ءوڭىر ەكونوميكاسىنىڭ دامۋىندا جىل وتكەن سايىن شاعىن جانە ورتا بيزنەستىڭ ۇلەس سالماعى ارتۋدا. بۇعان كاسىپكەرلىكتى قولداۋدىڭ دا سەرپىن بەرىپ وتىرعانى اقيقات. وبلىستا «بيزنەستىڭ جول كارتاسى-2020» مەملەكەتتىك باعدارلاماسى اياسىندا 236 كاسىپكەرگە 3,8 ميلليارد تەڭگە كولەمىندە قولداۋ كورسەتىلگەن. اتالمىش مەملەكەتتىك باعدارلاما اياسىندا بيزنەستى قولداۋ تەتىكتەرىن پايدالانعان اۋىل كاسىپكەرلەرى سانى ەكى ەسەگە ارتتى. 2015 جىلى 104 ادام مەملەكەتتىك قولداۋعا يە بولدى. وبلىس بويىنشا مەملەكەتتىك باعدارلامانى پايدالانعاندار اراسىندا حرومتاۋ, مۇعالجار جانە العا اۋداندارى كاسىپكەرلەرىنىڭ ۇلەسى باسىمداۋ بولىپ وتىر.
– 2015 جىلى باعدارلاماعا جاڭا تالاپتاردىڭ ەنگىزىلۋى وتىنىشتەردى قاراۋ ۋاقىتىن قىسقارتتى, بۇل ءوز كەزەگىندە كورسەتكىشتەردىڭ جاقسارۋىنا سەبەپ بولدى. وتكەن جىلدىڭ ناۋرىز ايىندا سوماسى 180 ميلليون تەڭگەدەن اسپايتىن نەسيەلەردى كەپىلدەندىرۋ تۋرالى شەشىم قابىلداندى. ناتيجەسىندە مۇنداي نەسيەلەر ايماقتىق ءۇيلەستىرۋ كەڭەسىنىڭ قاراۋىنسىز بەرىلە باستادى. مەملەكەتتىك قولداۋعا يە بولعان نىساندار سانى 2014 جىلمەن سالىستىرعاندا 2,5 ەسەگە ارتتى, – دەيدى وبلىستىق كاسىپكەرلىك باسقارماسىنىڭ باسشىسى باعجان تىلەگەنوۆ.
ونىڭ ايتۋىنشا, كاسىپكەرلەردى قارجىلاي قولداۋ جۇمىستارى 2016 جىلى دا جالعاساتىن بولادى. وعان رەسپۋبليكالىق بيۋدجەتتەن 1,7 ميلليارد تەڭگە ءبولىندى. بۇل قاراجات 250 شاعىن جانە ورتا بيزنەس نىساندارىن قولداۋعا جۇمسالادى. سونداي-اق, شاعىن جانە ورتا بيزنەستى قولداۋعا 1 ميلليارد تەڭگەدەن استام ينۆەستيتسيالىق قاراجات قاراستىرىلعان. «بايتەرەك» ۇبح», «قازاگرو» ۇبح», «حگ المەكس» اكتسيونەرلىك قوعامدارىمەن كەلىسىلگەن ءوزارا ىنتاماقتاستىق ءجونىندەگى مەموراندۋمدارعا سايكەس وبلىسقا قوسىمشا 1,2 ميلليارد تەڭگە تارتىلادى دەپ كۇتىلۋدە. بۇل قاراجات 10 جانە 15 ميلليون تەڭگە شاماسىندا اۋىلدىق كاسىپكەرلەرگە جانە ءوز ءىسىن جاڭادان اشقاندارعا شاعىن نەسيە رەتىندە 8,3 پايىزبەن بەرىلەدى.
جالپى العاندا, «بيزنەستىڭ جول كارتاسى-2020» باعدارلاماسى جۇزەگە اسىرىلا باستالعالى مىڭنان استام اقتوبەلىك كاسىپكەر قارجىلاي قولداۋعا يە بولدى. وبلىس اتالعان باعدارلامانى ورىنداۋدا الماتى, پاۆلودار قالالارىمەن بىرگە العاشقى كوشباسشى ۇشتىكتىڭ قاتارىنا ەنىپ وتىر.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.