كوپ ۋادەدەن كوڭىل قالعان سىڭايلى
يسپانياداعى باسك سەپاراتيستەرىنىڭ ەتا ۇيىمى ەل ۇكىمەتىنە كەزەكتى رەت شىعىپ, وزدەرىنىڭ بۇدان بىلاي لاڭكەستىك ارەكەتتەر جاساماي, ەلدىڭ تاۋەلسىزدىگى جولىنداعى كۇرەسىن دەموكراتيالىق, بەيبىت جولدارمەن جۇرگىزەتىنىن مالىمدەدى.
بۇگىنگى تاڭدا يسپانيا مەن فرانتسيا مەملەكەتتەرىنىڭ اۋماعىنا ءبولىنىپ كەتكەن اۋماقتارىن وسىلاي قايتارىپ, قايتادان ءوز مەملەكەتىمىزدى بەيبىت جولمەن قۇرامىز دەگەن ولاردىڭ مالىمدەمەسىنە ەشكىم سەنىپ وتىرعان جوق. ويتكەنى, مۇنداي مالىمدەمەلەر بۇرىن دا جاسالعان بولاتىن. اتاپ ايتقاندا, بۇل – سوڭعى بەس جىلداعى وق اتۋدى توقتاتامىز دەلىنگەن ءۇشىنشى مالىمدەمە. 2006 جىلى ءمادريدتىڭ باراحاس اۋەجايىندا جاسالعان لاڭكەستىك جارىلىستان سوڭ يسپانيا بيلىگى ولارمەن كەلىسسوزدەردى ءۇزىلدى-كەسىلدى توقتاتىپ, سەپاراتيستەردىڭ كوشباسشىلارىن قۋعىنداۋعا كوشكەن بولاتىن.
بەلگىلى ءانشىنىڭ ءۇيىن ۇپتەپ كەتتى
ماسكەۋدەگى «زولوتىە كليۋچي» دەپ اتالاتىن ەليتالىق تۇرعىن ءۇي كەشەنىندە تۇراتىن ءانشى ۆلاديمير پرەسنياكوۆتىڭ پاتەرىن بەلگىسىز بىرەۋلەر ۇپتەپ كەتىپتى.
كەشە تاڭەرتەڭ ايەلى ناتاليا پودولسكايامەن بىرگە فرانتسياداعى تاۋ شاڭعىسى كۋرورتىنان كەلگەن ۆ.پرەسنياكوۆ ءۇيىنىڭ استاڭ-كەستەڭى شىعىپ, زاتتارى تونالعانىن كورىپ ميليتسياعا جۇگىرگەن. الدىن-الا بەلگىلى بولعان مالىمەتكە قاراعاندا پاتەردەن 200 مىڭ ەۋرو اقشا جانە 300 مىڭ ەۋرونىڭ التىن زاتتارى ۇرلانعان. ءسويتىپ, شىعىننىڭ جالپى كولەمى 500 مىڭ ەۋرونى قۇراپ وتىر.
«ويىننان» وت شىقتى دەگەن وسى
گرۋزيا قورعانىس مينيسترلىگىنىڭ رۋستاۆي قالاسىنىڭ تۇبىندە ورنالاسقان اسكەري بازالارىنىڭ بىرىندە جارىلىس بولىپ, ءۇش اسكەري قازا تاۋىپ, 13 ادام جارالانعان.
بۇل اسكەري بازا جاۋىنگەرلەردىڭ وقۋ-جاتتىعۋ ورتالىعى رەتىندە قولدانىلىپ كەلگەن. كەزەكتى جاتتىعۋعا كەلگەن ءبىرىنشى ارتيللەريالىق بريگادانىڭ مينومەتشىلەر روتاسىنىڭ ويىندارى كەزىندە بولعان وسى جارىلىستىڭ سەبەبىن قورعانىس مينيسترلىگى سناريادتاردى قولدانۋ بارىسىندا جىبەرىلگەن قاتەلىكتەن بولدى دەپ وتىر. وقيعا بويىنشا گرۋزيانىڭ اسكەري پوليتسياسى قىلمىستىق ءىس قوزعاپ, تەرگەۋ جۇرگىزۋدە.
قىلمىسكەر تۇرمەدە وتىرۋى كەرەك
اقش كونگرەسىنىڭ وكىلدەر پالاتاسىنداعى رەسپۋبليكاشىلار پارتياسىنىڭ بۇرىنعى كوشباسشىسى توم ديلزيانى سوت قىلمىستى دەپ تاۋىپ, ءۇش جىلعا باس بوستاندىعىنان ايىردى.
