«كوكشەتاۋ» مادەنيەت سارايىندا اقمولا وبلىسى اكىمدىگىنىڭ قولداۋىمەن وبلىستىق مادەنيەت باسقارماسى, وبلىستىق حالىق شىعارماشىلىعى جانە مادەني دەمالىس ورتالىعى قازاقستان رەسپۋبليكاسى تاۋەلسىزدىگىنىڭ 25 جىلدىعىنا ارنالعان «العىس ايتام حالقىما» اتتى ايماقتىق اقىندار ايتىسىن وتكىزدى.
اقمولا وبلىستىق مادەنيەت باسقارماسىنىڭ باسشىسى ساۋلە بورىباەۆا قۇتتىقتاۋ ءسوز سويلەپ, اقىندارعا ساتتىلىك, جەڭىس تىلەدى. ايتىستىڭ باستى ماقساتى اقمولا وڭىرىندە حالقىمىزدىڭ باعا جەتپەس ۇلتتىق ونەرى, مادەني مۇراسى رەتىندە سۋىرىپسالما اقىندىق ونەرىن كەڭىنەن دامىتۋ بولىپ تابىلادى.
اقمولا وبلىسى تالانتتارعا باي ولكە. اسپانداعى اققۋعا ءۇنىن قوسقان ءبىرجان سال, ءان پاديشاسى اقان سەرى, دارحان ەلىنىڭ داڭقىن اسىرعان ايگىلى بالۋان شولاق, ءان كوگىندە «گاككۋىمەن» قالىقتاعان ۇكىلى ىبىراي سىندى ونەر ساڭلاقتارىنىڭ اسىل مۇراسىن جالعاستىرۋشىلاردىڭ ءبىرى قازاقستاننىڭ حالىق اقىنى – كوكەن شاكەەۆ ەدى. ول ايتىس ونەرىنىڭ ارقا وڭىرىندە بارىنشا ءورىس اشىپ, قانات جايۋىنا مول ەڭبەك ءسىڭىردى, كوپتەگەن شاكىرتتەردى تاربيەلەدى. سولاردىڭ ىشىندە اقىن, ماناسشى بايانعالي ءالىمجانوۆ, ايتىسكەر اقىن, دراماتۋرگ قۇدايبەرلى مىرزابەك, رەسپۋبليكالىق, حالىقارالىق اقىندار ايتىسىنىڭ جەڭىمپازى ارمان بەرداليندى اتاپ ايتسا بولادى. بۇگىنگى كۇنى دە جۇرتشىلىق سۇيىسپەنشىلىگىنە بولەنگەن ارقالى ايتىسكەرلەر بارشىلىق.
دۇركىرەپ وتكەن كەشەگى ايتىس وبلىسىمىزدا وسى كيەلى ونەردىڭ وركەنى بيىكتىگىن بايقاتتى. ىرىكتەۋ كەزەڭىنە وبلىسىمىزدىڭ قالا, اۋداندارىنان جانە سولتۇستىك قازاقستان وبلىسىنان بارلىعى 18 اقىن قاتىستى. ەكىنشى كەزەڭگە سولاردىڭ ىشىنەن 12 اقىن ءوتىپ, 6 جۇپ بولىپ ايتىستى. ساحناعا ءبىرىنشى بولىپ كوكشەتاۋلىق مۇحامەد قونقاەۆ پەن سولتۇستىكقازاقستاندىق امانجول زاعىپار شىقتى. كەلەسى كەزەكتە قۋانىش وسپان (كوكشەتاۋ ق.) مەن قۇرمەت قۇرالحان (ارشالى اۋدانى), بايرون مارەس (ەرەيمەنتاۋ) پەن ءمالجانباي ازامات (تسەلينوگراد اۋدانى), نۇرتۋعان سەرىك (ەڭبەكشىلدەر اۋدانى) پەن جارقىن جۇپارحان (سقو), نۇريسلام ءابدىل (كوكشەتاۋ ق.) مەن ەكپىن سابەتحان (زەرەندى اۋدانى), مارعۇلان وسپانوۆ (بۇلاندى اۋدانى) پەن حايىمحان جانسايا (اقان سەرى اتىنداعى مادەنيەت كوللەدجى) ءوزارا باق سىناستى.
ەكىنشى كەزەڭنىڭ قورىتىندىسى بويىنشا جوعارى ۇپاي العان 6 اقىن, 3 جۇپ اقتىق مارەگە شىعىپ, سۋىرىپسالما شەبەرلىگىمەن كورەرمەندەر ىقىلاسىنا بولەندى. ايتىستا وراق ءتىلدى اقىنداردىڭ ءبىرى جۇيرىك شەشەندىگىمەن, ەندى ءبىرى تەرەڭ ويلى بىلىمدىلىگىمەن, ۇتىمدى العىر ورنەكتەرىمەن ەرەكشەلەنىپ, ورەلى ونەرىمىزدىڭ جوعارى ۇلگىسىن تانىتتى.
قازىلار القاسىنىڭ شەشىمىمەن نۇريسلام ءابدىل (كوكشەتاۋ ق.) باس جۇلدەنى, حايىمحان جانسايا (كوكشەتاۋ ق.) ءبىرىنشى ورىندى, ال مارعۇلان وسپانوۆ (بۇلاندى اۋدانى) پەن قۋانىش وسپان (كوكشەتاۋ ق.) ەكىنشى جانە ءۇشىنشى ورىنداردى يەلەندى. سونداي-اق, ايتىسقا قاتىسقان بارلىق اقىندار ديپلومدارمەن جانە اقشالاي سىيلىقپەن ماراپاتتالدى.
ايتىس ونەرى – بۇگىنگى رۋحاني مادەنيەتىمىزدىڭ اجىراماس ءبىر بولىگى. بۇل ونەر – ۇرپاقتان-ۇرپاققا, بۋىننان-بۋىنعا اۋىسىپ, ءورىسى كەڭىپ, دامي بەرەتىنى انىق. وعان قالانىپ جاتقان نەگىز دە جوق ەمەس. ماسەلەن, كەلەسى جولعى ايتىستىڭ ەرەيمەنتاۋ اۋدانىندا وتەتىندىگى جونىندە شەشىمنىڭ قابىلدانۋى سوزىمىزگە دالەل بولدى. بۇعان قوسا, ءوڭىردىڭ قالا, اۋداندارىندا تۇراقتى جۇمىس ىستەيتىن ايتىسكەر اقىندار مەكتەپتەرىن اشۋ دا جوسپارلانعان.
باقبەرگەن امالبەك,
«ەگەمەن قازاقستان».
اقمولا وبلىسى.