ەقىۇ پارلامەنتتىك اسسامبلەياسى ميسسياسىنىڭ باسشىلارى قازاقستاننىڭ سايلاۋعا دايىندىعىن جوعارى باعالادى
كەشە قازاقستان رەسپۋبليكاسىنىڭ سىرتقى ىستەر ءمينيسترى ەرلان ىدىرىسوۆ ەۋروپاداعى قاۋىپسىزدىك جانە ىنتىماقتاستىق ۇيىمى (ەقىۇ) پارلامەنتتىك اسسامبلەياسى ميسسياسىنىڭ باسشىسى گەير بەككەۆولد پەن ەقىۇ قىسقا مەرزىمدى بايقاۋشىلارىنىڭ ارنايى ۇيلەستىرۋشىسى ماريەتتا تيدەيمەن كەزدەستى.
كەزدەسۋ بارىسىندا شەتەلدىك قوناقتار ورتالىق سايلاۋ كوميسسياسى مەن قازاقستان رەسپۋبليكاسى مەملەكەتتىك ورگاندارىنىڭ حالىقارالىق بايقاۋشىلارمەن ىقپالداستىققا اشىقتىعى مەن تۇتاستاي العاندا وتانىمىزدىڭ الداعى سايلاۋعا دايىندىق دەڭگەيىن جوعارى باعالادى.
ءوز كەزەگىندە قازاقستان سىرتقى ساياسات ۆەدومستۆوسىنىڭ باسشىسى سايلاۋ وتكىزۋدىڭ جالپى ساياسي استارى مەن اتالعان ميسسيا جۇمىسىنىڭ ساپالى جانە مازمۇندى دايىندىعىن باياندادى.
ە.ىدىرىسوۆ قوناقتاردى بەس ينستيتۋتتىق رەفورما مەن «100 ناقتى قادام» ۇلت جوسپارىن جۇزەگە اسىرۋ اياسىندا قازاقستاندا بولعان ماڭىزدى ساياسي, ەكونوميكالىق جانە الەۋمەتتىك وزگەرىستەردەن حاباردار ەتتى. ول مەملەكەتتىك جانە قوعامدىق قۇرىلىمداردىڭ اشىقتىعىن ارتتىرۋ بويىنشا كەشەندى جۇمىستار جۇرگىزىلگەنىن ەرەكشە اتاپ ءوتىپ, مۇنىڭ ءوز كەزەگىندە ەلدەگى دەموكراتيالىق ينستيتۋتتاردىڭ نىعايۋى مەن ەلەكتوراتتى ۇدەرىستىڭ ايقىندىعى ءۇشىن قولايلى جاعدايلار تۋعىزاتىنىن كولدەنەڭ تارتتى.
مينيستر, سونداي-اق, سايلاۋ الدىنداعى ناۋقان شەڭبەرىندە ساياسي پارتيالار قازاقستان قوعامىنىڭ نازارىنا مەملەكەتتىڭ الداعى دامۋىنا قاتىستى ۇتىمدى ۇسىنىستار جاريالانعاندارىنا نازار اۋداردى. ال مۇنداي اشىقتىق ۇدەرىستەرى دەموكراتيالى سايلاۋ وتكىزۋگە مۇمكىندىك بەرىپ, قوعامدىق پىكىرتالاستى جانداندىرا ءتۇستى. «قازاقستان الداعى پارلامەنتتىك سايلاۋدىڭ قالاي وتەتىنىنە ەرەكشە ءمان بەرەدى. ءبىز جوعارى دەموكراتيالىق ستاندارتتارعا سايكەس سايلاۋدى ۇيىمداستىرۋ ارقىلى قوعامنىڭ 100% سەنىمىن قامتاماسىز ەتۋگە نيەتتىمىز», – دەدى ە.ىدىرىسوۆ.
م.تيدەي قازاقستاندا وتكىزىلەتىن ەكونوميكالىق رەفورمالار مەن دامۋدىڭ الەۋمەتتىك ساياساتىن دا وڭ باعالادى. «ماعان قازاقستاننىڭ سىندارلى تاسىلدەمەلەرى جاعىمدى اسەر ەتتى», – دەپ اتاپ ءوتتى. ەقىۇ پا قىسقا مەرزىمدى بايقاۋشىلارىنىڭ ارنايى ۇيلەستىرۋشىسى, سونىمەن قاتار, يتاليا پارلامەنتىنىڭ دەپۋتاتى. ال ەقىۇ پا ميسسياسىنىڭ باسشىسى, نورۆەگيا پارلامەنتشىسى گ.ي.بەككەۆولد سايلاۋدى بايقاۋعا ارنالعان ميسسياعا جۇمىس جاساۋ ءۇشىن اسا قولايلى جاعدايلار جاساعان قازاقستاندىق تاراپقا العىسىن ءبىلدىردى.
كەزدەسۋ سوڭىندا تاراپتار تىعىز جانە سىندارلى قارىم-قاتىناسقا دايىن ەكەندىكتەرىن راستادى.
ايتا كەتەتىن بولساق, ەقىۇ پا قازاقستان پارلامەنتى ءماجىلىسىنىڭ دەپۋتاتتارىن سايلاۋدى بايقاۋعا 76 دەلەگات جىبەرىپ وتىر. بۇل ءبىزدىڭ ەلىمىزدەگى سايلاۋ ناۋقاندارى بويىنشا ەقىۇ پا بايقاۋىنىڭ تاريحىنداعى ەڭ ءىرى ميسسيا بولىپ تابىلادى.
ساۋلەبەك ءبىرجان.