قالىڭ بۇقارانىڭ قامى ءۇشىن قاجەت ءىلىم-بىلىمدەر سان الۋان. سولاردىڭ ءبىرى, ءتىپتى, بىرەگەيى – جان تۋرالى عىلىم – پسيحولوگيا دەسەك قاتەلەسپەسپىز. ونىڭ ءتۇپ-توركىنى مەن ىلكى باستاۋى – ارىدەگى ساق, عۇنداردى ايتپاعاندا, بەرىدەگى ورحون-ەنيسەي تۇركى تاس جازۋلارىنان باستالادى. قازاقتاردىڭ: «قاي جەرىڭ اۋىرسا, جانىڭ سول جەرىڭدە», دەگەنى كوپ نارسەنى اڭعارتادى. بۇل كوك تۇرىكتەردىڭ مۇراگەرى – قازاق حالقىنىڭ ءتالىم-ءتاربيەلىك, پسيحولوگيالىق-پەداگوگيكالىق مۇراسىنىڭ اسا باي ەكەنىن كورسەتەدى.
وسى جايتتى جاقسى اڭعارعان پرەزيدەنتىمىز ن.ءا.نازارباەۆ بىلاي دەيدى: «مەنىڭ ويىمشا, قازاقتاردىڭ قايتالانباس ەتنيكالىق, پسيحولوگيالىق الەمى ءالى جەتە زەرتتەلمەي, زەردەلەنبەي جاتقان تىلسىم دۇنيە».
سوڭعى كەزدە قازاق ەلىنىڭ باس ۇرانىنا اينالعان, تۇڭعىش مەملەكەتتىك رەسمي يدەولوگيا, ياعني «ماڭگىلىك ەل» يدەياسىنىڭ جاريالانۋى, الەمدىك كەڭىستىكتە, ءتۇركىتىلدەس ەلدەردىڭ بىرلىگىنە نەگىزدەلگەن يدەيانىڭ ورتاق پسيحولوگيالىق ۇندەستىگىنىڭ بار ەكەنىن جاقسى بايقاتادى. ەلباسى جاريالاعان «ءماڭگىلىك ەل» يدەياسى – قازاق وركەنيەتىنىڭ, سايىپ كەلگەندە, ونىڭ سان عاسىر بويىنا قوردالانعان پسيحولوگيالىق وي-تۇيىندەرىنىڭ التىن دىڭگەگى.
دالا وركەنيەتىندە دۇنيەتانىمدىق يدەيالاردىڭ تۋىنا سەبەپشى بولعان جان تىنىشتىعى مەن ەل بىرلىگىن دارىپتەگەن ويشىل عۇلامالاردىڭ پسيحولوگيالىق مۇراسى ۇشان-تەڭىز دەۋگە بولادى. مىسالى, اتاقتى سازگەر, عۇلاما قورقىتتىڭ ماڭگى ءومىردى ىزدەۋى جەرۇيىقتى اڭساعان اسان قايعىنىڭ ارماندارىمەن ساباقتاسىپ جاتادى.
