ول ارتپاي, وقۋ ساپاسى جاقسارمايدى
ءبىلىم سالاسىندا قاعيداعا اينالىپ كەتكەن وسى ماسەلە قوستاناي مەملەكەتتىك پەداگوگيكالىق ينستيتۋتىندا وتكەن «التىنسارين وقۋلارى» عىلىمي-پراكتيكالىق كونفەرەنتسياسىنىڭ دا وزەگىنە اينالدى. كەمەڭگەر ۇستاز ىبىراي التىنسارين «مۇعالىم – مەكتەپتىڭ جۇرەگى» دەگەن ەكەن. راسىندا, قانداي جاقسى وقۋلىق, كومپيۋتەرلىك سىنىپ, وزىق جابدىق بولسا دا بالانىڭ ساپالى ءبىلىم الۋى ءۇشىن مۇعالىمنىڭ ماڭىزى جويىلماق ەمەس. اڭگىمە ۇستازدىڭ دەڭگەيىن قالاي كوتەرمەك كەرەك؟ جاس ۇرپاقتى ساپالى بىلىممەن سۋسىنداتۋ ءۇشىن نە ىستەۋگە ءتيىسپىز؟ كونفەرەنتسياعا قاتىسۋشىلار وسى وي توڭىرەگىندە پىكىر الماستى. رەسپۋبليكالىق دەڭگەيدە وتكەن كونفەرەنتسياعا ءبىرىنشى رەت ەلىمىزدەگى نازارباەۆ زياتكەرلىك مەكتەپتەرىنىڭ مۇعالىمدەرى قاتىستى.
كونفەرەنتسيانىڭ وسى ايماقتاعى ۇستازدار ۇستاحاناسى قوستاناي مەملەكەتتىك پەداگوگيكالىق ينستيتۋتىندا ءوتۋى دە تەگىن ەمەس. ءبىلىم ورداسى جىل سايىن پەداگوگ مامانداردى ۇشىرۋمەن قاتار, ۇستازدار ءبىلىمى مەن بىلىكتىلىگىن كوتەرۋ جۇمىستارىنا بەلسەندى, جان-جاقتى جۇمىستار جۇرگىزىپ وتىرادى. وسى جولى باسقوسۋعا قاتىسقان مەكتەپ مۇعالىمدەرى, ادىسكەرلەر, جوعارى وقۋ ورنىنىڭ وقىتۋشىلارى مۇنداي كونفەرەنتسيانىڭ ءوتۋى وتە قاجەت ەكەنىن ايتتى.
– قازىر ءبىلىم سالاسى يننوۆاتسيالىق, ينتەگراتسيالىق ۇدەرىستەردى باستان كەشىپ وتىر. مەكتەپكە دەيىنگى مەكەمەلەردەن باستاپ جاڭعىرتۋ, قايتا قالىپتاستىرۋ جۇمىستارى ءجۇرىپ جاتقاندا بىلىمبەرۋدىڭ زياتكەرلىك, يننوۆاتسيالىق مەكتەپتەر, جوعارى وقۋ ورىندارى سەكىلدى ءارتۇرلى مەكەمەلەرىنىڭ ءوزارا قارىم-قاتىناسى, ۇندەسۋى, تاجىريبە الماسۋى وتە ماڭىزدى بولىپ سانالادى. مىسالى, وسى كونفەرەنتسياعا ۇزدىك باعدارلامامەن جۇمىس ىستەيتىن نازارباەۆ زياتكەرلىك مەكتەپتەرى ماماندارىنىڭ قاتىسۋى مۇعالىمدەردى جان-جاقتى دامىتۋ ىسىندە جاقسى جاڭالىقتىڭ ءبىرى دەر ەدىم. ولار ءوز تاجىريبەلەرىمەن ءبولىسپەك, – دەدى قوستاناي مەملەكەتتىك پەداگوگيكا ينستيتۋتى پەداگوگيكا كافەدراسىنىڭ مەڭگەرۋشىسى, پەداگوگيكا عىلىمدارىنىڭ كانديداتى بيبىگۇل وتەگەنوۆا.
