ناۋرىز – مەرەكەگە باي, قۇت قونعان اي. قازاقستاندىقتار ۇلىستىڭ ۇلى كۇنى – ناۋرىز مەرەكەسىنە قىزۋ دايىندالىپ جاتقاندا, قاراعاندىداعى رۋمىن قوعامى وزدەرىنىڭ ۇلتتىق مەيرامى – مەرتسيشوردى اتاپ وتكەن بولاتىن.
جالپى, رۋمىنيادا مەرتسيشور كەڭىنەن اتالىپ وتىلەتىن كورىنەدى. جەرگىلىكتى حالىق بۇل مەيرامدى 1 ناۋرىزدان باستاپ 10 كۇن بويى تويلايدى. وعان ەۋروپا جانە تمد ەلدەرىنەن قوناقتار ارنايى كەلەدى. «مەرتسيشور» ءسوزى قازاقشاعا تارجىمالاعاندا «ناۋرىز» دەگەن ماعىنانى بىلدىرەدى. كوكتەمدى رۋمىنيا مەن مولدوۆا حالىقتارى ءدال وسى مەرەكەمەن قارسى الادى. بۇل كۇنى تۇرعىندار ءبىر-بىرىنە تەك اق جانە قىزىل ءتۇستى گۇلدەردى عانا سىيعا تارتادى. ويتكەنى, مۇندا اڭىزبەن استاسقان ءمان بار ەكەن.
اڭىزدا بايشەشەك گۇلدى تىكەننىڭ شەڭگەلىنەن قۇتقارعان كوكتەم تۋرالى ايتىلادى. كوكتەمنىڭ بۇل ءىسىن قۇپ كورمەگەن قاھارلى قىس اشۋعا بۋلىعىپ, جەلدەتىپ, بورانداتىپتى دەيدى. بايشەشەكتىڭ عۇمىرى قىل ۇستىندە تۇرىپتى. بەيشارا گۇلدى قۇتقارام دەپ جۇرگەنىندە كوكتەمگە تىكەنەك كىرىپ, ونىڭ جاراقاتىنان قان تامشىلاي باستايدى. وسىدان كەيىن عانا قىس قاھارى قايتىپ, اق قارداعى قىزىل قاننىڭ ءتۇسى مەرتسيشور مەرەكەسىنىڭ سيمۆولىنا اينالعان ەكەن. سىيعا بەرىلەتىن اق جانە قىزىل گۇل شوقتارىن رۋمىندار ناۋرىز ايى بويى كيىمدەرىنە تاعىپ, ءساۋىر ايىندا بۇرشىك اتىپ, گۇل جارعان اعاشقا تىلەك ايتىپ بارىپ ىلەتىن بولعان.
«مەرتسيشور» فەستيۆالى وبلىسىمىزدا نيكولاي پلۋشكيس باسقاراتىن «داكيا» رۋمىن مادەني قوعامىنىڭ ۇيىمداستىرۋىمەن بيىل ءتورتىنشى مارتە وتكىزىلدى. جىل سايىن بۇل ءىس-شارا رۋمىندىق جانە مولدوۆاندىق تانىمال ارتىستەردىڭ كەلۋىمەن ەستە قالادى. 2013 جىلى ۆاسيلە يوۆۋ مەن زينايدا بولبوچانۋ قاراعاندىنىڭ قوناعى بولسا, 2014 جىلى «كەڭەستىك چەلەنتانو» اتانىپ كەتكەن يون سۋرۋچانۋ جانە كارولينا پرەپەليتسە كەلگەن بولاتىن. بىلتىر اتاۋلى مەرەكەگە كيشينەۆتىك بەلگىلى ەتنو-پوپ ۇجىم «ترانسبالكانيكا» قاتىسسا, بيىل كەنشىلەر استاناسىنا اتاقتى ەتنو-پوپ توپ «Ro-Mania» شاقىرىلدى.
