استانا. 18 ناۋرىز. بۇگىن استانا فۋتبول فەدەراتسياسىنىڭ www.sportsffa.kz اتتى جاڭا اقپاراتتىق-ساراپتامالىق پورتالىنىڭ تۇساۋكەسەر ءراسىمى ءوتتى. بۇل تۋرالى egemen.kz ءتىلشىسى حابارلادى.
وعان استانا مەن الماتىداعى سپورت جۋرناليستەرى قاتىستى. تۇساۋكەسەردە جاڭا پورتال تۋرالى جان-جاقتى مالىمەت بەرىلدى. قالالىق فۋتبول فەدەراتسياسىنىڭ پرەزيدەنتى لاشىن ايماعامبەتوۆ قوعامدىق ۇيىمنىڭ قىزمەتى, وسى كەزگە دەيىن اتقارعان جۇمىستارى تۋرالى بايانداپ بەردى.
«ءبىزدىڭ فەدەراتسيا قازاقستان رەسپۋبليكاسىنىڭ زاڭىنا سايكەس 2014 جىلدىڭ 3 شىلدەسىندە رەسمي تۇردە مەملەكەتتىك تىركەلىمنەن ءوتتى. فەدەراتسيا ءار جاس وكىلدەرى ءۇشىن تۇراقتى تۇردە فۋتبول, فۋتزال, شاعىن فۋتبولدان تۋرنيرلەر مەن جارىستار وتكىزىپ تۇرادى. بۇل تۋرالى www.sportsffa.kz پورتالىنىڭ افف بولىمىنەن اقپارات الۋعا بولادى. افف باسقا دا جۇمىستار اتقارادى. مىسالى, بالالاردى جاتتىقتىرۋ, جاتتىقتىرۋشىلار, تورەشىلەر, ينسپەكتورلار مەن مەنەدجەرلەردى دايىنداۋ سياقتى جۇمىستار بار. وسىنىڭ بارلىعى فۋتبولدى دامىتۋعا سەپتىگىن تيزىگىپ جاتىر», دەدى ول.
سونىمەن بىرگە ول فەدەراتسيانىڭ «س» ساناتىنداعى جاتتىقتىرۋشىلاردى دايىنداۋدى قولعا العانىن, ولار ءۇش كۇن وقىپ, ءتيىستى سەرتيفيكات العان سوڭ اۋەسقوي كوماندالار مەن بالالاردى جاتتىقتىرا الاتىنىن ايتتى. «وسى ماقساتتا بىلتىر مامىر ايىندا فەدەراتسيا «بالالار فۋتبول ورتالىعىن» اشتى. بۇل جەردە بالالار جاسقا ءبولىنىپ, كوكمايسا الاڭدا تەڭبىل دوپتىڭ قىر-سىرىن ۇيرەنىپ, جارىستارعا قاتىسادى. افف بالالار فۋتبولىن دامىتۋ ماقساتىندا استانا قالاسى دەنە شىنىقتىرۋ جانە سپورت باسقارماسىمەن جانە قالالىق ءبىلىم باسقارماسىمەن ىنتىماقتاستىق تۋرالى مەموراندۋم جاساپ, العاش رەت فۋتزالدان وقۋشىلار ليگاسىن وتكىزدى. وعان قالامىزدىڭ 52 مەكتەبىنەن 85 كوماندا قاتىستى», دەدى فەدەراتسيا پرەزيدەنتى. ونىڭ ايتۋىنشا, وقۋشىلار ليگاسى ەكى جاس توبى بويىنشا ءوتتى. 2001/02 جىلعى جەتكىنشەكتەر اراسىنداعى جارىستار «الاۋ» مۇز ايدىنىنىڭ الاڭىندا ءوتىپ, №56 مەكتەپ ليتسەيى جەڭىسكە جەتسە, 2003/04 جىلعى بالالار اراسىنداعى تۋرنيردە №37 مەكتەپتىڭ وقۋشىلارى جەڭىمپاز اتاندى.