قازاق جەرىندە پسيحولوگيالىق وي-پىكىرلەردىڭ ۇدەرە دامۋىنىڭ باسقا ورتازيالىق اعايىندارعا (قىرعىز, وزبەك, تۇرىكمەن, ت.ب.) قاراعاندا وزىندىك ەرەكشەلىكتەرى بار. سونىڭ ەڭ باستىسى – ۇلان-عايىر جەردى مەكەندەگەن بالاجان, اقكوڭىل, ءتوزىمدى حالقىمىز ءوز ۇرپاعىن جاقسى ادام, ابزال ازامات ەتىپ ءتاربيەلەۋگە ەرەكشە ءمان بەرگەن. قازاق دالاسىنداعى جاۋ تيسە قارۋ-جاراعىن سايلاپ, ەل ءۇشىن ەڭىرەگەن ەرلەر, ادىلدىك پەن شىندىق, ادامدىقتى تۋ ەتكەن اقىن-جىراۋلار, شەبەر قولدى ىسمەرلەر مەن زەرگەرلەر, وت اۋىزدى, وراق ءتىلدى بي-شەشەندەر مەن اقىلمان اقساقالدار, ەمىرەنگەن ابزال انالار عاسىرلار بارىسىندا سۇرىپتالا قالىپتاسقان قازاقي تاربيەنىڭ جەمىسى ەكەندىگى حاق. كەلەسى ەرەكشەلىگىمىزدىڭ تاعى ءبىر دەرەگى قازىر «مادەني مۇرا» اياسىندا جارىق كورىپ جاتقان 100 تومدىق «بابالار ءسوزى» بولسا كەرەك. قازاق حالقىنداي فولكلور مۇراسىنا اسا باي ەلدى الەمنەن تابۋ قيىن. ال «فولكلور – حالىق پسيحولوگياسىنىڭ ايناسى» دەيتىن قاعيدا ەرتەدەن ايتىلىپ ءجۇر.
تاۋەلسىز قازاقستان جاعدايىندا قازىر جالپىادامزاتتىق قۇندىلىقتارعا قول جەتكىزىپ, ءبىرتۇتاس مادەني جۇيە قالىپتاستىرۋ ءۇشىن وتكەن جولىمىزدى, شىققان تەگىمىز بەن بيىگىمىزدى باعالاي ءبىلۋىمىز قاجەت. ويتكەنى, وتكەنىن باعالاي بىلمەيتىن ەل كەلەشەگىن دە بولجاي المايدى. ءبىزدىڭ وتكەن جولىمىز – ەۋرازيا دالاسىن ءدۇبىرلەتكەن جاسامپازدىققا تولى تاريح.
ەجەلگى اتا-بابالارىمىزدىڭ كۇمبىرلەگەن كۇيىمەن, جان تەبىرەنتەرلىك سىبىزعى ۇنىمەن, اسقاقتاتا سالعان اسەم انىمەن, عاشىقتىق, ليرو-ەپوس جىرىمەن, «قىسقا بولسا دا, نۇسقا» ماقال-ماتەلىمەن, شەشەندىك ءسوز, ايتىس, جىرلارىمەن سان عاسىر بويى ءوز ۇرپاعىن «سەگىز قىرلى, ءبىر سىرلى», ونەگەلى دە, ونەرلى, يماندىلىق-ادامگەرشىلىك ار-وجدانى جوعارى, نامىسقور ازامات ەتىپ تاربيەلەپ كەلگەنى – اكسيومالىق اقيقات.
حالقىمىزدىڭ پسيحولوگيالىق وي-پىكىر تاريحىنىڭ قالىپتاسىپ, دامۋ جولىن قازاق ەلىنىڭ ازاماتتىق تاريحىمەن ورايلاستىرا وتىرا, بۇل ءۇردىستى نەگىزگى ءتورت كەزەڭگە ءبولىپ قاراستىرۋدى عىلىمي تۇرعىدان دۇرىس تۇجىرىم دەپ ەسەپتەيمىز.
مۇنىڭ ءبىرىنشى كەزەڭى – ءVى-حIV عع. باستالاتىن قازىرگى تۇركى تەكتەس حالىقتاردىڭ بارىنە ورتاق پسيحولوگيالىق وي پىكىرلەردىڭ ىلكى باستاۋى, ءتۇپ-توركىنى. بۇلارعا ەجەلگى تۇركى ەسكەرتكىشتەرى «كۇلتەگىن», «تونىكوك», «بىلگە قاعان», ورحون-ەنيسەي جازۋلارى مەن قورقىت اتا, ءابۋ ناسىر ءال-فارابي, ءجۇسىپ بالاساعۇني, ت.ب. تاعىلىمدارىن جاتقىزۋ ءلازىم. ەكىنشى كەزەڭ – قازاق حاندىعىنىڭ قۇرىلۋ داۋىرىنەن باستالىپ, قازان توڭكەرىسىنە دەيىنگى پسيحولوگيالىق وي-پىكىرلەردىڭ دامۋىن قامتىسا, ءۇشىنشى كەزەڭ – پسيحولوگيا عىلىمىنىڭ كەڭەستىك قازاقستاندا ماركستىك يدەيالارمەن رۋحتانعان, ياعني كوممۋنيستىك يدەولوگيانىڭ ءداۋرەندەگەن كەزەڭىنە تۇستاس كەلەدى. ءتورتىنشى كەزەڭ – بۇل تاۋەلسىزدىك جىلدارىنان باستاۋ الاتىن, قازىرگى ەگەمەن ەلدىڭ پسيحولوگياسى.
