ونى تاعايىنداۋعا قۇجاتتار قابىلداۋ باستالادى
كەشە ءبىلىم جانە عىلىم مينيسترلىگىنىڭ «حالىقارالىق باعدارلامالار ورتالىعى» اق پرەزيدەنتى عاني نىعمەتوۆ ورتالىق كوممۋنيكاتسيالار قىزمەتىنىڭ ءباسپاسوز زالىندا جۋرناليستەرمەن كەزدەسىپ, «بولاشاق» باعدارلاماسىمەن وقۋعا ءتۇسۋ ءۇشىن ىرىكتەۋدىڭ جاڭا قاعيدالارى مەن ساناتتارعا قويىلاتىن تالاپتار تۋرالى باياندادى.
عاني نىعمەتوۆ اتاپ وتكەندەي, 2016 جىلعى 11 ساۋىردە «بولاشاق» حالىقارالىق ستيپەندياسىن تاعايىنداۋعا قۇجاتتار قابىلداۋ باستالادى. قۇجات قابىلداۋ ءۇش كەزەڭ بويىنشا جۇرگىزىلەدى. ءبىرىنشى كەزەڭ – 11 ءساۋىر مەن 13 مامىر ارالىعى, ەكىنشى كەزەڭ – 13 ماۋسىمنان 29 شىلدەگە دەيىن, ال ءۇشىنشى كەزەڭ – 15 تامىز بەن 30 قىركۇيەك ارالىعىن قامتيدى.
ۇمىتكەرلەر قۇجاتتاردى ەلەكتروندى ۇكىمەت ۆەب-پورتالى, «ازاماتتار ءۇشىن ۇكىمەت» مەملەكەتتىك كورپوراتسياسى ارقىلى (بۇرىنعى حقو), نەمەسە ءوز قولىمەن «حالىقارالىق باعدارلامالار ورتالىعى» اق-قا تاپسىرۋعا بولادى. وتكەن جىلعى كونكۋرستىق ىرىكتەۋ ءتاجىريبەسى بويىنشا بيىلدان باستاپ قۇجاتتار تاپسىرۋ تالاپتارى جەڭىلدەتىلگەنى دە تىلگە تيەك ەتىلدى.
باعدارلامانى دامىتۋدىڭ 2016–2020 جىلدارعا ارنالعان جوسپارىنا سايكەس ستيپەنديا «ماگيستراتۋرا», «دوكتورانتۋرا», «رەزيدەنتۋرا» جانە «تاعىلىمدامالار» بويىنشا تاعايىندالىپ, ولارعا ساناتىنا قاراي جەكەلەگەن تالاپتار قويىلادى.
سونداي-اق, عاني نىعمەتوۆ كونكۋرستىق ىرىكتەۋدى كەڭىنەن ناسيحاتتاۋ جانە ۇمىتكەرلەردى كوپتەپ تارتۋ ماقساتىندا اقپاراتتىق ءتۇسىندىرۋ جۇمىستارى جۇزەگە اسىپ جاتقانىن دا اتاپ ءوتتى. سونىڭ اياسىندا وڭىرلەردە, ونەركاسىپتىك كاسىپورىندار مەن ۇيىمداردا, ەڭبەك ۇجىمدارى اراسىندا كەزدەسۋلەر مەن بريفينگتەر وتكىزۋدە, دەدى ول.
راۋان قايدار,
«ەگەمەن قازاقستان».