كەشە استانادا باس رەداكتورلار كلۋبىنىڭ پرەزيدەنتى بيبىگۇل جەكسەنبايدىڭ جانە «مەديا كونسۋل» الەۋمەتتىك اگەنتتىگىنىڭ ديرەكتورى يۋري چەركاسوۆتىڭ قاتىسۋىمەن الداعى 20 ناۋرىزدا وتەتىن سايلاۋ كۇنى exit-poll زەرتتەۋىن جۇرگىزۋ تۋرالى بريفينگ ءوتتى.
بريفينگ بارىسىندا ب.جەكسەنبايدىڭ ايتۋىنشا, باس رەداكتورلار كلۋبى قازاقستاننىڭ 200-دەن استام باق باسشىلارى مەن باس رەداكتورلارى كىرەتىن قوعامدىق بىرلەستىك رەتىندە ەلەكتوراتتى ناۋقان مونيتورينگى ارقىلى سايلاۋ ناۋقانىنا قاتىسۋدى ماڭىزدى دەپ سانايدى جانە سايلاۋ كۇنى ەكزيت-پولل زەرتتەۋىن جۇرگىزۋگە تاپسىرىس بەرگەن. زەرتتەۋدى «مەديا كونسۋل» الەۋمەتتىك اگەنتتىگى جۇرگىزەدى.
– ەكزيت-پولل – دامىعان مەملەكەتتەردە كەڭىنەن تارالعان حالىقارالىق تاجىريبە. بۇل بىرەگەي الەۋمەتتىك مالىمەتتەر الۋعا مۇمكىندىك بەرەدى. مۇنداي زەرتتەۋلەر سايلاۋدىڭ ايقىندىلىعىن, سونداي-اق, تۇتاستاي ەلەكتوراتتىق مادەنيەتتى ارتتىرادى, – دەدى ب.جەكسەنباي.
يۋ.چەركاسوۆ سايلاۋ بارىسىندا وبلىس ورتالىقتارىندا, شاعىن قالالار مەن اۋىلدىق وكرۋگتەردە 225-تەي داۋىس بەرۋ ۋچاسكەسىندە ساۋالداما جۇرگىزىلەتىنىن اتاپ ءوتتى.
– زەرتتەۋ اياسىندا استانانىڭ جانە الماتىنىڭ, سونداي-اق, ءاربىر ءوڭىردىڭ قالالىق جانە اۋىلدىق حالقى تەپە-تەڭ ۇسىنىلادى. ساۋالدامانى وتكىزۋگە 250-گە جۋىق سۇحبات الۋشى تارتىلادى. ولاردىڭ جۇمىسىن 16 وڭىرلىك مەنەدجەر ۇيلەستىرەدى. سايلاۋ تۋرالى زاڭناماعا سايكەس, ەكزيت-پولل قورىتىندىسى باق پەن قوعامعا 21 ناۋرىزدا ساعات 00:00-دەن كەيىن ۇسىنىلادى, دەدى يۋ.چەركاسوۆ.
مۇنىمەن قوسا, ول سايلاۋالدى كەزەڭدە مونيتورينگتىك تالداۋ جۇرگىزىلەتىنىن ايتتى. «ءبىز حالىق اراسىندا جۇرگىزىلگەن ساۋالداما ارقىلى جينالعان مالىمەتتەردى ۇسىنامىز», – دەدى «مەديا كونسۋل» ديرەكتورى.