تاياۋدا ءتارتىپ ساقشىلارى پاۆلودار وبلىسىنا قاراستى شىدەرتى اۋىلىنان 12 شاقىرىم جەردەگى وزەننىڭ تابانىندا سۋىمەن بىرگە مۇز بولىپ, قاتىپ قالعان 42 باس جىلقىنى تاپتى. ىشكى ءىستەر باسقارماسى ءباسپاسوز قىزمەتىنىڭ حابارلاۋىنشا, بۇل ءۇي جانۋارلارى اتالعان ەلدى مەكەندەگى شارۋا قوجالىعىنا تيەسىلى ەكەن. سەبەبى, وتكەن جىلدىڭ 3 جەلتوقسانىندا ەكىباستۇز قالالىق ىشكى ىستەر باسقارماسىنا اتالعان قوجالىقتىڭ يەسى 42 باس مالىنىڭ ءىز-ءتۇزسىز جوعالىپ كەتكەنى جونىندە شاعىم تۇسىرگەن.
– مەن 2015 جىلدىڭ 18 قاراشا كۇنى ءبىر ءۇيىر جىلقىمدى جوعالتىپ الدىم. ادەتتەگىدەي, ولاردىڭ امان-ساۋ ەكەنىن كورۋ ءۇشىن جايىلىمعا كەلدىم. جانۋارلاردىڭ جوق ەكەنىن بايقاپ, ىزدەۋگە كىرىستىم. الايدا, مالدارىمدى تاپپادىم, – دەيدى قوجالىق يەسى.
– ءبىز ىشكى ىستەر باسقارماسىنا كەلىپ تۇسكەن شاعىمعا بايلانىستى ىزدەۋ جۇمىستارىن جۇرگىزدىك. پوليتسەيلەر ەكىباستۇز قالاسى ماڭىن, اقمولا جانە قاراعاندى وبلىستارىن شارلاپ, دالا جانۋارىنىڭ تۇياعى تيەدى-اۋ دەگەن جەرلەردى ءسۇزگىدەن وتكىزدى. ناتيجەسىندە جىلقىلاردىڭ مۇزعا اينالعان دەنەسىن تاپتىق, – دەيدى ءىز كەسۋشى پوليتسەيلەر.
ايتا كەتەيىك, ماماندار جوعالعان جىلقىلاردىڭ جالپى شىعىنى 9 ملن. تەڭگەنى قۇرايدى دەپ وتىر. ازىرگە بۇل وقيعاعا بايلانىستى ءتارتىپ ساقشىلارى ءالى دە تەرگەۋ امالدارى جۇرگىزىلەتىنىن ايتتى.
تورەبەك تۇرمانوۆ.