كونفەرەنتسيادا بايانداما جاساعان پەداگوگتىك شەبەرلىك ورتالىعى قوستاناي قالالىق فيليالىنىڭ ديرەكتورى ەلەنا ونيششەنكو
– حالىقارالىق تاجىريبە كورسەتكەندەي, مۇعالىمنىڭ وقىتۋ ساپاسى وقۋشىلاردىڭ الداعى بارلىق ءبىلىم الۋ پروگرەسىن انىقتايتىن مەكتەپتەگى باستى فاكتور بولىپ تابىلادى. ءوسىپ بارا جاتقان بالانىڭ قايتا ءبىلىم الۋعا ۋاقىتى جوق, سوندىقتان مۇعالىمنىڭ ءار كۇنى, ءار ساباعى وقۋشى ءۇشىن ماڭىزدى. ول ساپالى بولسا – وقۋشىنىڭ الداعى تابىستارىنىڭ شەتى كورىنگەندەي بولادى, ساپاسىز بولسا, وقۋشى سول كۇننەن باستاپ ۇتىلادى, – دەدى ول.
كونفەرەنتسيادا مۇعالىم بەدەلى, ءبىلىم ساپاسىن كوتەرۋ پروبلەمالارى جان-جاقتى ايتىلدى. قوستاناي مەملەكەتتىك پەداگوگيكالىق ينستيتۋتىندا بۇل جونىنەن يگىلىكتى جۇمىستار اتقارىلىپ كەلەدى. اككرەديتتەۋ بويىنشا جاقسى كورسەتكىشكە قول جەتكىزدى. بۇگىندە ينستيتۋت رەيتينگ بويىنشا ەلىمىزدەگى پەداگوگيكالىق جوعارى وقۋ ورىندارى اراسىندا ءتورتىنشى ورىندى يەلەنەدى. ينستيتۋت پرورەكتورى ەركىن ءابىل كونفەرەنتسيادا سويلەگەن سوزىندە جاقسى مۇعالىم ماسەلەسىن تالاپكەردەن, ستۋدەنتتەر قابىلداۋدان باستاۋ كەرەكتىگىن ايتتى. ءبىراز جىلداردان بەرى پەداگوگيكا ينستيتۋتتارىنا وزگە ماماندىققا ءتىسى باتپاعان, ورتاشا وقيتىن جاستاردىڭ كەلە سالاتىنى, كەيىن ولاردىڭ كوبىسىنىڭ جۇرەك قالاۋىنسىز وقىپ شىققان ماماندىعىنا بارماي, باسقا جۇمىس ىزدەپ كەتەتىنى دە تانىس كورىنىسكە اينالعان. ەركىن ءابىل سوڭعى جىلدارى ينستيتۋتتا وبلىستان تۇسەتىن تالاپكەرلەر سانىنىڭ ازايىپ كەتكەندىگىن دە تىلگە تيەك ەتتى.
– 2004 جىلى ينستيتۋتتا ءبىلىم الاتىن جاستاردىڭ 10 پايىزى سىرت وبلىستاردان كەلەتىن. 2012 جىلى ولاردىڭ ۇلەسى 17 پايىزعا كوتەرىلدى. قازىر ءبىلىم ورداسىنداعى ستۋدەنتتەردىڭ 33 پايىزى وزگە وبلىستاردان كەلىپ وقيدى. بۇل ءبىر جاعىنان ينستيتۋتتىڭ رەيتينگىنىڭ جوعارى ەكەنىندە بولسا كەرەك. دەگەنمەن, اۋىلدىق جەرلەردەگى, شالعاي ەلدى مەكەندەردەگى شاعىن كومپلەكتىلى مەكتەپتەردىڭ جاعدايى بولاشاق مۇعالىم كادرلارىن وبلىستاعى تۇرعىلىقتى جاستاردان دايىنداۋ كەرەك. شاعىن كومپلەكتىلى مەكتەپتەر ءۇشىن قوس ءپاندى يگەرگەن مۇعالىمدەر دايارلاۋدىڭ دا تيىمدىلىگى بار. مۇنىڭ بارلىعى دا ءبىلىم ساپاسىنا وزىندىك ىقپالىن تيگىزەدى, – دەدى ەركىن امانجول ۇلى.
كونفەرەنتسيانىڭ سەكتسيالىق جۇمىسىندا نازارباەۆ زياتكەرلىك مەكتەپتەرىنىڭ مۇعالىمدەرى ءوز تاجىريبەلەرىن ورتاعا سالدى.
ءنازيرا جارىمبەتوۆا,
«ەگەمەن قازاقستان».
قوستاناي.