XV عاسىردىڭ ءبىرىنشى جارتىسىنداعى پسيحولوگيالىق ويلار دالا فيلوسوفى اتانعان اسان قايعى تولعاۋلارىندا, وتەيبويداق تىلەۋقابىل ۇلىنىڭ «شيپاگەرلىك بايانىنان» ەرەكشە كورىنىس تاپقان. دالا عالىمى اتالعان ەڭبەگىندە ادامنىڭ جان قۇبىلىستارى (تۇيسىك, ويلاۋ, ءسويلەۋ, قيال, داعدى, مىنەز, قابىلەت, ت.ب.) تۋرالى ءبىراز ماعلۇماتتار كەلتىرەدى. عۇلاما ادامنىڭ ءيىس تۇيسىگىن – مۇڭك (قازىرگىشە ءيىس), تاتىم ء(دام), ويلاۋدى «ويلامالىق», سويلەۋدى «ءسويلەمەلىك», ميدى «مياق» اتاۋلارىمەن ورنەكتەيدى. ول وزىنەن بۇرىن ءومىر ءسۇرگەن ۇلى عۇلامالاردىڭ ء(ال-فارابي, ءجۇسىپ بالاساعۇني, ت.ب.) جان تۋرالى تۇسىنىكتەرىنە سۇيەنە كەلىپ, دۇنيەدەگى تىرشىلىكتىڭ باسقارۋشىسى, رەتتەۋشىسى جۇرەك دەسە دە, ميدىڭ اتقاراتىن ءرولىن دە جوققا شىعارمايدى. وسىنداي پسيحولوگيالىق وي-پىكىرلەردى ءايگىلى مۇحاممەد حايدار دۋلاتي دا ايتقان. ونىڭ قازاق حالقىنىڭ ءوزىندىك پسيحولوگياسى, ەل باسقارۋ, ءدىن مەن دەنساۋلىق, ۇرىس ءجۇرگىزۋ تۋرالى ايتقاندارى پسيحولوگيالىق تۇرعىدان ەرەكشە نازار اۋدارتادى.
دالا پسيحولوگياسى تۇرعىسىنان قاراعاندا ەرەكشە اتاپ وتەرلىك جايت – بۇل قازاق حاندارىنىڭ جان ىلىمىنەن جاقسى حاباردار بولعاندىعى. ماسەلەن, ءجانىبەك حاندا, قازىرگى سوزبەن ايتقاندا, پسيحوگيگيەنالىق, پسيحوپروفيلاكتيكالىق ۇستانىمدار بايقالادى. ول, «جەتى اتاعا تولماي قىز الماۋعا, ادامداردىڭ ءبىربىرىمەن سۇيىسپەۋىنە, جات توسەككە, زيناقورلىققا بارماۋعا جانە كەز كەلگەن ۇيدە تازالىقتىڭ ساقتالۋىنا پارمەن بەرىپ ۇكىم شىعارادى. ال مۇنى ورىنداماعاندارعا وتە قاتال جازا قولدانعان (ماسقارالاۋ, دۇرە سوعۋ, دارعا اسۋ, ت.ب.ت.س.). وسىنداي ەلدەگى تۇراقتىلىقتى ساقتاۋ ءۇشىن, زاڭ نورمالارىن دالا وركەنيەتىنە ءسىڭدىرۋ نەگىزىندە دايىندالىپ, اتا زاڭعا اينالعان كودەكستەردىڭ ءىشىندە: قاسىم حاننىڭ «قاسقا جولى», ەسىم حاننىڭ «ەسكى جولى», تاۋكە حاننىڭ «جەتى جارعىسى» بۇقارا حالىقتىڭ تىرشىلىگىنە قاجەتتى گۋمانيستىك يدەيالاردان تۋىنداعان, الەۋمەتتىك ءمانى زور قاعيدالار دالا پسيحولوگياسىندا ۇرپاقتار ساباقتاستىعىنىڭ بولعانىن دالەلدەيدى.
