ورنى بولەك ونكۇندىك

شىعىس ايماعىندا ۇلىستىڭ ۇلى كۇنىن مەرەكەلەۋ باستالدى

شىعىس وڭىرىندە ۇلىستىڭ ۇلى كۇنىنە ارنالعان مەرەكەلىك شارالار باستالىپ كەتتى. بيىل التاي مەن الاكول اراسىنداعى اعايىن ناۋرىز مەرەكەسىن اۋقىمدى تۇردە اتاپ ءوتىپ, ۇلىق مەيرام ون كۇنگە ۇلاسپاق. 13 ناۋرىز كۇنى وسى ونكۇندىكتىڭ تۇساۋى كەسىلدى. ءار كۇننىڭ ءوز ۇرانى مەن تاقىرىبى, ورتاق ماقساتى بار. بۇل دۇنيەلەر كوكتەم مەرەكەسىنىڭ بولمىسىن بەينەلەۋگە, جالپى ادامزاتقا ءتان قاسيەت-قۇندىلىقتاردى ناسيحاتتاۋ مەن بەكىتۋگە ارنالعان. ونكۇندىك شەڭبەرىندە وبلىس كولەمىندە 600-دەن استام قوعامدىق ماڭىزى بار شارالار وتكىزۋ جوسپارلانىپ وتىر. ايتالىق, «ىرىس» كۇنىن­دە اۋىلشارۋاشىلىق تاۋار­لارىنىڭ جارمەڭكەسى وتكى­زىلىپ, مەرەكەلىك كونتسەرتتەر ۇيىمداستىرىلدى. وبلىس ورتالىعىنا كۇرشىم اۋدانىنىڭ اۋىل شارۋاشىلىعى تاۋارىن وندىرۋشىلەرى مەن ونەرپازدارى كەلىپ, ءوز ونىمدەرىن ارزان باعامەن ۇسىنىپ, مەرەكەلىك كونتسەرت قويدى. 14 ناۋرىز – «ءداستۇر» كۇنىندە حالىق­تىق قولدانبالى ونەر كورمە­لەرى ۇيىمداستىرىلىپ, شەبەر­لىك ساعاتتارى مەن قولونەر­شىلەرمەن كەزدەسۋ ءوتتى. «جاڭعىرۋ» كۇنىندە مەكتەپ وقۋ­شى­لارى مەن جاستاردىڭ ەلدى مەكەندەردىڭ دامۋىنا ۇلكەن ۇلەس قوسقان, ياعني, «تۋعان جەرگە – تاعزىم!» اكتسياسىنىڭ قاتىسۋشىلارىمەن, ەڭبەك ارداگەرلەرىمەن كەزدەسۋلەر وتكىزۋى جوسپارلانعان. 16 ناۋ­رىز – «كوكتەم شۋاعى» كۇنىن­دە «قىزعالداقتار مەرە­كەسى», جاستار فلەش-موبى, كورمەلەر, بالالار شىعار­ماشىلىعى بايقاۋلارى وتەدى. «قامقورلىق» كۇنىندە سوعىس جانە ەڭبەك ارداگەرلەرىن ناۋرىز مەرەكەسىمەن قۇتتىقتاۋ, قارت ادامداردىڭ شارۋاسىنا قولعابىس ەتۋ, بالالار ءۇيى مەن دارىگەرلىك-الەۋمەتتىك مەكەمەلەرگە بارۋ شارالارى كوزدەلگەن. 18 ناۋرىز – «جاڭارۋ» كۇنى. بۇل كۇنى شىعىسقازاقستاندىقتار سەنبىلىككە شىعىپ, اۋلالار مەن كوشەلەردى تازالاپ, تازالىق جۇمىستارىن جۇرگىزبەك. «جارا­سىم» كۇنىندە وقۋ ورىندا­رىندا كونە مەرەكەلەردىڭ في­لو­سوفيالىق ءمانىن اشاتىن شىعارمالارعا بايقاۋ جاريالانىپ, كىتاپحانالارعا ادەبيەت وكىلدەرى كەلەدى. «قۋانىش» كۇنىندە بارشا ءبىلىم مەكە­مە­لەرى مەن عيماراتتارعا, ورتالىق كوشەلەرگە بەزەندىرۋ جۇمىستارى جۇرگىزىلىپ, دەكو­راتيۆتى-قولدانبالى ونەر كورمەلەرى ۇيىمداستىرىلادى. «شاتتىق» كۇنىندە بۇقارالىق مادەني شارالار لەگى اياسىندا ءان مەن بي بايقاۋى, ايتىس, شىعارماشىلىق وكىلدەرىمەن كەزدەسۋ وتەدى. ال كۇن مەن ءتۇن تەڭەلگەن, شىعىس حالقى ەرەكشە قادىر تۇتاتىن 22 ناۋ­رىز – ۇلىستىڭ ۇلى كۇنى! ۇلىس كۇنىندە ءوڭىردىڭ بارلىق قالالارى مەن اۋداندارىندا ءاز-ناۋرىز نىشاندارى تۇگەلدەي قامتىلعان مەرەكەلىك باعدارلامامەن بىرگە, كوكپار, اۋدارىسپاق, كۇرەس, قىز قۋ, تەڭگە ءىلۋ سياقتى ۇلتتىق سپورت ويىن­دارىنان جارىس­تار, ۇزدىك كيىز ءۇي بايقاۋلارى وتكى­زىل­مەك. جاستارعا ارنالعان «التىباقان», «ايقىش-ۇي­قىش», «اقسەرەك, كوكسەرەك», «القاقوتان» سىندى ۇلتتىق ويىندار دا مەرەكە كوركىن قىزدىرا تۇسەدى. – ناۋرىز مەرەكەسى – بيىل جىل بويى وتەتىن وزگە مەيرامدار سەكىلدى, تاۋەلسىزدىكتىڭ 25 جىلدىعىنا ارنالادى. نەگىزگى ماقسات – ەلىمىزدەگى كەلىسىم مەن بىرلىكتى ارتتىرۋ, جالپىۇلتتىق سانا مەن ورتاق مادەني-رۋحاني قۇندى­لىقتار قالىپتاستىرۋ. جوس­پار بويىنشا, ناۋرىز ايىندا ۇلتتىق ءداستۇر مەن وتباسى قۇن­دىلىقتارىن ساقتاۋ مەن ناسيحاتتاۋعا باعىتتالعان 600-دەن استام ءىس-شارا وتكىزىلەدى, – دەدى وبلىس اكىمىنىڭ ورىنباسارى جاقسىلىق ومار. دۋمان اناش, «ەگەمەن قازاقستان». شىعىس قازاقستان وبلىسى.