الەم-جالەم الەم
ەندى بريتانيا اسپانىنىڭ اۋاسى تازالىعى دەڭگەيىنىڭ مونيتورينگى ينتەرنەتكە قوسىلعان كەپتەرلەر ارقىلى جۇرگىزىلەتىن بولادى.
وسىعان وراي قۇستارعا داتچيكتەرى بار ارنايى كىشكەنە قاپشىقتار كيگىزىلەدى. سونداعى قوندىرعى اتموسفەراداعى ازوت ديوكسيدى مەن وزون مولشەرىن تەكسەرەدى. ناتيجەلەرى ارنايى تۆيتتەر-اككاۋنتتا, سونداي-اق قۇستاردىڭ ناقتىلى ۋاقىتتاعى قوزعالىسى كورسەتىلەتىن سايتتا جاريالانادى. جوبانى Plume Labs of Paris, DigitasLBi جانە Twitter كومپانيالارى جۇزەگە اسىرادى.
ايەلدەر ەرلەرگە قاراعاندا, كوبىرەك ۇيىقتاۋلارى كەرەك
عالىمدار ەرلەرگە قاراعاندا, ايەلدەردىڭ كوبىرەك ۇيىقتاۋلارى كەرەك ەكەنىن دالەلدەپ شىقتى.
انگليانىڭ لافبورو ۋنيۆەرسيتەتىنىڭ وقىمىستىلارى كۇنى بويى ميمەن جۇمىس ىستەيتىن نازىك جىنىستىلار وكىلدەرىنىڭ ەركەكتەردەن ورتا ەسەپپەن 20 مينۋت ارتىق ۇيىقتاۋى كەرەك دەگەن بايلام جاسادى. ولار بۇعان ورتا جاستاعى 210 ەر كىسى مەن ايەلدى ارنايى ەكسپەريمەنتكە قاتىستىرۋ ارقىلى انىقتادى. مۇنى زەرتتەۋشىلەر قىز-كەلىنشەكتەردىڭ ءبىر مەزگىلدە بىرنەشە مىندەتتى قاتار ورىنداپ وتىراتىنىمەن بايلانىستىردى.
War Thunder-دە «28 پانفيلوۆشىلار» ۇرىستارى دا بار
Gaijin Entertainment كومپانياسى War Thunder سوعىس ونلاين-ويىنىنىڭ «كوكتەمگى مارشىن» جاڭارتىپ, وعان 28 پانفيلوۆشىلار ۇرىس قيمىلدارىن ەنگىزدى.
ويىن اتى اڭىزعا اينالعان گەنەرال پانفيلوۆتىڭ 1941 جىلدىڭ قىسىندا ماسكەۋ تۇبىندە ۆەرماحت اسكەرلەرىن قالاي توقتاتقانىن كورسەتەدى. ويناۋشىلار ونى «ۆولوكالامسك» دەگەن اتاۋى بار جاڭا كارتالاردىڭ ءبىرى ارقىلى ويناي الادى.
الداعى ەلۋ جىلدا اقش تۇرعان جەر ءشول دالاعا اينالادى
امەريكا عالىمدارى الداعى 50 جىلدان سوڭ بۇگىندە اقش جايلاپ جاتقان اتىراپتىڭ قۇلازىعان قۋ مەديەن ءشول دالاعا اينالاتىنىن ايتىپ وتىر.
زەرتتەۋشىلەر مۇنى XXI عاسىردىڭ ەكىنشى جارتىسىندا قۇراما شتاتتاردى سوڭعى مىڭ جىلدىڭ ىشىندە بولىپ كورمەگەن قۇرعاقشىلىقتىڭ جايلايتىنىمەن تۇسىندىرەدى. وسى كەزدە بۇل ايماق ۇشقان قۇستىڭ قاناتى تالاتىن اڭىزاق دالا بولىپ شىعا كەلەدى. سونىڭ ىشىندە اريزونا, كاليفورنيا, تەحاس, وكلاحوما جانە نەۆادا شتاتتارى جان باسپايتىن مەكەنگە اينالادى-مىس. بۇدان باسقا, تاعى 11 شتاتتا اۋىز سۋ ومىرلىك ءمانى بار ماسەلە بولماق.
كوكو شانەل ناتسيستەرگە قىزمەت ەتكەن ەكەن
فرانتسۋز تاريحشىلارى وتكەن سارسەنبى كۇنى ەكىنشى دۇنيەجۇزىلىك سوعىس كەزىندە گەرمانيا اسكەرلەرىنە تىڭشىلىق قىزمەت ەتكەندەردى سۋدىڭ بەتىنە شىعاردى. ولاردىڭ اراسىندا اتاقتى «شانەل» ءيىسسۋىن ويلاپ تابۋشى كوكو شانەل دە بار.
ىزدەۋشىلەر ارحيۆتەن ناتسيستەردىڭ استىرتىن وپەراتسيالارى مەن فرانتسۋز قارسىلىق قوزعالىسى جايىندا قۇپيا مالىمەتتەر تاۋىپ العان. ۆەنسان زاموگىندا ۇزاق جىلدار ساقتالىپ كەلگەن قۇجاتتاردا سونداي-اق نەمىستىڭ ارنايى قىزمەتى اگەنتتەرىنىڭ اتى-جوندەرى دە كەزدەسكەن. ولاردىڭ قاتارىندا فرانتسۋزدىڭ اتاقتى ديزاينەرى, Chanel ءسان ءۇيىنىڭ نەگىزىن قالاۋشى كوكو شانەلدىڭ ءجۇرۋى ەلدى ناعىز ەستەن تاندىراتىن سەنساتسيا بولىپ وتىر.
پاكىستاندىق قىزدار بوكس الىپپەسىن ۇيرەنىپ جاتىر
بۇرىن ايەلدەردىڭ بوكسپەن اينالىسۋىنا ءۇزىلدى-كەسىلدى تىيىم سالىنىپ كەلگەن ەل – پاكىستاندا سپورتتىڭ وسى ءتۇرى قازىر قاۋىرت قولعا الىنىپ جاتىر.
ەلدىڭ بايتاعى – كاراچي قالاسىنداعى «پاك شاحين» بوكسشىلار كلۋبى بۇدان جارتى جىل بۇرىن قىز-كەلىنشەكتەردى قاتارلارىنا قابىلداي باستادى. بۇعان قالانىڭ وسى لياري اۋدانىندا قاراقشىلاردىڭ جۇرتتى قاتتى دۇرلىكتىرىپ تۇرعانى اسەر ەتكەن سياقتى. بويجەتكەندەر مۇندا ەڭ الدىمەن وزدەرىن قورعاپ ۇيرەنۋ ءۇشىن كەلىپ جاتقانعا ۇقسايدى.
اقپارات اگەنتتىكتەرىنىڭ ماتەريالدارى نەگىزىندە دايىندالدى.