كەشە قازاقستان رەسپۋبليكاسى ورتالىق سايلاۋ كوميسسياسىنىڭ توراعاسى ق.تۇرعانقۇلوۆ شانحاي ىنتىماقتاستىق ۇيىمى بايقاۋشىلار ميسسياسىنىڭ باسشىسى ا. نوسيروۆپەن كەزدەستى. كەزدەسۋگە, سونداي-اق, شانحاي ىنتىماقتاستىق ۇيىمى حاتشىلىعىنىڭ باس ساراپشىسى م.اسەينوۆ قاتىستى.
كەزدەسۋ بارىسىندا ورتسايلاۋكوم توراعاسى ميسسيا باسشىسىن ورتالىق سايلاۋ كوميسسياسىنىڭ قازاقستان رەسپۋبليكاسى پارلامەنتى ءماجىلىسىنىڭ دەپۋتاتتارىن جانە ءماسليحاتتارىنىڭ دەپۋتاتتارىن سايلاۋدى ازىرلەۋ مەن جۇمىسىمەن تولىق تانىستىردى.
«ەلەكتوراتتىق ناۋقان كەزەڭدەرى زاڭنامادا كوزدەلگەن تارتىپتە وتۋدە. 18 ناۋرىز كۇنى ساع.24:00-دە ساياسي پارتيالار مەن ءماسليحاتتار دەپۋتاتتىعىنا كانديداتتاردىڭ سايلاۋ الدىنداعى ۇگىتى اياقتالادى. باق-قا مونيتورينگتىڭ الدىن الا قورىتىندىلارى كورسەتكەندەي, تۇتاس العاندا, ءبىز سايلاۋعا قاتىسۋشى ساياسي پارتيالاردىڭ بارلىعىنا بۇقارالىق اقپارات قۇرالدارىنا تەڭ قول جەتكىزۋىن قامتاماسىز ەتە الدىق. كەشە ورتالىق سايلاۋ كوميسسياسى بەكىتكەن رەگلامەنتكە سايكەس التى ساياسي پارتيا تەلەديدارلىق پىكىرسايىسقا قاتىستى. ۇگىت جۇمىسىنىڭ مۇنداي نىسانى سايلاۋ تۋرالى زاڭدا كوزدەلگەن», – دەپ اتاپ كورسەتتى ق.تۇرعانقۇلوۆ.
قازاقستان رەسپۋبليكاسى پارلامەنتى ءماجىلىسىنىڭ دەپۋتاتتارىن سايلاۋدى بايقاۋ بويىنشا شىۇ ميسسياسىنىڭ باسشىسى شىۇ ميسسياسى وسى ۇيىمنىڭ بەدەلدى مۇشەسى بولىپ تابىلاتىن قازاقستانداعى سايلاۋعا مونيتورينگ جۇرگىزۋگە بەلسەندى قاتىسۋعا نيەت ءبىلدىردى.
ا.نوسيروۆ, سونداي-اق, سايلاۋدى ۇيىمداستىرۋ دەڭگەيىنە جانە قازاقستاندىق باق-تاردىڭ سايلاۋ ناۋقانى كەزىندەگى قىزمەتىنە باعا بەردى. «ءبىز دايىندىق راسىمدەرىنىڭ ماڭىزدىلىعى مەن مۇقياتتىلىعىن اتاپ وتتىك. ءبىزدىڭ ميسسيا سايلاۋدى بايقاۋدى قازاقستاندىق زاڭناما شەڭبەرىندە جانە حالىقارالىق ولشەمدەر نەگىزىندە جۇرگىزەدى», – دەدى ول كەزدەسۋ سوڭىندا جانە ورتالىق سايلاۋ كوميسسياسى مەن قازاقستانداعى سايلاۋدى ۇيىمداستىرۋشىلاردىڭ بارلىعىنا ساتتىلىك تىلەدى.