ازيادا جارشىسى
كۇتكەن كۇن
كەشە ءال-كۋۆەيت قالاسىندا ازيادا الاۋى تۇتاندى
استانا ۋاقىتى بويىنشا ساعات 15.00-دە ازيا وليمپيالىق كەڭەسىنىڭ شتاب-پاتەرى ورنالاسقان ءال-كۋۆەيت قالاسىنىڭ «كۋۆەيت-تاۋەرس» مۇناراسىنىڭ الدىنداعى الاڭدا ەلىمىزدە العاش رەت وتەتىن VII قىسقى ازيا ويىندارىنىڭ الاۋى سالتاناتتى تۇردە جاعىلدى. وعان تۋريزم جانە سپورت ءمينيسترى تەمىرحان دوسمۇحامبەتوۆ پەن ازيا وليمپيالىق كەڭەسىنىڭ پرەزيدەنتى شەيح احمات ءال-فاحاد اس-ساباح قاتىستى. سالتاناتتى شارا «سازگەن سازى», «گۇلدەر» انسامبلدەرىنىڭ جانە « ۇلىتاۋ» توبى مەن كۋۆەيتتىك شىعارماشىلىق ۇجىمداردىڭ كونتسەرتتىك باعدارلاماسىمەن باستالدى. وسىدان كەيىن ازيا وليمپيالىق كەڭەسىنىڭ پرەزيدەنتى مەن الاۋدى تۇتاندىرۋ سالتاناتىنا قاتىسۋعا كەلگەن قازاقستاندىق دەلەگاتسيانىڭ باسشىسىنا ءسوز بەرىلدى. ازيادانىڭ ءمان-ماڭىزى مەن ونىڭ حالىقتار اراسىنداعى دوستىقتى نىعايتۋعا, قوعامدا سالاماتتى ءومىر سالتىن قالىپتاستىرۋداعى اتقاراتىن ءرولى تۋرالى جان-جاقتى بايانداعان سوڭ اوك پرەزيدەنتى قىسقى ازيادانىڭ الاۋىن تۇتاندىرىپ, ونى تۋريزم جانە سپورت ءمينيسترى ت.دوسمۇحامبەتوۆكە تابىس ەتتى. ودان كەيىن دەلەگاتسيا باسشىسى الاۋدى مانەرلەپ سىرعاناۋشى وتانداسىمىز ابزال راحىمعاليەۆكە تابىس ەتتى. ابزال الاۋدى قابىلداپ العان سوڭ ونى كۋۆەيت سپورتشىسىنا, ول الاۋدى ءارى قاراي قىسقى ازيا ويىندارىن ءوز ەلدەرىندە قابىلداعان وڭتۇستىك كورەيا وكىلىنە تاپسىردى. سودان كەيىن الاۋ رەت-رەتىمەن قىتاي جانە جاپونيا سپورتشىلارىنىڭ قولدارىنا ءوتتى. وسىناۋ شاعىن ەستافەتا «استانا» ۆەلوكومانداسىنىڭ ءمۇشەسى اسان بازاەۆقا كەلىپ تۇراقتادى. بۇگىن الاۋ الماتى قالاسىنا توتەنشە جاعدايلار مينيسترلىگىنىڭ قۇزىرىنداعى «تۋ-154» ۇشاعىمەن الماتىعا جەتكىزىلەدى. وسى كەزدەن باستاپ ازيادا الاۋىنىڭ ەل ىشىندەگى ساياحاتى باستالادى. الاۋگەرگە 6 ساقشى مەن 13 كولىكتەن قۇرالعان كولوننا ىلەسىپ جۇرەتىن بولادى. داستان كەنجالين. «شىمبۇلاق» تاۋ شاڭعىسى كۋرورتى الماتى, الاتاۋ باۋرايى قازاققا الاتاۋداي ابىز اتا تاۋدى بەرگەن تاڭىرگە راحمەت. ونىڭ قويناۋى مەن قونىشى, قۇزار