قازاق حالقىنىڭ ازۋلارى التى قارىس فيلوسوف-جىراۋلارى – شالكيىز, جيەمبەت, اقتامبەردى, شال اقىن, بۇقار قالقامان ۇلىنىڭ كوشپەندىلەر پسيحولوگياسىنىڭ سان قىرلارىن سۋرەتتەيتىن تولعاۋلارى, دالا ديپلوماتتارى اتانعان ۇلى داناگويلەر – تولە, قازىبەك, ءايتەكە بيلەردىڭ پسيحولوگيالىق تۇرعىداعى اسا قۇندى ويلارىمەن توقايلاسىپ جاتادى.
ءحىح عاسىردىڭ ەكىنشى جارتىسىنداعى پسيحولوگيالىق وي-پىكىرلەردىڭ دامۋى قازاقتىڭ ءۇش وي الىبى – ىبىراي, شوقان, اباي ەسىمدەرىمەن بايلانىستى ەكەندىگى بەلگىلى.
حح عاسىردىڭ ءبىرىنشى شيرەگىندەگى پسيحولوگيالىق وي-پىكىرلەردىڭ دامۋىنا – ش.قۇدايبەردى ۇلى, ا.بايتۇرسىنوۆ, س.تورايعىروۆ, م.جۇماباەۆ, ج.ايماۋىتوۆ, ءماشھۇر جۇسىپ كوپەەۆ, ت.ب. ەڭبەكتەرى زور اسەر ەتتى.
قازاق توپىراعىندا XX عاسىردىڭ باسىندا تالىمدىك وي-ءپىكىرلەرىمەن ۇلتتىق كولوريتكە تولى پسيحولوگيالىق كوزقاراستارىمەن بارشا جۇرتتى ءتانتى ەتكەن, قازاق جانتانۋ ءىلىمىنىڭ كوشباسشىسى رەتىندە تانىلعان ج.ايماۋىتوۆپەن قاتار, وقۋ-ءتاربيە ىسىنە تىكەلەي قاتىستى پەداگوگيكالىق پسيحولوگياعا ەرەكشە دەن قويعان م.جۇماباەۆتىڭ قوسقان ۇلەسىن ەرەكشە اتاپ وتۋگە بولادى. ج.ايماۋىتوۆتىڭ پسيحولوگيا سالاسىنداعى ەڭبەكتەرىنىڭ («تاربيەگە جەتەكشى», «پسيحولوگيا», «جان جۇيەسى جانە ونەر تاڭداۋ», «كومپلەكسپەن وقىتۋ جولدارى», ت.ب.) باستى ءبىر ەرەكشەلىگى – بۇلار ءتول تىلىمىزدەگى تۇڭعىش پسيحولوگيالىق تۋىندىلار بولۋىمەن قاتار, بۇرىنعى كەڭەس ەلىن مەكەندەگەن تۇركىتىلدەس حالىقتار ءتىلدەرىندە (قىرعىز, ءوزبەك, تۇرىكمەن, ازەربايجان, قاراقالپاق, تاتار, باشقۇرت, ت.ب.) العاش جارىق كورگەن بىردەن-ءبىر عىلىمي باسىلىمدار ەكەندىگىندە.
