جولسەرىك ليانا

استانا مەن قاراعاندىنىڭ اراسىنا قاتىنايتىن «سارىارقا» ەلەكتر پويىزى جولاۋشى قاۋى­مىنا جاسالعان ءتاۋىر سىيدىڭ ءبىرى بولدى. بۇل پويىزدىڭ, ايتا بەرسەڭ, ارتىقشىلىعى كوپ. جو­لاۋشىلار ءۇشىن بارلىق جاع­داي قاراستىرىلعان: جۇمساق ورىن­دىقتار, زاماناۋي اۋا باپ­تاعىش جۇيەسى, تەگىن Wi-Fi قىزمەتى, ەكى تىلدە اقپارات بەرەتىن جۇگىرتپە جول... «قالا ماڭىنداعى تاسىمال» اق-تىڭ قاراعاندى ۋچاسكەسىنە تيەسىلى بۇل ەلەكتر پويىزىندا اعا جولسەرىك بولىپ قىزمەت ەتە­تىن ليانا سابيروۆا سىندى شى­رايلى قارىنداستى بۇل كۇندە جولاۋشىلاردىڭ كوبى تانىپ العان. قاشاندا جىلى جىميىپ, اينالاسىنا نۇر شاشىپ جۇرەتىن يبالى قىز ءوزى جۇمىس ىستەگەن ءۇش جىلدىڭ ىشىندە ۇجىمعا تاس­تاي باتىپ, سۋداي سىڭگەن ەكەن. جو­لاۋشىلاردىڭ دا كوزايىمىنا اينالىپ, كورمەسە ىزدەيتىن قيماس جانىنداي بولىپ كەتكەن... ءومىر شىركىننىڭ كۇتپەگەن جەردەن ۇسىنار توسىن سىيى تاۋ­­سىلعان با؟! جولسەرىك بولۋ ليانا قارىنداستىڭ ءۇش ۇيىقتاسا تۇسىنە دە كىرمەگەن ماماندىق­تىڭ ءتۇرى ەدى. جوعارى وقۋ ورنىن «كوم­پيۋتەر باعدارلاماشىسى» ماماندىعى بويىنشا ءتامامدادى. قولىندا كۇرەكتەي ديپلومى بولسا دا دايىن تۇرعان جۇمىس جوق, ءبىراز ۋاقىت ۇيدە وتىرىپ قالعانى دا راس-تىن. ءوزى ۇيدەگى بالالاردىڭ ۇلكەنى ەدى. ارقا سۇيەيتىن اسقار تاۋ اكە جوق, جالعىز انانىڭ تاپ­قان-تايانعانىنا قاراپ وتىرعان ون ەكى مۇشەسى تۇگەل ساۋ ادام ءۇشىن قاي­بىر جاقسى دەيسىز... راس, اناسى جولسەرىك بولىپ جۇمىس ىستەيتىن. ول كىسى بۇ­رىن­دارى جۇمىس تۋرالى اڭگىمە قوز­عالعاندا «جولسەرىك» دەي بەرسە بولدى, بۇل مۇرىنىن ءشۇيىرۋشى ەدى-اۋ!.. ءيا, بۇرىن ول تەمىرجول سا­لاسىن ەركەكتەر عانا جۇمىس ىستەيتىن قارا دۇرسىندەۋ جەر دەپ ويلايتىن. سويتسە, بۇل جەردە ءوز ءىسىن جان-تانىمەن سۇيەتىن, ادام­نىڭ ءىشى-باۋىرىنا كىرىپ تۇراتىن ەر كوڭىلدى جاندار ەڭ­بەك ەتەدى ەكەن. ەكى-ءۇش رەيسكە شىق­قاننان كەيىن كوڭىلىندەگى كۇدىك پەن قورقىنىش سەيىلگەن. اناسىنىڭ قۋانىشىندا شەك بولمادى. الدىمەن ول كىسى ءوزىنىڭ سۇيىكتى ءىسىن جالعاستىرعانىنا ريزا بولسا, ەكىنشىدەن لياناسىنىڭ ۇجىممەن تەز ارادا ءتىل تابىسىپ كەتكەنىنە قۋاندى. ومىردە كورگەن-تۇيگەنى كوپ, بۇل سالاداعى تاجىريبەسى