بيىگى مەن كولبەۋ بەتكەيى, كوز جاۋىن الار سۇستى دا سۇلۋ تابيعاتى, قارلى قىسى, جازعى ساباتى, كاۋسار اۋاسى – نيەتىنە شىنىمەن دە قۇداي بەرگەن حالىقتىڭ قازىناسى. اتا تاۋدىڭ ەر جەتىپ, بوي تۇزەگەن ءبىر-ءبىر وتاۋىنداي مەدەۋ مەن شىمبۇلاق بۇل كۇندە اتى الەمگە جايىلىپ, ماقتانىشىمىزعا اينالىپ وتىر. ەندى ءبىر ءسات شىمبۇلاقتىڭ شىنايى قاسيەتىن ايعاقتايتىن كورسەتكىشتەرگە زەر سالايىقشى. تالعار اسۋىنان تومەنگە قاراي سپورتتىق قۇلديلاۋ تراسساسىنىڭ ۇزىندىعى 3500 مەتر, سلالوم-گيگانتتىڭ ۇزىندىعى 1500 مەتر. شاڭعى جولىنىڭ ورتاشا ەنى 25 مەتر بولسا, كولبەۋلىگى 11-29 گرادۋسقا تەڭ. ناق وسى سيپاتتارى سپورتشىلاردىڭ ونە بويى بارىنشا جوعارى جىلدامدىقتى ورىستەتۋىنە ءمۇمكىندىك بەرەدى. شاڭعى الاڭىنىڭ ديرەكتورى اسان جاۋىنعاروۆ شىمبۇلاق قارىنىڭ سىرعاناعىشتىق قاسيەتىنە نازارىمىزدى اۋداردى. دۇنيە جۇزىندەگى «ەڭ جىلدام قار» وسىندا ەكەن. ون شاقتى جىل بۇرىن فرانتسيادان كەلگەن ساراپشىلار دا وسىنداي باعا بەرىپ كەتىپتى. نەگە دەسەڭىز, ەۋروپا جانە امەريكا ەلدەرىندەگى تاۋ شاڭعىسى الاڭدارى ورنالاسقان وڭىرلەر مۇحيت-تەڭىزدەرگە جاقىن جاتىر. ال, الاتاۋ جايقىن سۋدان الىستا. سوندىقتان, ول جاقتىڭ قارىندا ىلعال كوبىرەك تە, بىزدىكىندە ازىراق. سول سەبەپتەن دە شىمبۇلاقتىڭ قارى سۋسىمالى, سىرعاناعىش بولىپ كەلەدى. وسىنداي بارلىق سيپاتتامالارى جاعىنان ستاندارتقا ساي بولعاندىقتان, «شىمبۇلاق» ءدۇنيە جۇزىندەگى تاۋ شاڭعىسى كۋرورتتارىنىڭ ىشىندە ەڭ تاڭداۋلى ۇشتىككە كىرەدى. البەتتە, ءار جىلداردا مۇندا جارىس وتكىزۋ جاعدايى جاقسارتىلىپ, كوركەيتۋ جۇمىستارى جۇرگىزىلىپ وتىردى. اسىرەسە, ازيادا قارساڭىندا ەلباسى پارمەنىمەن ۇلكەن قارجى ءبولىنىپ, شىمبۇلاعىمىز عالامات وزگەرىستەرگە ۇشىرادى. بۇرىنعى شاڭعى جولدارى قاۋىپتى بولاتىن. سونىڭ بارىندە قاۋىپسىزدىك شارالارى اتقارىلدى. ول نە دەسەك, كوشكىن جولىنداعى تراسسالار ستاندارتقا سايكەستەندىرىلدى. ولاردى جاعالاي قار زەڭبىرەكتەرى ورناتىلدى. شاڭعى جولىنداعى ءۇيىندى تاستار الىنىپ تاستالدى. ەنسىز, تار شاڭعى جولدارى بۇرىنعى 10 مەتردەن 100-180, كەيبىر جەرلەردە 200 