كەشە قازاقستان رەسپۋبليكاسىنىڭ مەملەكەتتىك حاتشىسى – سىرتقى ىستەر ءمينيسترى قانات ساۋداباەۆ پەن رەسەي فەدەراتسياسىنىڭ سىرتقى ىستەر ءمينيسترى سەرگەي لاۆروۆ تەلەفون ارقىلى سويلەستى, دەپ حابارلادى قازاقستان رەسپۋبليكاسى سىرتقى ىستەر ءمينيسترىنىڭ ءباسپاسوز قىزمەتى.
ەكى ەلدىڭ سىرتقى ساياسات ۆەدومستۆولارىنىڭ باسشىلارى اڭگىمەنى جىلدىڭ باسىنا ءتان بولىپ تابىلاتىن ءداستۇرلى ەكى جاقتى قارىم-قاتىناستاردىڭ جاعدايى مەن بولاشاعى تاقىرىبىنان باستاپ, حالىقارالىق كۇن تارتىبىندە تۇرعان بىرقاتار ماسەلەلەردى تالقىعا سالدى.
تاراپتار 2010 جىلى ىنتىماقتاستىقتىڭ وڭ سيپاتى كورىنىس بەرگەنىن ايتا كەلىپ, ونىڭ ءارى قاراي جەمىستى دامۋىنىڭ نەگىزگى فاكتورى مەن كەپىلى قازاقستان پرەزيدەنتى نۇرسۇلتان نازارباەۆ پەن رەسەي پرەزيدەنتى دميتري مەدۆەدەۆتىڭ تۇراقتى بايلانىسى مەن دوستىق قارىم-قاتىناسى ەكەنىن اتاپ كورسەتتى.
كوپجاقتى ىنتىماقتاستىق اياسىندا ق.ساۋداباەۆ پەن س.لاۆروۆ 2010 جىلى قاراشا ايىندا باكۋدە وتكەن كاسپي جاعالاۋى ەلدەرى باسشىلارىنىڭ 3-ءشى سامميتىندە قول جەتكىزىلگەن كەلىسىمدەردىڭ ءجۇزەگە اسۋ بارىسىن قاراستىرىپ, وسى باعىتتاعى ناقتى قادامداردى بەلگىلەدى.
سونىمەن قاتار, قازىرگى كەزدە قازاقستان توراعالىق ەتىپ وتىرعان شانحاي ىنتىماقتاستىق ۇيىمى قىزمەتىنىڭ ماسەلەلەرى قاراستىرىلدى. سونىڭ ىشىندە, وسى جىلدىڭ ماۋسىم ايىنا جوسپارلانىپ وتىرعان استانادا وتەتىن ۇيىمنىڭ مەرەيتويلىق سامميتىنە دايىندىقتى ۇيىمداستىرۋ مەن ونىڭ مازمۇندىق جاعىنا ەرەكشە كوڭىل ءبولىندى.