م.جۇماباەۆ سىندى جىر ءدۇلد ۇلىنىڭ ءتالىم-تاربيە عىلىمىنىڭ (پەداگوگيكا, پسيحولوگيا, ت.ب.) تەوريالىق ماسەلەلەرىنە بوي ۇرۋى تاڭعالارلىق جايت. ءويتكەنى, بۇل سالادا عىلىمي ەڭبەك جازعان الەمدىك اقىن-جازۋشىلار نەكەن-ساياق. وسى تۇرعىدان العاندا ماعجاننىڭ «پەداگوگيكا» (1922-1923 ج.ج.) اتتى كىتاپ جازۋى ءومىردە وتە سيرەك كەزدەسەتىن, تەك اسا تالانتتى ادامدارعا عانا ءتان قاسيەت.
كەڭەستىك كەزەڭدە قازاقستاندا پسيحولوگيا عىلىمىنىڭ دامۋىنا وزىندىك ۇلەس قوسىپ, وسى سالادا ارتىنا مول مۇرا قالدىرعان اكادەميك ت.تاجىباەۆ ەكەنى بەلگىلى. قازاقستانداعى عىلىمي پسيحولوگيانىڭ دامۋىنا ەرەكشە ۇلەس قوسقان ەندى ءبىر عالىم – م.مۇقانوۆ. ونىڭ 1979 جىلى جارىق كورگەن «ءداستۇرلى مادەنيەت وكىلدەرىندەگى كوگنيتيۆتى ەمپاتيا مەن رەفلەكسيانىڭ زەرتتەلىنۋى» اتتى عىلىمي ماقالاسى مەن 1980 جىلى جارىق كورگەن «اقىل-وي ءورىسى» كىتابى – قازاقستان پسيحولوگياسىنا قوسىلعان قۇندى مۇرا. ول ءوزىنىڭ ارتىنا 10-نان استام جەكە كىتاپ (وقۋ قۇرالدارى, مونوگرافيا, ادىستەمەلىك جيناقتار, ت.ب.) قالدىردى. عالىم توتاليتارلىق جۇيەنىڭ قىلىشىنان قان تامىپ تۇرعان كەزىندە-اق ەشكىمنەن تايسالماي, جاسقانباي قازاقتاردىڭ ۇلتتىق پسيحولوگياسىن زەرتتەۋگە باردى. ءوزىنىڭ 20 جىلعا سوزىلعان ەتنوپسيحولوگيالىق زەرتتەۋلەرىندە قازاق حالقىنىڭ سوناۋ ەرتە زامانداردىڭ وزىندە-اق وي-ءورىسى وتە جوعارى بولعانىن ەكسپەريمەنت ارقىلى دالەلدەپ بەردى.
XX عاسىردىڭ سوڭعى جىلدارىندا جانە تاۋەلسىزدىك جاريالانعاننان كەيىن ۇلتتىق پسيحولوگيا عىلىمى ەرەكشە سەرپىلىسكە يە بولدى. قازاقستاندا پسيحولوگيا عىلىمىنىڭ ءارتۇرلى سالالارىندا زەرتتەۋ جۇمىستارى جانجاقتى جۇرگىزىلىپ, قازاق پسيحولوگياسىنىڭ وزىندىك دامۋ تەندەنتسياسى قالىپتاسا باستادى. بۇل ءۇردىستىڭ سيپاتىن پسيحولوگيا عىلىمدارىنىڭ دوكتورلارى – پروفەسسورلار س.جاقىپوۆ, ج.نامازباەۆا, X.شەريازدانوۆا, ب.حامزين, س.بەردىباەۆا, و.ساڭعىلباەۆ, ا.اقاجانوۆا, ب.ءامىروۆا, ا.ەرمەنتاەۆا, ن.توقسانباەۆا, ت.ب. عالىمداردىڭ ءوزدەرىنىڭ جانە ولاردىڭ جەتەكشىلىگىمەن قورعالعان جۇزدەگەن كانديداتتىق ديسسەرتاتسيالاردان كورۋگە بولادى. وسى جانە اتى اتالماي قالعان كوپتەگەن عالىمدار مەن مامانداردىڭ قالامىنان ءتول ءتىلىمىزدە وقۋ قۇرالدارى مەن وقۋلىقتار, بيبليوگرافيالىق كورسەتكىشتەر مەن سوزدىكتەر, ادىستەمەلىك باسىلىمدار جانە مونوگرافيالار جارىق كوردى.