مەترگە دەيىن كەڭەيتىلدى. ءسويتىپ, شىمبۇلاقتىڭ قولدانىستاعى بەتكەيلەرى قايتا باعدارلانىپ, تراسسالار جوسپارلانىپ, سونداي-اق جاڭا بەتكەيلەر يگەرىلگەندىكتەن, سىرعاناۋ اۋماعى ۇلعايىپ, ونىڭ جالپى ۇزىندىعى 30 شاقىرىمنان اسىپ ءتۇستى. ياعني, بۇل بۇرىنعى ەسكى كورسەتكىشتەن التى ەسە ارتىق دەگەن ءسوز. «شىمبۇلاق» تاۋ شاڭعىسى بازاسىنىڭ باس ديرەكتورى, قازاقستان تاۋ شاڭعىسى سپورتى فەدەراتسياسىنىڭ پرەزيدەنتى ەسەت ەشپانوۆ حالىقارالىق شاڭعى سپورتى فەدەراتسياسىنىڭ وكىلدەرى شىمبۇلاقتا بولىپ, تراسسالارعا گومولوگاتسيا ءجۇرگىزگەنىن, ياعني تەحنيكالىق جاي-كۇيىن تەكسەرگەنىن ايتادى. وسى رەتتە بارلىق شاڭعى جولدارى تالاپقا ساي بولىپ شىعىپ, ءتيىستى حالىقارالىق ستاندارتتار بويىنشا ءتورت بىردەي سەرتيفيكات العان. مۇنىڭ ءوزى شىمبۇلاقتىڭ الەمدىك دەڭگەيدەگى اسا ءىرى حالىقارالىق جارىستاردى, ەڭ الدىمەن, 2011 جىلعى قىسقى ازيا ويىندارىن وتكىزەتىن نىساندى ورىن رەتىندە تاڭدالۋىنا بىردەن ءبىر نەگىز بولىپ تابىلدى. جارىستار ءجيى ءوتىپ, اۋەسقوي سەيىل-سەرۋەنشىلەر, شاڭعىشى تۋريستەر كوپ شوعىرلاناتىن شىمبۇلاق سياقتى جەردە, جاڭا ايتقانىمىزداي, قار كوشكىندەرىنىڭ الدىن الىپ, شاڭعى تەبۋشىلەردىڭ قاۋىپسىزدىگىن قامتاماسىز ەتۋدىڭ ماڭىزى زور. سول ءۇشىن شەتتەن وسى زاماندىق قۇرال-جابدىقتار ساتىپ الىنىپ, ولار توتەنشە جاعدايلار جونىندەگى ءتيىستى قىزمەتتەردىڭ پايدالانۋىنا بەرىلگەن كورىنەدى. وسىناۋ قۇرىلعىلاردىڭ ارقاسىندا ماماندار الدىن الۋ ماقساتىندا جۇيەلى تۇردە كوشكىن شاقىرىپ تۇرادى. مۇنىڭ ءوزى سىننان وتكەن قاۋىپسىزدىك شاراسى, دەيدى. ازيادا قارساڭىندا جاسالعان ءبىر عاجايىپ «مەدەۋ» كەشەنىنەن «شىمبۇلاق» تاۋ شاڭعىسى كۋرورتىنا تارتىلعان اسپالى جول, عالامات جوبانىڭ ىسكە قوسىلۋى دەر ەدىك. ەندى الماتى قالاسىنىڭ تۇرعىندارى مەن قوناقتارى قاۋىپسىز ءارى جايلى كابينالاردا, تاۋدىڭ كوركىن تاماشالاي وتىرىپ, «مەدەۋ» بەكەتىنەن شىمبۇلاققا بار بولعانى 14 مينوتتە جەتىپ بارادى. تۋريستەردىڭ قۇدايى بەرىپ, كۋرورت قوناقتارى كوبەيگەلى تۇر. بۇل جايت سونىمەن بىرگە ەلدە سالاماتتى ءومىر سالتى مەن سپورتتىڭ دامۋ الەۋەتىن