بيىل استانا قالاسىندا تۇراتىن ۇلى وتان سوعىسىنىڭ ارداگەرلەرىنە ەرەكشە سىي-قۇرمەت كورسەتىلەتىن بولدى. اتاپ ايتقاندا, الداعى جەڭىس كۇنى مەرەكەسىنە وراي جەرگىلىكتى اكىمدىك تاراپىنان ءار ارداگەرگە 1 ميلليون تەڭگەدەن بەرىلەدى.
بەسىنشى شاقىرىلىمداعى قالالىق ءماسليحات سەسسياسىنىڭ كۇن تارتىبىندە قارالعان بۇل باستامانى بارلىق دەپۋتاتتار ءبىراۋىزدان قولدادى. قالا اكىمىنىڭ ورىنباسارى اندرەي لۋكيننىڭ ايتۋىنشا, بۇگىندە استانادا ۇلى وتان سوعىسىنا قاتىسقان 172 ارداگەر تۇرادى.
سونىمەن قاتار, اتالعان جيىندا ەلوردادا مۇگەدەكتەردى, قارتتار مەن اۋرۋ جانداردى كۇتۋ بويىنشا جاڭا مەكەمە اشىلاتىنى دا بەلگىلى بولدى. بۇل جونىندە اندرەي لۋكين: «بۇدان بىلاي الەۋمەتتىك جۇمىسكەرلەر ءبىر مەملەكەتتىك-كوممۋنالدىق كاسىپورىنعا ءبىرىكتىرىلىپ, مۇگەدەكتەردى, قارتتار مەن سىرقات جانداردى كۇتۋ بويىنشا قىزمەتتەر سپەكترى كەڭەيەدى. بۇل مەكەمەگە اۋرۋ ادامداردى, قارتتاردى كۇتۋدى قاجەت ەتەتىن كەز كەلگەن تۇرعىن جۇگىنە الادى», – دەدى.
قامكوڭىل جاندارعا قىزمەت كورسەتەتىن بۇل جاڭا مەكەمە ءوز جۇمىسىن ءساۋىر ايىندا باستايدى دەپ جوسپارلانۋدا.
ەرنار مۇحامبەت.