كەڭەس وكىمەتى اياسىندا پسيحولوگيا عىلىمىنىڭ دامىپ, ءوركەندەي تۇسۋىنە ءبىراز تۇساۋ سالىنىپ, كەدەرگى بولعانى راس. ءماسەلەن, 1947 جىلى كازگۋ-دە اشىلعان لوگيكا جانە پسيحولوگيا ءبولىمى 1953 جىلى جابىلدى. سودان 35 جىلدان كەيىن عانا (1988) جۇرتشىلىقتىڭ ۇلكەن دابىلىنان كەيىن ورىس ءتىلدى 25 شاكىرتكە پسيحولوگيادان ءبىلىم الۋعا مۇمكىندىك تۋدى. ال ونىڭ قازاق ءبولىمى ءتورت جىلدان كەيىن عانا بارىپ اشىلدى.
قازىرگى كەزدە دە ەلىمىزدە پسيحولوگيالىق عىلىمي-زەرتتەۋ ينستيتۋتتارى تۇگىل, دەربەس كافەدرالاردىڭ ءوزى ساۋساقپەن سانارلىقتاي. بۇلاردىڭ ءوزى دە ءالى كۇنگە دەيىن اقش پەن باتىستىڭ ىقپالىنان شىعا الماي كەلەدى. پسيحولوگيالىق كادرلار (باكالاۆريات, ماگيستراتۋرا) رەسپۋبليكانىڭ 13 ۋنيۆەرسيتەتىندە دايارلانۋدا. بىراق بۇلارعا بەرىلەتىن گرانتتار وتە از. سوندىقتان, وسى ماماندىققا كەلۋشىلەردىڭ جىل سايىن قاتارى كەمي تۇسۋدە.
پسيحولوگيا عىلىمىنىڭ جاعدايى ەلىمىز تاۋەلسىزدىك العاننان كەيىن وڭالار دەگەن ءۇمىتىمىز دە ازىرشە اقتالا قويعان جوق. وسى ايتقانىمىزعا دەرەك كەلتىرسەك, ولار مىنا تومەندەگىلەر:
بىرىنشىدەن, تاۋەلسىزدىك العاننان كەيىن وسى عىلىمدى ەلىمىزدە دامىتا ءتۇسۋ جولىندا ءبىزدەر, عالىمدار, ءبىراز ارەكەتتەندىك. ۇلتتىق ءتالىم-تاربيە قاۋىمداستىعى (1991 ج.), كەيىنىرەك, اكادەميك ت.تاجىباەۆ اتىنداعى ەتنوپسيحولوگيا ورتالىعى ۇيىمداستىرىلدى. ءبىرنەشە عىلىمي كونفەرەنتسيالار وتكىزىلدى. ءبىر اتتەگەنايى ورتالىق ۇيىمداستىرعان شارالاردىڭ بىردە-بىرەۋىنە مەملەكەت تاراپىنان قولداۋ بولمادى.
دەگەنمەن, سوڭعى كەزدە ءبىلىم جانە عىلىم مينيسترلىگى الەۋمەتتىك ماسەلەلەردى شەشۋگە ارنالعان باعدارلامالاردى جۇزەگە اسىرۋ بارىسىندا قازاق پسيحولوگيالىق قوعامىنىڭ قۇرىلۋىن قۇپتاپ, ماڭىزدى ىستەرگە تارتۋدا.