راسىمدە فەدەراتسيانىڭ قىزمەتى جايىندا باسقا دا قىزىقتى مالىمەتتەر بەرىلدى. فەدەراتسيانىڭ ۆيتسە-پرەزيدەنتى ءاليا دۇيسەكەەۆا جاڭا پورتال تۋرالى ايتىپ بەردى. «بۇرىن فەدەراتسيانىڭ ەلەكتروندى باسىلىمى بولاتىن. قازىر وزدەرىڭىز كورىپ وتىرعانداي, الەمدە كۇن سايىن جاڭالىقتار بولىپ جاتىر. سونىڭ ءبىرى – پورتالدار مەن سايتتار, الەۋمەتتىك جەلىلەر. وسىعان بايلانىستى ۋاقىت كوشىنەن قالماي, باسقا ۇيىم, مەكەمەلەردىڭ الدى بولۋى ءۇشىن قىزمەتىمىزدى جان-جاقتى تاراتىپ, ناسيحاتتاۋ ماقساتىندا جاڭا پورتال اشىپ وتىرمىز. ول Sportsffa.kz پورتالى دەپ اتالادى. مۇندا ونلاين جۇيەدە فەدەراتسيا اياسىنداعى دودالاردىڭ بارلىعى جاريالانىپ وتىرادى. تۋرنير حاتتامالارى, تۋرنير كەستەلەرى, سۇرمەرگەندەر, ويىندارعا شولۋ, فوتو-بەينەرەپورتاجدار – ءبارى-ءبارى ءبىزدىڭ پورتالىمىزدا كورىنىس تاباتىن بولادى», دەدى ول.
ءاليا دۇيسەكەەۆانىڭ سوزىنەن بەلگىلى بولعانداي, 2016 جىلدىڭ 1 قاڭتارىندا اشىلعان جاڭا پورتالدىڭ باستى ماقساتى – اۋەسقوي فۋتبولدان باستاپ كاسىپقوي دەڭگەيدەگى بارلىق دودالاردىڭ بارلىعىن قامتۋ. «پورتالدا باسىمدىلىق ساراپتامالىق ماقالالارعا بەرىلەدى. ياعني, قازاقستان فۋتبولىنداعى وزەكتى ماسەلەلەردى جان-جاقتى ساراپتاپ, تالقىلاپ, پىسكەن كۇيدە وقىرمانعا جەتكىزۋ. سونداي-اق, فۋتبولشى, جاتتىقتىرۋشى, ساراپشى, فۋنكتسيونەر ماماندارمەن سۇحباتتاسۋ ارقىلى اقپاراتتى بىرىنشى بولىپ جەتكىزىپ, بەلگىلى ءبىر ماسەلە جايلى كوزقاراسىن ءبىلۋ», دەدى ول.
وسىدان كەيىن ورتاعا فەدەراتسيانىڭ قىزمەتكەرلەرى شىعىپ, جۇمىستارى تۋرالى ايتىپ, ءوز ويلارىمەن ءبولىستى. پورتالدىڭ قازاق ءبولىمىنىڭ رەداكتورى بەلگىلى سپورت ءجۋرناليسى نۇرعازى ساساەۆ, سايتتا ەكى تىلدە جازاتىن جاس ارىپتەسىمىز ءازيز ورازباەۆ, ورىس ءبولىمىنىڭ رەداكتورى ۆلاديمير مالتسەۆ, ماتەريالداردى اعىلشىن تىلىندە دايىندايتىن تىلەك ادرىشەۆ, جاتتىقتىرشىلار مەن تورەشىلەر, باسقا دا قىزمەتكەرلەر قىزىقتى مالىمەتتەردەن حاباردار ەتتى. مىسالى, نۇرعازى ساساەۆ فەدەراتسيا مەن جاڭا پورتالدىڭ جۇمىسىنا ءبىر كىسىدەي قىزمەت ەتىپ جاتقان ارىپتەستەرىنىڭ ەڭبەگىن ايتتى. «قازىر فەدەراتسيا بۇقارالىق سپورتتى, بالالار فۋتبولىن دامىتۋدا كوپ جۇمىستار اتقارىپ جاتىر. كوپتەگەن تۋرنيرلەر وتكىزىلە باستادى. بۇل ءۇشىن فەدەراتسيا باسشىلىعى قولدا بار مۇمكىندىكتىڭ ءبارىن جاساپ كەلەدى. سونىمەن بىرگە تورەشىلەر القاسىنىڭ توراعاسى عالىمجان كەنجالينوۆتىڭ, مەنەدجەرلەر دانات مۇحامەتعاليەۆ, ەرىك شىنشالينوۆ, ەرنار قۇسايىنوۆ, بالالار فۋتبول ورتالىعىنىڭ جاتتىقتىرۋشىسى الەكساندر چەرنيكوۆتىڭ دا ەڭبەگىن اتاپ وتۋگە بولادى. وسى بەس ادام 50 ادامنىڭ جۇمىسىن جاساپ, جۇگىن كوتەرىپ كەلە جاتىر. ەگەر باسقا فەدەراتسيالاردا 50-100 ادام جۇمىس ىستەپ, ونىڭ ءوزىن دۇرىس اكەتە الماي جاتسا, ءبىزدىڭ بەس جىگىتىمىز 100 ادامنىڭ جۇمىسىن اتقارىپ وتىر», دەدى ول. ال پورتالدىڭ جۇمىسى تۋرالى نۇرعازى ساساەۆ اعىلشىن تىلىندەگى ماقالالاردىڭ بلوگ ىسپەتتەس جۇرگىزىلەتىنىن, قازاق تىلىندەگى ماقالالار مەن ورىس تىلىندەگى ماتەريالدار ءبىر-بىرىنەن اۋدارىلمايتىنىن ەسكەرتتى.