كۇشەيتە تۇسپەك. تابيعات قويناۋىنا كىرەتىن اۆتوكولىك تاسقىنى تولاس تابۋىنا وراي ەكولوگيالىق تازالىققا جول اشىلماق. اۆستريانىڭ «دوپپەلمايەر» فيرماسى جاساعان وسىناۋ «مەدەۋ-شىمبۇلاق» اسپالى گوندولا جولىنىڭ ۇزىندىعى 4572 مەتر. الەمدىك دەڭگەيدەگى وسىنداي ءۇشىنشى جول. مۇنداعى 114 كابينانىڭ ارقايسىسىنا سەگىز كىسىدەن وتىرا الادى. سەكونتىنە 6 مەتر جۇمىس جىلدامدىعىمەن ەسەپتەگەندە, ءبىر ساعاتتا 2 مىڭ جولاۋشىنى تاسىپ ۇلگەرەدى. اتالمىش بولات ارقاندى اسپالى جول قوسىمشا كوپتەگەن پايدالى جۇيەلەرمەن جابدىقتالعان. ساپا مەن قاۋىپسىزدىكتىڭ بارلىق ەۋروپالىق تالاپتارىنا ساي. كۋرورتقا كەلۋشىلەردىڭ كوڭىلىنەن شىعۋ ءۇشىن تومەنگى «مەدەۋ» بەكەتىنىڭ جانىندا 100 ورىندىق اۆتوكولىك تۇراعى جاساقتالعان. «شىمبۇلاقتان» جوعارى قاراي ورتاڭعى بەكەتكە جانە تالعار اسۋىنا جەتۋ ءۇشىن بازانىڭ وزىندەگى بارلىق كوتەرگىشتەر نەعۇرلىم وسىزاماندىق جانە سىيىمدى قوندىرعىلارمەن اۋىستىرىلدى. ءسويتىپ, يتالياندىق «Leitner» فيرماسىنىڭ وسىزاماندىق قۇراندى اسپالى جولى ورناتىلدى. مۇنداعى جالپى ۇزىندىق ءتورت شاقىرىمنان اسادى. مۇندا دا ساعاتىنا 2 مىڭ جولاۋشى تاسىمالدانادى. 6-8 كىسىلىك كابينالار, 4 كىسىلىك اشىق ورىنتاقتار ءبىر-بىرىمەن الماسىپ وتىرادى. سونداي-اق كۋرورت اۋماعىندا جاڭا عيمارات بوي كوتەردى. وندا 2 مىڭنان استام ادامعا ارنالعان جۇك ساقتاۋ ورنى جايعاسقان, اسحانا, ءدامحانا مەن مەيرامحانالار, سپورت دۇكەنى جانە باسقالارى بار. ءباسپاسوز ورتالىعىنىڭ زالى, مەديتسينالىق كومەك كورسەتۋ بولمەلەرى دە جابدىقتالعان. اتالعان جايلاردىڭ ءبارى تاۋ شاڭعىشىلارىنا عانا ەمەس, دەمالۋشىلار ءۇشىن دە تاماشا جاعدايلار تۋعىزاتىنى انىق. ناق وسى ارادا شىمبۇلاقتى كەشەندى دامىتۋ جوباسىنا جۇمسالعان ينۆەستيتسيانىڭ جالپى كولەمى 200 ميلليون اقش دوللارىن قۇراعاندىعىن ايتا كەتكەن دە ءجون شىعار. سپورتتىق جاعىنا كەلەر بولساق, ازيادا جارىستارىنا تورەشىلىك ەتەتىن قازىلار القاسى دايىن. تەحنيكالىق دەلەگاتتار ەرتە باستان بەلگىلەنىپتى. شىمبۇلاقتا سپورتتىڭ ءۇش تۇرىنەن جارىستار وتپەكشى. اتاپ ايتقاندا, الاتاۋ باۋرايىندا سپورتشىلار