قاراعاندىلىقتار «Ro-Mania» توبىنىڭ شىعارماشىلىعىمەن جاقسى تانىس. بىلتىر قازان ايىندا «داكيا» ەتنومادەني بىرلەستىگىنىڭ 10 جىلدىق مەرەيتويىنا ارنالعان كونتسەرتتىك كەشتە «Ro-Mania» توبى ونەر كورسەتكەن بولاتىن. سوندا سالتاناتتى شاراعا قازاقستانداعى رۋمىنيانىڭ توتەنشە جانە وكىلەتتى ەلشىسى نيكولاي ۋرەكە جانە رۋمىنيا سىرتقى ىستەر مينيسترلىگىنىڭ شەتەلدەگى رۋمىن دياسپوراسى ىستەرى جونىندەگى مەملەكەتتىك حاتشىسى سەباستيان حوتكا, سونداي-اق, رەسەي فەدەراتسياسىنداعى رۋمىنيانىڭ توتەنشە جانە وكىلەتتى ەلشىسى ۆاسيلە سوارە قاتىسقان ەدى.
ونەر ۇجىمىنىڭ ورىنداۋىنداعى ەتنيكالىق مۋزىكانىڭ ەنەرگەتيكاسى ادام جانىن بىردەن باۋراپ الادى. «ەڭ باستىسى, سۇيىكتى ىسىڭە جانىڭدى سالىپ بەرىلۋىڭ كەرەك. جانردىڭ ءوزى رۋحاني قۇندىلىققا باي جانە دە ونىڭ بويداعى قۋاتتى كورسەتەتىن كەرەمەت اسەرى بار», دەيدى توپ مۇشەلەرى.
كونتسەرتتىك باعدارلامادا «داكيا» رۋمىن مادەني قوعامى» قوعامدىق بىرلەستىگى جانىنداعى «دورۋلە» ەتنوفولكلورلىق ءانسامبلى رۋمىن حالىق اندەرى مەن بيلەرىن ورىندادى. «دورۋلە» ءانسامبلى – ايماقتىق جانە رەسپۋبليكالىق ۇلتتىق فەستيۆالدەردىڭ بەلسەندى قاتىسۋشىسى, 2015 جىلى استانامىزدا وتكەن «شەكاراسىز ءان» حالىقارالىق ءان فەستيۆالىنىڭ لاۋرەاتى. كورەرمەندەر «دورۋلە» شىعارماشىلىق ۇجىمىنىڭ بي نومىرلەرىن, رۋمىن جانە قازاق تىلدەرىندەگى ۆوكالدىق كومپوزيتسيالارىن جوعارى باعالادى. جىل سايىن انسامبل رەپەرتۋارى جاڭا اندەرمەن تولىعۋدا.
مەرتسيشور مەرەكەسى بارىسىندا «قوعامدىق كەلىسىم» كوممۋنالدى مەملەكەتتىك مەكەمەسىنىڭ ديرەكتورى تىلەۋبەك كاماليەۆ ءوڭىردىڭ دامۋىنا جانە جاڭا قازاقستاندىق قوعامدى قۇرۋعا قوسقان ۇلەسى ءۇشىن «داچيا» رۋمىن مادەني قوعامى جاستار قاناتىنىڭ جەتەكشىسى الەكساندر ۋرماشوۆقا وبلىس اكىمىنىڭ العىس حاتىن تابىس ەتتى.
مەرەكەلىك شارانىڭ جوعارى دەڭگەيدە وتۋىنە ساتپاەۆ قالاسىنىڭ ت.شەۆچەنكو اتىنداعى ۋكراين ەتنومادەني بىرلەستىگى, «رۋساليتسا» سلاۆيان ەتنومادەني ورتالىعى جانە وبلىسىمىزداعى بەدەلدى وقۋ ورىندارى اتسالىستى.
قايرات ءابىلدينوۆ,
«ەگەمەن قازاقستان».
قاراعاندى.