العىس ايتۋ كۇنى – بىرلىگى مەن تاتۋلىعى جاراسقان قازاقستان حالقىن ودان ءارى جاقىنداستىرا تۇسۋگە, ءبىر ەل, ءبىر مۇددە جولىندا ەڭبەك ەتۋگە جۇمىلدىراتىن اتاۋلى مەيرامعا اينالدى. ەلىمىزدە العاش رەت تويلانىپ وتىرعان بۇل مەرەكە ۇلتتار تاتۋلىعىن بەكەمدەپ, ەل بىرلىگىن ساقتاۋ ماقساتىندا جۇزەگە اسىرىلعان.
وسىعان وراي ەلىمىزدىڭ بارلىق ايماقتارىنداعىداي, استانا جۇرتشىلىعى دا ەلىمىزدە تىنىشتىق پەن ۇندەستىك, ءوزارا سەنىمدىلىك پەن بارلىق قازاقستاندىقتارعا دەگەن قۇرمەتتىڭ ورنىعۋىنا نەگىز بولعان پرەزيدەنتتىڭ بەيبىتشىلىك پەن كەلىسىم ساياساتىنىڭ سالتاناتتى كۇنى بولعان ايتۋلى مەرەكەنى شادىمان شاتتىقپەن اتاپ ءوتتى.
ەلورداداعى ۇلتتىق مۋزەيدە العىس ايتۋ كۇنى مەرەكەسىنە وراي «ءبىر شاڭىراق استىندا» اتتى قازاقستان حالقى فەستيۆالى ءوتىپ, ءىس-شارا بارىسىندا ەتنومادەني داستۇردە جاسالعان بالالار شىعارماشىلىعى ورتالىقتارى مەن مەكتەپ وقۋشىلارىنىڭ قولونەر جۇمىستارىنىڭ جارمەڭكەسى ۇيىمداستىرىلدى. اتالمىش فەستيۆال اياسىندا استانا قالاسىنىڭ ورتا جانە مۋزىكالىق مەكتەپتەرىنىڭ وقۋشىلارى مەرەكەلىك كونتسەرت ۇسىنىپ, جينالعان جۇرتشىلىققا ءوز ونەرلەرىن تارتۋ ەتتى.
سونىمەن قاتار, ۇلتتىق مۋزەيدە العىس ايتۋ كۇنىنە وراي «مۋزەي كىتاپحاناسىنا كىتاپ سىيى» اكتسياسى ءوتىپ, اكتسيا ۇلتتىق مۋزەيدىڭ عىلىمي كىتاپحاناسىنا تۇراقتى قولدانۋ ءۇشىن تاريح, ارحەولوگيا, ەتنوگرافيا, مادەنيەتتانۋ, رەستاۆراتسيا, مۋزەيتانۋ جانە باسقا باعىتتار بويىنشا كىتاپتار, ماقالالار جيناعى, كونفەرەنتسيا ماتەريالدارى, مونوگرافيالاردى تابىستاۋعا شاقىردى.
اتالعان ءىس-شارالاردىڭ اشىلۋىندا ءسوز العان ۇلتتىق مۋزەي ديرەكتورىنىڭ ورىنباسارى جاكەن تايماعامبەتوۆ ءبۇگىنگى ايتۋلى كۇننىڭ ەرەكشەلىكتەرىنە توقتالدى. سونىمەن قاتار, قيلى كەزەڭدەردە قازاقستانعا قونىس اۋدارعان كوپتەگەن ۇلتتاردىڭ بۇگىنگى بەرەكەلى ءومىرىن تىلگە تيەك ەتتى.
– ناۋرىز ايىنىڭ العاشقى كۇنىن مەرەكەمەن قارسى الىپ جاتىرمىز. وسىنىڭ ءبارى ىنتىماق پەن بىرلىگىمىزدىڭ سەبەبىنەن كەلىپ شىعىپ وتىر. وتكەن جىلى قازاقستان حالقى اسسامبلياسىنىڭ 20 جىلدىعىن اتاپ وتتىك. العىس ايتۋ كۇنى سونىڭ جالعاسى دەسەك بولادى. كەشەگى قيلى كەزەڭدەردە قازاق دالاسىنىڭ دارحاندىلىعىن تالاي ۇلتتار كوردى. بۇگىن ول جىلدار ارتتا قالدى. ونىڭ ءبارى ارقايسىسىمىزدىڭ ەسىمىزدە, جادىمىزدا. ۇيىمداستىرىلىپ وتىرعان وسىناۋ جيىن ۇلتتىق مۋزەيدىڭ بۇگىنگى مەرەكەگە تارتۋى دەپ قابىل الىڭىزدار, – دەدى ج.تايماعامبەتوۆ.
