كوكشەتاۋ قالاسىنداعى «دوستار» مادەنيەت سارايىندا «قازاقستان» ۇلتتىق تەلەارناسىنىڭ تاۋەلسىزدىگىمىزدىڭ 25 جىلدىعىنا ارنالعان ءتول تۋىندىسى, حالىق اقىنى جامبىل جاباەۆتىڭ 170 جىلدىق مەرەيتويى قارساڭىندا تۇسىرىلگەن «جامبىل» تاريحي دراماسىنىڭ تۇساۋكەسەرى بولىپ ءوتتى.
«قازاقستان-كوكشەتاۋ» تەلەارناسىنىڭ ۇيىمداستىرۋىمەن وتكەن شاراعا كورەرمەندەر كوپ جينالدى. قازاقستان جازۋشىلار وداعى اقمولا وبلىستىق فيليالىنىڭ توراعاسى تولەگەن قاجىباي, وبلىستىق ىشكى ساياسات باسقارماسىنىڭ ءبولىم باسشىسى اسىلبەك باياجۇما كوزى تىرىسىندە-اق اڭىزعا اينالعان اقىن جونىندە تەبىرەنىستى ءتالىم توكتى. جينالعان قاۋىمنىڭ نازارىنا 4 ءبولىمدى درامادان تۇراتىن ءبىر جارىم ساعاتتىق فيلم ۇسىنىلدى.
شىعارما جەلىسىندە جىر ءدۇلد ۇلىنىڭ ءومىر جولى عانا ەمەس, تۇتاس ۇلتتىڭ تاعدىرى سۋرەتتەلگەن. دراما بالا جامبىلدان دانا جامبىلعا دەيىنگى سان قيلى وقيعالاردى قامتيدى. سونىمەن قاتار, 1936 جىلى قازاقستاننىڭ ونەر قايراتكەرلەرى مەن ادەبيەتشىلەرىنىڭ ماسكەۋدە وتكەن قازاق ادەبيەتى مەن ونەرىنىڭ ونكۇندىگىنە بارعان ساپارى دا ادەمى كورىنىس تاپقان. اقىن عۇمىرناماسىنداعى تىڭ دەرەكتەرمەن دە ءتانتى ەتەدى. اتاعى ءدۇرىلدەگەن ءسۇيىنباي اقىندى ءپىر تۇتىپ, باتاسىن العان مالشىنىڭ بالاسى جامبىل ءسوز ونەرىمەن ەل اراسىنا تانىلىپ, بۇرىم اتتى قىزعا عاشىق بولۋ حيكاياسى نانىمدىلىعىمەن تارتىمدى.
جامبىل ءوز زامانىندا حالقىنىڭ مۇڭىن مۇڭداپ, جوعىن جوقتاي ءبىلدى. اسىرەسە, كەڭەس وكىمەتىنىڭ سولاقاي ساياساتىنان قازاقتىڭ زيالى قاۋىم وكىلدەرى قۋعىن-سۇرگىنگە ۇشىراعاندا جىر جامپوزىنىڭ جۇدىرىقتاي جۇرەگى قان جىلاپ, قاسىرەت شەگۋى, سونداي-اق, سۇيىكتى ۇلى العادايدى ۇلى وتان سوعىسىنا اتتاندىرۋى وتە اسەرلى بەرىلگەن.
فيلمدە تەاتر جانە كينو ءارتىسى بايعالي ەسەناليەۆ جامبىل جاباەۆتىڭ شىنايى وبرازىن ناقپا-ناق جەتكىزە بىلگەن. ال, اقىن ءومىر سۇرگەن كەزەڭدى دالمە-ءدال كورسەتۋ ءۇشىن پايدالانىلعان جامبىل مۇراجايىنىڭ جيھازدارى مەن تۇتىنعان زاتتارى, وعان تارتۋ ەتىلگەن «زيم-1» اۆتوكولىگى دە قىزىقتىرا تۇسەدى.
كوكشە كورەرمەنى رەجيسسەر ءانۋار رايباەۆتىڭ ءساتتى فيلمىنەن تەرەڭ تولعام ءتۇيىپ, رۋحاني ورلەۋ سەزىمىندە بولعانى انىق.
باقبەرگەن امالبەك,
«ەگەمەن قازاقستان».
اقمولا وبلىسى.