شاپشاڭ قۇلديلاۋدان, سۋپەر-گيگانتتان جانە سۋپەر-كومبيناتسيادان كۇش سىناسادى. وسى ءۇش ءتۇردىڭ ءوزى ەرلەر جانە ايەلدەر بولىپ بولىنگەندە مەدالداردىڭ التى جيىنتىعى باسكە تىگىلگەن. ياعني, التى التىن, التى كۇمىس جانە التى قولا. ەسەت ەشپانوۆتىڭ ايتۋىنا قاراعاندا, ءبىزدىڭ زاكۋرداەۆ, كوشكين, ۆورونوۆ سياقتى سايىپقىراندارىمىز كەمىندە ەكى نەمەسە ءۇش التىن الادى دەپ جوسپارلى تۇردە كۇتىلۋدە. ولاي بولسا, ەسەتتىڭ اۋزىنا ماي. ال ەندى ازيادا ءوتىپ بولعان سوڭ «شىمبۇلاق» سىندى جاۋھارىمىز بۇكىل ازيا ءۇشىن قىسقى ءتۋريزمنىڭ جانە تاۋ شاڭعىسى سپورتىنىڭ الەمگە ايگىلى ورتالىعىنا اينالماقشى. قورعانبەك امانجول, سۋرەتتەردى تۇسىرگەندەر بەرسىنبەك سارسەنوۆ, يۋري بەككەر.«ادەمى-اي» جاساعان كادەسىيلار
قازاق حالقى قولونەردى ەرتە زاماننان بەرى قاستەرلەپ, قادىرلەي بىلگەن حالىق. قازىرگى تەحنولوگيا جەتىستىكتەرىنە كوز ىلەسپەيتىن جاھاندانۋ كەزىندە ون ساۋساعىنان ونەر تامعان شەبەرلەردىڭ كوز مايىن تاۋىسىپ جاساعان قولونەرىنىڭ الاتىن ورنى ەرەكشە. بۇگىندە قاي جەرگە بارساڭىز التىن-كۇمىس, قولا مەن مىستان, تەرى مەن اعاشتان جاسالعان وسىنداي بىرەگەي دۇنيەلەر جوعارى سۇرانىسقا يە. جۋىردا ءبىز وسىنداي كونە زاماننان بەرى اتادان بالاعا ۇلاسىپ كەلە جاتقان ۇلتتىق ءداستۇرىمىزدى حالىققا تانىستىرىپ, ونى كەڭىنەن ناسيحاتتاپ جۇرگەن «ادەمى-اي» جشس باس ديرەكتورى باھارگۇل تولەگەنقىزىمەن كەزدەسىپ, اڭگىمەگە تارتقان ەدىك. اڭگىمەمىز ازيا ويىندارىنا ارنالعان كادەسىيلار مەن جالپى زەرگەرلىك بۇيىمداردى جاساۋدىڭ ماڭىزى تۋراسىندا بولدى. – الدىمەن ءوزىڭىز تۋرالى, سودان كەيىن بۇل جۇمىستى قولعا العانىڭىزعا قانشا ۋاقىت بولعانىن ايتساڭىز. – 1994 جىلى قىتايداعى بەيجىڭ مەملەكەتتىك ۋنيۆەرسيتەتىن بىتىرگەن سوڭ, ءبىلىمىمدى جەتىلدىرۋ ماقساتىندا اتاجۇرتقا كەلىپ, 1997 جىلعا دەيىن ءوز ماماندىعىم – بيولوگيا سالاسى بويىنشا عىلىمي جۇمىسپەن اينالىستىم. سول كەزدە ديسسەرتاتسيا جازۋعا دايىندىق بارىسىندا قازاقستانداعى ەجەلگى قولدانبالى ونەردى زەرتتەۋگە بەت بۇرىپ, وسى سالانىڭ كوللەكتسيونەرلەرىمەن بايلانىس ورناتتىم. جالپى, مەن