حالىقارالىق تۇركى اكادەمياسىنىڭ عالىم-حاتشىسى امانتاي ءشارىپ قازاقستاننىڭ بۇگىنگى تۇراقتىلىعى مەن قاۋىپسىزدىگى تۋرالى ايتتى.
– بەرەكە-بىرلىك ورناعان مەملەكەتتە ءومىر ءسۇرىپ جاتىرمىز. كۇنىمىز ك ۇلىپ شىعادى, ءتۇنىمىز تىنىش. باستىسى, ءبىزدىڭ جاس ۇرپاق الاڭسىز ءوسىپ كەلەدى. ولار ءۇشىن بارلىق جاعداي جاسالعان. تۇراقتىلىعىمىز تۇعىرلى بولسىن دەگىم كەلەدى. وسىناۋ العىس ايتۋ مەرەكەسىنە وراي ۇلتتىق مۋزەيدىڭ عىلىمي كىتاپحاناسىنا ءارتۇرلى سالانى قامتىعان 50-گە جۋىق كىتاپتى سىيلاپ وتىرمىز. بۇل ءۇردىستى ءارى قاراي دا جالعاستىرا بەرمەكپىز, – دەدى ا.ءشارىپ.
اتالمىش اكتسيا بارىسىندا تۇڭعىش پرەزيدەنت – ەلباسىنىڭ كىتاپحاناسى نۇرسۇلتان ءابىش ۇلى نازارباەۆتىڭ ءومىر جولى تۋرالى جانە ونىڭ ەڭبەكتەرىنىڭ 36 باعا جەتپەس جاۋھارلارىن ۇسىنسا, سىرتقى ىستەر مينيسترلىگى 217 كىتاپتى سىيعا تارتتى. سونىمەن قاتار, ۇلتتىق مۋزەيگە كىتاپ سىيلاعان زيالى قاۋىم قاتارىندا – عالىم مىرزاتاي جولداسبەكوۆ, جازۋشى سۇلتان ورازالينوۆ, اكادەميك اقتوتى سماعۇلوۆا بار.
ال «استانا» ۇلتتىق سۋرەت گالەرەياسىندا العىس ايتۋ كۇنىنە جانە قازاقستان رەسپۋبليكاسى تاۋەلسىزدىگىنىڭ 25 جىلدىعىنا ارنالعان «بىرلىك ءتۇبى – بەرەكە» اتتى استانا قالاسى سۋرەتشىلەرى مەن ستۋدەنتتەردىڭ قاتىسۋىمەن دوڭگەلەك ۇستەل ءوتىپ, كەلگەن قوناقتارعا ارنايى استانا قالاسى سۋرەتشىلەرىنىڭ تۋىندىلارى قويىلعان كورمە ەكسپوزيتسياسى ۇسىنىلدى.
باسقوسۋعا قازاقستاننىڭ ەڭبەك سىڭىرگەن قايراتكەرى, استانا سۋرەتشىلەر وداعىنىڭ باسقارما توراعاسى ت.ەرمەكوۆ جانە ءارتۇرلى ۇلت وكىلدەرىنىڭ باسىن قوسقان سۋرەتشىلەر وداعىنىڭ بەلدى مۇشەلەرى, مادەنيەت جانە ءبىلىم سالاسىنىڭ قايراتكەرلەرى, پروفەسسورلار قاتىسىپ, ونەردەگى بىرلىك پەن تاتۋلىق سياقتى اسىل قاسيەتتەردىڭ كورىنىس تابۋى اتاپ ايتىلىپ, ىنتىماعى جاراسقان ەلدىڭ ارقاشاندا بۇگىنگىدەي العىسى ارايلانا بەرۋىنە تىلەكتەستىكتەرىن ءبىلدىردى.
اكىم قوجا ۇلى.
استانا.