«پورتال رەداكتسياسىنىڭ كومانداسى – ەلىمىزگە بەلگىلى, سپورتتىق, ونىڭ ىشىندە فۋتبول جۋرناليستيكاسىندا تاجىريبەلەرى مول, ەۋروپا جانە الەم چەمپيوناتتارى مەن وليمپيا ويىندارىندا قىزمەت اتقارعان كاسىپقوي ماماندار», دەدى ارىپتەسىمىز.
كەزدەسۋدە ءازيز ورازباەۆ وسى جازدا جۋرناليستەر ليگاسىنىڭ اشىلاتىنىن, ول ءۇش اي بويى, ياعني ماۋسىم, تامىز, قىركۇيەك ايلارىندا وتەتىنىن ايتتى. ورىس ءبولىمىنىڭ رەداكتورى ۆلاديمير مالتسەۆ «تاريح» ءبولىمىنىڭ جۇمىسىنا توقتالىپ, پورتالدا جاريالاناتىن تاريحي ماتەريالدار وقىرماندار تاراپىنان ءتيىستى باعاسىن الاتىنىنا سەنىم ءبىلدىردى. «بۇل بولىمدەگى ماتەريالداردى وقىرماندار قىزىعا دا قۇنىعا دا وقيتىنى سوزسىز. مۇندا سىزدەر ەل فۋتبولى مەن ەلوردا فۋتبولىنىڭ تاريحىنان قىزىقتى مالىمەتتەر تابا الاسىز», دەدى ول..
تۇساۋكەسەر سوڭىندا فەدەراتسيانىڭ پرەزيدەنتى, قىزمەتكەرلەرى جۋرناليستەردىڭ سۇراقتارىنا جاۋاپ بەردى. سۇراق-جاۋاپ پىشىنىندە وتكەن كەزدەسۋدە وقىرماندار تاراپىنان شتاتتاعى ۇلتتىق كوماندالار جانە سپورت رەزەرۆى ديرەكتسياسىنىڭ ءباسپاسوز حاتشىسى ارداق توعىموۆ, قازاقستان سپورت ءباسپاسوزى قاۋىمداستىعىنىڭ پرەزيدەنتى ءىلياس وماروۆ پەن وسى جولداردىڭ اۆتورى استانا فۋتبولى تۋرالى ءوز ويلارىن ايتىپ, جاڭا پورتالدىڭ جۇمىسىنا ساتتىلىك تىلەدى. وسىدان كەيىن فەدەراتسيانىڭ پرەزيدەنتى لاشىن ايماعامبەتوۆ پورتال رەداكتسياسىنىڭ ماتەريالداردى كاسىپقوي, ساۋاتتى تۇردە, ابدەن ءپىسىرىپ بارىپ وقىرمانعا جەتكىزۋدى ماقسات ەتىپ وتىرعانىن, استانا فۋتبول فەدەراتسياسىنىڭ افف اببرەۆياتۋراسى دا پورتالىمىزدىڭ «فۋتبول. فاكتىلەر. اقپارات» ۇرانىمەن ۇندەس ەكەنىن ايتتى.
«وسى مۇمكىندىكتى پايدالانا وتىرىپ, ەل فۋتبولىنا بەي-جاي قاراي المايتىن بارشا ازاماتتارىمىزدى سەرىكتەستىككە شاقىرامىز. «فۋتبول. فاكتىلەر. اقپارات» پورتالى سىزدەردى ارىپتەستەرمەن پىكىر الماسۋعا, وي بولىسۋگە جانە كاسىپقوي بايقاۋلارعا قاتىسۋعا شاقىرادى», دەدى ول ءسوزىنىڭ سوڭىندا.
داستان كەنجالين.
دەرەك: egemen.kz
سۋرەت: استانا قالاسى فۋتبول فەدەراتسياسى.