جىلدار وتكەن سايىن باعاسى وسە بەرەتىن زەرگەرلىك جانە تۇرمىستىق بۇيىمداردى جيناۋمەن بەيجىڭ مەملەكەتتىك ۋنيۆەرسيتەتىندە وقىپ جۇرگەن كەزىمدە اينالىسا باستاعانمىن. سول كەزدە قىتاي يمپەراتورلارىنىڭ سارايلارىن ارالاپ, وندا جيناقتاعان كونە بۇيىمداردى, جادىگەرلەردى تاماشالاپ, ءتانتى بولاتىنمىن. ەلگە ورالعان سوڭ: «بىزگە نەگە ءوز ۇلتىمىزدىڭ شاشىراپ جاتقان بايلىعىن جيناستىرماسا؟» دەگەن وي كەلدى. ءسويتىپ, ۇلتتىق قۇندىلىقتارىمىزدى جاس ۇرپاققا جەتكىزۋ, انتيكۆاريات دۇنيەلەرىن جيناۋ ارقىلى قازاقتىڭ قول ونەرىنىڭ باعا جەتپەس بايلىقتارىن شەتەلگە تانىستىرۋ ماقساتىندا 2000 جىلى «ادەمى-اي plus» جشس قۇردىم. ال 2002 جىلى «ادەمى» ونەر ءۇيىن اشتىم. – العاشقى جاساعان كادەسىيلارىڭىز, بۇيىمدارىڭىز نە ەدى؟ – ءبىزدىڭ دۇكەندەردىڭ سورەلەرىندە ورىستىڭ ماترەشكاسى, قىتايدىڭ فەن-ءشۋيى, ءۇندىنىڭ باقا-شاياندارى قاپتاپ تۇرعاندا, نەگە ءوز ۇلتىمىزدىڭ باعالى جادىگەرلەرى جارقىراپ تۇرمايدى دەگەن ويمەن اۋەلى حالقىمىزعا ءبىر-بىرىنە سىي رەتىندە ۇسىنۋعا بولارلىقتاي, ءوز ەلىمىزدىڭ ازاماتتارىنا ۇلتىمىزدىڭ باعا جەتپەس بايلىقتارى بار ەكەندىگىن كورسەتۋ ءۇشىن ۇلتتىق كادەسىيلار جاساۋدى قولعا الدىم. ءبىرىنشى بولىپ ەلدىگىمىزدى, ۇلتتىعىمىزدى تانىتاتىن «ءبايتەرەك», «قازاق ەلى», «تاۋەلسىزدىك» مونۋمەنتتەرىنىڭ كىشىرەيتىلگەن تۇرلەرىن جاسادىق. ودان كەيىنگى قىزىلورداداعى قورقىت اتا, ءتۇركىستانداعى قوجا-احمەت ياساۋي كەسەنەلەرىنىڭ, التىن ادام, ابىلاي حان, اباي, بايدىبەك, يساتاي-ماحامبەت, ناۋرىزباي باتىر, قاراساي باتىر ەسكەرتكىشتەرىنىڭ ماكەتتەرى جاسالدى. – كومپانيانىڭ اتىن كادەسىيلاردىڭ, بۇيىمداردىڭ ادەمى بولۋى ءۇشىن قويدىڭىز با؟ – جوق. ادەمى دەگەن قىزىمنىڭ اتى. (كۇلەدى) – وسى كەزگە دەيىن قانشا كادەسىيلار جاسالىپ, ساۋداعا قويىلدى؟ – مەنىڭ كادەسىيلاردان بولەك جيناعان كوللەكتسيالارىم 5 مىڭنان استام. ولاردىڭ ءبارى ەڭ كونە قازاق جادىگەرلەرى. كادەسىيلارىمىز دا وتە كوپ. ولار ونەر ۇيىندە ساتىلۋدا. ءبىز كەزىندە ءاربىر ءجادىگەردىڭ تولقۇجاتىن ءراسىمدەپ, ادىلەت مينيسترلىگىنەن ارنايى پاتەنت العان بولاتىنبىز. قازىر ءشۇكىر, حالىق ۇلتتىق ناقىشتاعى كادەسىيلاردى ىزدەپ ءجۇرىپ ساتىپ الاتىن جاعدايعا جەتتى. مىسالى, اسىق پەن جاۋىرىن مۇسىندەرى, اتتىڭ ەرتوقىمى, ۇلتتىق ويىندارعا قاتىستى دۇنيەلەر حالىقتىڭ سۇرانىسىنا يە. سونىڭ ىشىندە ەڭ ءوتىمدىسى «الشىسىنان تۇسكەن اسىق» كادەسىيى. – جاقىن ارادا ەلىمىزدە ازيا ويىندارى باستالادى. سوعان ءسىزدەردىڭ رەسمي ءارىپتەس بولعاندارىڭىزدى بىلەمىز. ازياداعا قانداي كادەسىيلار جاسادىڭىزدار؟ – ازياداعا ءوز ونىمدەرىمىزدى ۇسىنۋ ءبىز ءۇشىن ازاماتتىق پارىز, ۇلكەن ءدارەجە بولسا, ەكىنشى جاعىنان كومپانيانىڭ تاعى ءبىر ساتىعا كوتەرىلگەنى دەپ بىلەمىز. ازيادا – قازاقستان ءۇشىن ەكى كۇننىڭ بىرىندە بولاتىن قاتارداعى شارا ەمەس. الەمدە ءالى ەشقاشان مۇنداي كەشەندى جارىستاردى وتكىزبەگەن ەلدەر قانشاما. وسى ۇلكەن جاۋاپكەرشىلىكتى ءبىز دە بارىنشا سەزىنۋدەمىز. ءبىزدىڭ كومپانيا اۋەلى ازياداعا جارتى جىل بۇرىن 30-عا جۋىق ويىن كادەسىيلارىن دايىنداعان بولاتىن. قازىر ولاردىڭ سانى اناعۇرلىم ارتتى. ازياداعا ارناپ التىننان اپتالعان, كۇمىستەن كۇپتەلگەن, قولادان قۇيىلعان جۇزدەن اسا مەدالدار جاسادىق. سودان كەيىن الاۋ ەستافەتاسىنىڭ اتريبۋتتارىن دا جاساپ قويدىق. استانانىڭ قازىرگى اكىمى يمانعالي تاسماعانبەتوۆ بىزگە وسى ءىستى جاساۋ تۋرالى ۇسىنىس ايتقان ەدى. سونى ءبىز ساق داۋىرىندەگى شىراعداننىڭ نەگىزىندە بارىس جانە باسقا دا جان-جانۋاردىڭ بەينەسىندە جاساپ شىعاردىق. سونىمەن بىرگە, ازيا ويىندارى وتەتىن جەرلەردىڭ مينياتيۋرالارى دا دايىندالدى. سولاردىڭ ءبىرى 24 كاراتتى التىن جالاتىلعان «مەدەۋ» مۇز ايدىنى ءالى ەشقاشان ءدال وسىنداي بۇيىم رەتىندە اشىق ساۋداعا ءتۇسىپ كورمەگەن. بالۋان شولاق اتىنداعى سپورت سارايى كۇنى كەشە كۇردەلى جوندەۋدەن وتكەنى بەلگىلى. ونىڭ ەندىگى اپپاق قارداي كەلبەتى دە ءبىزدىڭ ازيا ويىندارىنا تارتۋ ەتكەن شاشۋلارىمىزدىڭ ءبىرى. ال جاڭاعى ايتقان ازيادا مەدالدارى تازا حرۋستالدان دا جاسالعان. پارامەترلەرى ازيادانىڭ بارلىق تالاپتارىنا ساي مەدالدار كوزدىڭ جاۋىن الادى. جارىستىڭ رەسمي بويتۇمارى تاۋدىڭ تەك ەڭ بيىگىندە جۇرەتىن, الاتاۋدىڭ ءتۇز