توم ديلزياعا قاراجاتتى جىلىستاتۋ ارقىلى قىلمىس جاساعان, ناقتى ايتقاندا, كورپوراتسيالاردان تۇسكەن 190 مىڭ دوللاردى رەسپۋبليكاشىلاردىڭ تەحاس شتاتىنداعى سايلاۋ ناۋقانىنا جۇمساعان دەگەن ايىپ تاعىلعان بولاتىن. 2005 جىلى باستالعان قىلمىستىق ءىس اياعىنا دەيىن جەتكىزىلىپ, اقىرى سوت ونىڭ قىلمىسىن دالەلدەپ شىقتى.
كومپيۋتەرسىز دامۋ جوق ەكەنىن ۇققانداي
تۇركىمەنستان پرەزيدەنتى گۋربانگۋلى بەردىمۇحامەدوۆ ۇستىمىزدەگى جىلدىڭ 10 قاڭتارىنا دەيىن بارلىق باسشى قىزمەتكەرلەر كومپيۋتەرمەن جۇمىس ىستەي بىلۋلەرى كەرەك دەگەن قاتاڭ تالاپ قويدى.
كەلەسى كەزەكتە پرەزيدەنت قاعازباستىلىقتان ارىلىپ, ەلەكتروندى ۇكىمەتكە كوشۋ كەرەك دەگەندى العا تارتىپ وتىر. بارلىق وقۋ ورىندارىندا كومپيۋتەر كۋرسى جۇرگىزىلىپ, ونى اياقتاعان سوڭ ەمتيحان تاپسىرۋ دا مىندەتتەلسە كەرەك. مۇنداي ءجايتتىڭ وسىدان بەس جىل عانا بۇرىن ينتەرنەتتى جاۋ كورىپ, كومپيۋتەردى كەرەك قىلماعان ەلدە ورىن الىپ وتىرعاندىعى تاڭداندىرادى.
رەسپۋبليكالىق سيمپوزيۋم وتپەي قالدى
تاتار حالقى وزدەرىندە م.ءشايميەۆ باسشىلىعىنىڭ سيپاتتارىن سارالاعان «تاتارستان-2010» اتتى رەسپۋبليكالىق سيمپوزيۋم وتكىزبەكشى بولعان ەدى.
وعان رەسپۋبليكاداعى ساراپشى عالىمدار, ساياساتكەرلەر, تاريحشىلار شاقىرىلىپ تا قويىلعان-تىن. بىراق... بىراق سول سيمپوزيۋم بيلىك تاراپىنان جاسالعان قىسىمنان كەيىن وتپەيتىن بولدى. بۇعان دەيىن تاريحشى ن.گاريفتىڭ حالىق اراسىندا ۇلكەن قىزىعۋشىلىق تۋدىرعان «تاتار حالقىنىڭ ازاتتىق كۇرەسى» اتتى كىتابىن تالقىلاۋعا ارنالعان دوڭگەلەك ۇستەل دە وتكىزىلمەي تاستالعان بولاتىن.
ەۋرووداقتى ويلاندىرماق بولىپ وتىر
فرانتسيادا ورنالاسقان «ورتالىق ازياداعى ادام قۇقىقتارى» اتتى اسسوتسياتسيا ەۋرووداقتىڭ وزبەكستان پرەزيدەنتى يسلام كاريموۆتى بريۋسسەلگە شاقىرعان شەشىمىنە الاڭداۋشىلىق بىلدىرۋدە.
ۇيىمنىڭ جۋرناليستەرگە تاراتقان ءباسپاسوز بايانىندا: «ساپار 31 قاڭتارعا بەلگىلەنىپتى, ال 30 قاڭتار ي.كاريموۆتىڭ تۋعان كۇنى, سوعان قاراعاندا, ەۋرووداق ەڭ قاتال ديكتاتورلاردىڭ بىرىنە جاقسى سىيلىق ازىرلەپ وتىر», دەلىنگەن. ودان ءارى ي.كاريموۆ ەۋرووداق باسشىلارىنىڭ قولىن الۋ قۇرمەتىنە يە بولعان وسى زامانعى ديكتاتورلاردىڭ ىشىندەگى ەڭ العاشقىسى ەكەنى ايتىلعان. ودان ءارى سەگىز تارماقتان تۇراتىن ي.كاريموۆكە تاعىلعان كىنالار تىركەلىپتى.
ينتەرنەت ماتەريالدارى نەگىزىندە ازىرلەندى.