ەلباسى «بىرىككەن كۇرەس الەمى» فەدەراتسياسىنىڭ پرەزيدەنتىن قابىلدادى

استانا. 18 ناۋرىز. ەلباسى «بىرىككەن كۇرەس الەمى» حالىقارالىق فەدەراتسياسىنىڭ پرەزيدەنتى نەناد ءلالوۆيچتى قابىلدادى. بۇل تۋرالى akorda.kz حابارلادى. مەملەكەت باسشىسى كۇرەس تۇرلەرى بويىنشا ازيانىڭ وليمپيادالىق بىلىكتىلىك ءتۋرنيرىن وتكىزۋ ماقساتىمەن استاناعا كەلگەن نەناد ءلالوۆيچتىڭ ساپارىنا ريزاشىلىق ءبىلدىردى. «كۇرەس – قازاقتار ءۇشىن تاريحي سپورت ءتۇرى. ءبىزدىڭ ەلدە ەجەلدەن-اق بالۋاندار كۇرەسىنسىز بىردە ءبىر مەرەكە وتپەگەن. بۇگىندە مەملەكەت سپورتتىڭ وسى ءتۇرىن جاستار اراسىندا تانىمال ەتۋ ءۇشىن زور كۇش-جىگەر جۇمساپ وتىر, سونىڭ ارقاسىندا قازاقستان حالىقارالىق ارەنادا جوعارى ناتيجەلەرگە قول جەتكىزدى», – دەدى نۇرسۇلتان نازارباەۆ. «بىرىككەن كۇرەس الەمى» حالىقارالىق فەدەراتسياسىنىڭ پرەزيدەنتى استانادا وتەتىن ءتۋرنيردى ۇيىمداستىرۋعا قولداۋ كورسەتىلگەنى ءۇشىن العىس ايتتى. سونداي-اق, كەزدەسۋ بارىسىندا نەناد لالوۆيچ نۇرسۇلتان نازارباەۆقا «بىرىككەن كۇرەس الەمى» حالىقارالىق فەدەراتسياسىنىڭ قۇرمەت وردەنىن تاپسىردى. ەلامان قوڭىر. دەرەك, سۋرەت: akorda.kz.