىلەتىن سۋبسيديالاۋ كولەمىن ارتتىرۋ تۋرالى دا كەلىسىم جۇمىستارى ءجۇرىپ جاتىر», دەيدى نۇرجاننۇرجىگىتوۆ.
ورالحان ءداۋىت.
دەرەك, سۋرەت: egemen.kz