«گۇل-اپشە» قالاي پلاگيات بولىپ شىقتى؟

بۇل كۇندە قازاق ەسترادا­سىنىڭ قۇدايى بەرىپ-اق تۇر: ومىرگە بىرىنەن سوڭ ءبىرى اس­پان­نان جاۋعان قۇيرىقتى جۇل­دىزداي حيت اندەر كەلىپ جاتىر. بۇلاردىڭ قاتارىنا «الاۋ» توبىنىڭ ورىنداۋىنداعى «گۇل-اپشەنى» دە قوسۋعا بولار ما ەدى؟! «الاۋ» توبىنىڭ پروديۋ­سەرى بايان ەسەنتاەۆا ءوزىنىڭ ينتەر­نەتتەگى پاراقشاسىندا قۋانىشى قوينىنا سىيماي: «ءبىزدىڭ جاڭا دۇنيەنى قارسى الىڭىزدار!», – دەپ جار سالعانى ەستە. ەندى مىنا قىزىقتى قاراڭىز: «الاۋدىڭ» بەينەكليپىن جايناتىپ, جارناماسىن جالاۋلاتىپ ايتقان «گۇل-اپشەسى» بار بولعانى رۋمىننىڭ Sanie cu zurgălăi («ساني س بۋبەنتسامي») دەگەن ءانىنىڭ كوشىرمەسى, ياعني پلاگيات بولىپ شىققان. سول باياعى كوڭىلدى جەلپىنتەتىن وينا­قى اۋەن, سكريپكانىڭ قۇيقىل­جىعان ەركە سازى, ءتىپتى «حەي!» دەپ قىسقا قايىرىپ ايعاي سالاتىن جەرى – ءبار-ءبارى عايىپتان تايىپ «گۇل-اپشەگە» قونىس اۋدارىپتى. تەك رۋمىن تىلىندە ءان قىس پەن شانا تۋرالى بولسا, قازاقشاداعى كەيىپكەر – «كراساۆيتسا ۆاپششە» ەكەن. جالپى, بۇل ءان قاراعان­دىداعى «داكيا» رۋمىن ءما­دەني بىرلەستىگىنىڭ جانىن­داعى «Dorule» ەتنو-فولكلور­لىق ان­سامبلىنىڭ رەپەرتۋارىندا دا بار. بىراق تا, قارا­عاندىلىق رۋ­مىنداردىڭ بايان ەسەنتاەۆادان ءبىر ايىر­ما­­شىلىعى – الگى ءاندى رۋمى­نيا­داعى Ro-Mania توبىنىڭ كوشباسشىسى يونۋتس ۆويكۋ دەگەن قۇقىق يەسىنەن رەسمي تۇردە رۇقسات الىپ, قوعامدىق نەگىزدە ورىندايدى ەكەن. ال «الاۋ» بولسا, وسى انمەن مال تاۋىپ جۇرگەن كوممەرتسيالىق جوبا... – كەزىندە, – دەيدى «داكيا­نىڭ» توراعاسى نيكولاي پلۋش­كيس, – بۇل ءاندى ايگىلى ەديت پياف تا ورىنداعان. ول دا زامانىندا ءاندى وزىنىكى قىلىپ كورسەتپەك بولىپتى. الايدا, 1936 جىلى اۆتورلىق قۇقىق جونىندەگى سوتتا جەڭىلىپ قالىپ, وسى ءاندى قانشا ورىندادى – اۆتورىنا سونشا اقى تولەپ وتىرعان. ءسويتىپ, ۋاقىتتىڭ تالابىنا ساي جاسارىپ, جاڭارعان حيت ءاندى Ro-Mania توبى رۋمىنيا اۆتورلىق قۇقىق وداعىندا رەسمي تۇردە تىركەتىپ العان. رۋمىنداردىڭ رەنجيتىن ءجونى بار. ايدىڭ-كۇننىڭ امانىندا حالقىنىڭ سۇيىكتىسىنە اينالعان ايگىلى ءاننىڭ تاعدىرى تالكەككە تۇسكەن. دەگەنمەن, قازاقتىڭ سۋىن ءىشىپ, نانىن جەپ جۇرگەن رۋمىن باۋىرلار سابىر ساقتاپ وتىر. قايرات ءابىلدينوۆ, «ەگەمەن قازاقستان». قاراعاندى.