ەكىنشىدەن, قازاق ەلىندە پسيحولوگيا عىلىمي-زەرتتەۋ ينستيتۋتىن اشۋ ماسەلەسىن كوتەرگەنىمىزگە 25 جىلداي ۋاقىت ءوتتى. بۇل دا ازىرشە شەشىمىن تاپپاي تۇر;
ۇشىنشىدەن, پسيحولوگيا ءپانىن جوعارى وقۋ ورىندارىندا وقىتۋدىڭ كوپجىلدىق تاجىريبەسى بار ەكەنى بەلگىلى. ال كرەديتتىك وقۋعا كوشۋگە بايلانىستى وسى ءپان كەلەشەك ماماندار ءۇشىن كەرەكسىز عىلىمعا اينالا باستادى. ماسەلەن, ۋنيۆەرسيتەتتەردە بۇرىن جەتكىلىكتى كولەمدە وقىتىلىپ كەلگەن پسيحولوگيا اكادەميالىق ءپان (قازىرگىسى 15 ساعات) وقۋ جوسپارىنان الىنىپ تاستالعانى وكىنىشتى.
تورتىنشىدەن, قازاقستاندا سەگىز مىڭداي مەكتەپتە ءۇش ميلليونداي وقۋشى بار دەسەك, بۇل سالاعا پەداگوگ-پسيحولوگ ماماندار اسا قاجەت ەكەنى ءوز-وزىنەن بەلگىلى. وسى ماسەلە تمد ەلدەرىندە جاقسى جولعا قويىلعان. ماسەلەن, رەسەيدىڭ ءار گۋبەرنياسىندا پسيحولوگيا فاكۋلتەتى بار, ولاردا مىڭداعان ماماندار دايارلانادى, الپىستان استام پسيحولوگيا كافەدرالارى, بىرنەشە عىلىمي-زەرتتەۋ ينستيتۋتتارى, 70 مىڭعا جۋىق پسيحولوگ ماماندارى بار. بىزدە ازىرشە بۇل كورسەتكىش وتە ماردىمسىز, ال جوو-لارى ارقىلى پسيحولوگ كادرلارىن دايارلاۋ ءىسى قۇردىم ەكەنى انىق بايقالادى.
وسى اتالعان ماسەلەلەردى شەشۋگە ءارتۇرلى ماماندىق وكىلدەرىنىڭ بەلسەندى ارالاسۋى قاجەت. ءبىر سوزبەن ايتقاندا, حالقىمىزدىڭ پسيحولوگيالىق ساۋاتتىلىعىن ارتتىرۋ مەن پسيحولوگيالىق مادەنيەتىن كوتەرۋ ءۇشىن قازاق پسيحولوگيالىق قوعامىنىڭ قۇرىلۋى ءومىر تالابىنان تۋىنداعان قاجەتتىلىك ەكەنى شىندىق.
قازاق پسيحولوگيالىق قوعامىنىڭ نەگىزگى ماقساتى – رەسپۋبليكا حالقىنا پسيحولوگيالىق ءىلىمبىلىمدەردى ناسيحاتتاۋ, ەلىمىزدە پسيحولوگيالىق مادەنيەتتى قالىپتاستىرۋعا ىقپال ەتۋ ەكەندىگى باسا ايتىلىپ كەلەدى.
ماڭگىلىك ەلدە جايساڭ جاندار ءوسسىن دەسەك تومەندەگى پسيحولوگيانىڭ تەوريالىق جانە قولدانبالى پروبلەمالارى ەرەكشە نازار اۋدارۋدى قاجەت بولىپ تۇر. قازاق ەلىندە ءالى كۇنگە دەيىن شەشىمىن تاپپاي وتىرعان پسيحولوگيالىق ماسەلەلەر بارشىلىق.
مۇقان پەرلەنبەتوۆ,
قازاق پسيحولوگيالىق قوعامىنىڭ پرەزيدەنتى,
پسيحولوگيا عىلىمدارىنىڭ دوكتورى, پروفەسسور,
قۇبىعۇل جارىقباەۆ,
پەداگوگيكا جانە پسيحولوگيا
عىلىمدارىنىڭ دوكتورى, قازاقستانعا ەڭبەك سىڭىرگەن عىلىم جانە تەحنيكا قايراتكەرى.
الماتى.