تاعىسى ىلبىسىنە كادەسىيلار ۇسىنىپ وتىرمىز. سونداي-اق بىزدە ازيادا الاۋى مەن بەلگىسى بەينەلەنگەن كۇندەلىكتى تۇرمىستا قاجەت تاقيا, فۋتبولكا, جولدوربا, بەلدىك پەن فلەشكالار بار. الداعى كەزدە وسى از ەمەس كوللەكتسياعا سپورتشىلاردىڭ ءمۇسىنى, باسقا دا ازيادا نىساندارىنىڭ كورىنىسى, تۇعىرداعى ۇلتتىق جالاۋلار ۇسىنىلادى. ءبىزدىڭ زاتتار تەك قالتاسى قالىڭ قالا تۇرعىندارى مەن قوناقتار ءۇشىن عانا ەمەس, قوعامنىڭ بارلىق مۇشەلەرىنە ءتيىستى باعالىق دياپازوندا جاسالعان. – كومپانيادا نەشە ادام جۇمىس ىستەيدى؟ – وتىزدان استام. ولار بەلگىلى سۋرەتشىلەر, مۇسىنشىلەر. مەن ولارعا كادەسىيدىڭ ءتۇرىن, ۇلتتىق ناقىشتاعى بۇيىمدى قاعازعا سىزىپ بەرەمىن, ولار سونى جاسايدى. قازىر ازياداعا ارنالعان 70-تەن استام كادەسىي بار. ولار استانا مەن الماتىنىڭ ساۋدا ۇيلەرىندە, قوناق ۇيلەرىندە, اۋە جايدىڭ بۋتيكتەرىندە تاراتىلۋدا. بىزگە وسى جاعىنان قالا اكىمدەرى كومەكتەسۋدە. مىسالى, استاناداعى «سارىارقا» ويىن-ساۋىق ورتالىعىندا ازياداعا ارنالعان پاۆيلون اشىلدى. ءبىز ول جەرگە 15 ملن. تەڭگەنىڭ ءونىمدەرىن بەرىپ وتىرمىز. استانادا اۋەزوۆ-كەنەسارى كوشەلەرىنىڭ قيىلىسىندا, اۋىل شارۋاشىلىعى مينيسترلىگى عيماراتىنىڭ جانىنداعى بيزنەس ورتالىقتىڭ ەكىنشى قاباتىندا كەڭسەمىز دە بار. ءبىزدىڭ جاساعان ونىمدەرىمىز ساپالى, مەدالدارىمىز سىنبايدى. ولار مىڭ جىل بولسا دا ءتۇرىن وزگەرتپەي تۇرادى. ءبىراز ادامدار ازيادا بويتۇمارى بارىستى كەيبىرەۋلەر تىشقانعا ۇقساتىپ جاساعان دەيدى. ال بىزدىكىن كىشكەنتاي بالالاردىڭ وزدەرى كورگەندە: «وي! قانداي سۇيكىمدى بۇل بارىس», دەپ قۇشاقتاپ الادى ەكەن. – وزگە ۇلت وكىلدەرى سىزدەردىڭ ۇلتتىق ناقىشتاعى كادەسىيلارىڭىزعا, جادىگەرلەرىڭىزگە قىزىعا ما؟ مىسالى, دومبىرا ۇستاپ, ۇلتتىق كيىم كيگەن بارىسقا. شىنىڭىزدى ايتىڭىزشى. – كوبىنەسە قازاق جىگىتتەرى ساتىپ الادى. سوسىن شەتەل قوناقتارىنىڭ ازيادا كادەسىيلارىنا قىزىعاتىنىن كورىپ ءجۇرمىن. – الدا قانداي جوسپارىڭىز بار؟ – الماتىدا شەۆچەنكو مەن بايزاقوۆ كوشەلەرىنىڭ قيىلىسىندا ونەر مۇراجايىن اشۋدى جوسپارلاپ وتىرمىن. اڭگىمەلەسكەن داستان كەنجالين.