وتە باي اناسىنىڭ ايتقان اقىل-كەڭەستەرى ءوزىنىڭ كادەسىنە مولىنان جاراعانىن ليانانىڭ ءوزى دە ماقتانىشپەن ايتادى. «ەگەر دە, مەنىڭ قىزىم بولا­شاقتا جولسەرىك ماماندىعىن تاڭدار بولسا قۋانار ەدىم. ءويت­كەنى, بۇل جۇمىس تەك قانا نازىك جاندىلارعا ارنالعان سياقتى بولىپ تۇرادى مەن ءۇشىن», دەپ سىر بولىسەدى ليانا. ليانانىڭ ويىنشا, ايەلدەر قاۋىمى و باستان پسيحولوگ بولىپ جاراتىلعان. ال جولسەرىك ما­ماندىعى ءۇشىن بۇل اۋاداي قاجەت قاسيەت. ادامدارمەن ءتىل تابىسقان ءوز الدىنا, پويىز ۇستىندە, ۆاگون ىشىندە ۇيدەگىدەي جىلىلىقتىڭ ساۋلەسىن سەۋىپ, قۇستىڭ ۇياسىنداي جايلى ەتە ءبىلۋ تەك قانا ايەل زاتىنىڭ قولىنان كەلەتىن ونەر دەپ ەسەپتەيدى ول. ءيا, «بازارعا, قاراپ تۇرسام اركىم بارار» دەمەكشى, بولات جولمەن جۇيتكىگەن پويىزبەن كىمدەر جۇرمەيدى دەسەڭىزشى؟! الۋان ءتۇرلى ادامدار – سىركەسى سۋ كوتەرمەيتىندەر, تىرناق استىنان كىر ىزدەپ وتىراتىندار, اشۋى الدىندا جۇرەتىندەر... ساناي بەرسەڭ ساۋساق جەتپەيدى. مىنە, جاقسى ادامداردىڭ اراسىندا كەزدەسىپ قالاتىن وسىنداي جانداردىڭ ءتىلىن تابۋ ايتقانعا عانا وڭاي. ال ءبىزدىڭ ليانا بولسا, بۇل ءىستىڭ ناعىز شەبەرى بولىپ العان. ونىڭ رياسىز كۇلكىسى, مايدا ءتىلى, ادامعا دەگەن ءىلتيپاتى بولەك. سودان دا بولار, ءوزى جۇمىس ىستەگەن ءۇش جىل ۋاقىت ىشىندە ءبىر دە ءبىر كيكىلجىڭ ساتكە جول بەرمەپتى. العانى – تەك قانا العىس پەن باتا. «جۇمىس بارىسىندا ادام­دارعا ءوزىڭدى دۇرىس كورسەتە ءبىل­گەننىڭ ماڭىزى زور. جولاۋ­شى­لاردىڭ جانىن ءتۇسىنىپ, ءتىلىن تابۋ – ءبىزدىڭ ماماندىقتىڭ باس­تى مىندەتى. پويىز دەگەننىڭ ءوزى تەمىرجولدىڭ ۇستىندەگى ءۇي عوي, ۆاگونىڭىز ۋاقىتشا بولسا دا جانعا جايلى باسپانا ەمەس پە؟! ياعني, شاڭىراقتاعى شۋاقتى ساق­تاي ءبىلۋ تەك ايەل بالاسىنىڭ عانا قولىنان كەلەدى», – دەگەن ليانانىڭ سوزىمەن كەلىسپەسكە تاعى بولمايدى. ليانا جۇمىستان بوس كەزىندە جاتتىعۋ زالىنا بارىپ, ءوزىن كۇ­تىپ ۇستاۋعا كوپ كوڭىل بولەدى. ءسان ۇلگىلەرىن سارالاپ, كوسمەتيكا الەمىندەگى جاڭالىقتاردى دا قۇر جىبەرمەي تانىسىپ وتىرادى. جۇمىستىڭ تالابى سونداي – ۇنەمى سىمداي تارتىلىپ, سىمباتتى بولىپ ءجۇرۋ كەرەك! قايرات ءابىلدينوۆ, «ەگەمەن قازاقستان».  قاراعاندى.