الماتىدا شاحمات اكادەمياسىنىڭ جاڭا بولىمشەسى اشىلدى
الماتىدا شاحماتتان قىزدار اراسىنداعى ەڭ جاس ءارى حالىقارالىق گروسسمەيستەر جانسايا ابدىمالىك اتىنداعى شاحمات اكادەمياسىنىڭ جاڭا بولىمشەسى ءوز ەسىگىن تالانتتى جاستارعا ايقارا اشتى. سالتاناتتى شاراعا ايگىلى شاحماتشى, الەمنىڭ ون ەكىنشى چەمپيونى اناتولي كارپوۆ ارنايى كەلىپ قاتىستى.
«ايگەرىم» تۇرعىن ءۇي كەشەنىندە شاڭىراق كوتەرگەن اتالمىش اكادەميادا قالامىزداعى ەڭ دارىندى 500-گە تارتا ءجاسوسپىرىم شاحمات ونەرىنىڭ قىر-سىرىنا قانىعىپ, حالىقارالىق دودالارعا قاتىسۋعا شىڭدالاتىن بولادى. مۇنداي ءمۇمكىندىكتى «جول كارتاسى-2020» مەملەكەتتىك باعدارلاماسى اياسىندا «سامۇرىق-قازىنا» ۇلتتىق ءال-اۋقات قورىنىڭ جانە «استانا» پرەزيدەنتتىك كاسىپقوي سپورت كلۋبىنىڭ قولداۋىمەن «دامۋ» قورى مەن «Capital Bank Kazakhstan» اق بىرلەسىپ جۇزەگە اسىرىپ وتىر.
بۇعان دەيىن جانسايا ابدىمالىكتىڭ شاحمات اكادەمياسى 2014 جىلى الماتى قالاسىندا اشىلعان بولاتىن. اكادەميا قىزمەتى قازاقستاندا شاحمات سپورتىن دامىتۋعا, ونىمەن اينالىسىپ جاتقان جەتكىنشەكتەردىڭ كاسىبي دەڭگەيىن كوتەرۋگە, وسى سالادا ساپالى ءبىلىم بەرۋگە باعىتتالعان. سونىمەن قاتار, اكادەميا ءوز قىزمەتىن جۇزەگە اسىرۋ بارىسىندا الەۋمەتتىك جوبالاردى دامىتۋدى قاراستىرىپ كەلەدى, اتاپ ايتقاندا, الەۋمەتتىك جاعىنان از قامتىلعان جانە كوپبالالى وتباسىلاردان شىققان بالالاردى شاحمات ونەرىنە باۋلۋ, اۋتيزم دەرتىنە شالدىققان بالالارعا شاحمات ويىنىن ۇيرەتۋ سەكىلدى قايىرىمدى ىستەردى تۇراقتى اتقارۋدى ءوز ءمىندەتتەرىنە العان. اكادەميا ءتاربيەلەنۋشىلەرىنە قازاقستان, گرۋزيا, ۋكراينا ەلدەرىنىڭ جەتەكشى جاتتىقتىرۋشىلارى ءبىلىم بەرەدى. قازىرگى تاڭدا شاكىرتتەر سانى 300 ادامنان اسىپ وتىر. ولاردىڭ كوبى رەسپۋبليكالىق تۋرنيرلەر مەن الەم بىرىنشىلىكتەرىنىڭ جەڭىمپازدارى مەن جۇلدەگەرلەرى.
شاحمات اكادەمياسى فيليالىنىڭ اشىلۋ راسىمىندە ءسوز العان قازاقستان رەسپۋبليكاسى شاحمات فەدەراتسياسىنىڭ پرەزيدەنتى عالىمجان ەسەنوۆ, «Capital Bank Kazakhstan» اق باسقارما توراعاسى عاني وزبەكوۆ, شاحماتتان 12 مارتە الەم چەمپيونى اتانعان اناتولي كارپوۆ سپورتتىڭ بۇل تۇرىنە ەلىمىزدە جاقسى قولداۋ تاۋىپ وتىرعاندىعىن ايتا كەلىپ, كورشىلەس ەلدەر سەكىلدى, بىزدە دە شاحماتتى مەكتەپ باعدارلاماسىنا ەنگىزۋ تۋرالى ۇسىنىستارىن جەتكىزدى.
قانات ەسكەندىر,
«ەگەمەن قازاقستان».
الماتى.