تاراز. 29 اقپان. بولاشاقتا جامبىلدىق شارۋالار ءبىر جىلدا ەكى رەت ءونىم جيناۋدى جوسپارلاپ وتىر. تىڭ ءتاسىلدى وبلىسقا ارنايى كەلگەن قازاق ۇلتتىق ۋنيۆەرسيتەتىنىڭ عالىمدارى ۇسىنىپ وتىر. بۇل تۋرالى جامبىل وبلىسى اكىمىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى.
ارگارلىق ولكە مەن وقۋ ورنىنىڭ اراسىنداعى بايلانىس بىرنەشە جىلدان بەرى جالعاسىپ كەلەدى. جىل باسىندا جامبىل وبلىسىنىڭ اكىمى كارىم كوكىرەكباەۆ قازاق ۇلتتىق ۋنيۆەرسيتەتىنە ارنايى بارىپ, وڭىردەگى اۋىل شارۋاشىلىعىن دامىتۋعا قاتىستى عالىمدارمەن كەڭەسكەن بولاتىن. اراعا ۋاقىت سالىپ عالىمدار اۋليەاتا جەرىندە قايتا باس قوستى. بۇل جولى سالاعا تىڭ جاڭالىقتار ەنگىزۋمەن قاتار, ونىمدىلىكتى ارتتىرۋعا قاتىستى دا جاڭا تەحنولوگيالاردى تانىستىردى. سونىڭ ءبىرى – ءبىر جىلدا ەكى رەت ءونىم جيناۋ. عالىمدار تاجىريبەنى مەركى اۋدانىنداعى «نۇرجان» شارۋا قوجالىعىنىڭ ەگىس القاپتارىندا جۇرگىزگەن. ماساقتى-مايلى داقىلداردىڭ 10 ءتۇرىن ەگىپ, ونىڭ ءونىمىن الۋدى كوزدەگەن تاجىريبە ءساتتى جۇزەگە استى. ايماقتاعى 6 اۋداندى پيلوتتىق دەپ تانىعان ولار بيىلدان باستاپ شارۋا قوجالىقتارىنىڭ بەيىنىنە قاراي بىرلەسە جۇمىس اتقارماق.
وبلىس اكىمى كارىم كوكىرەكباەۆ ارنايى جيىندا اۋىل شارۋاشىلىعىندا اتقارىلعان جۇمىستارعا توقتالدى. بولاشاقتا ىسكە اسىرىلاتىن جوبالارمەن ءبولىستى.
سونداي-اق, وبلىس كولەمىندە ەت باعىتىنداعى ءىرى جوبالار ىسكە اسىرىلۋدا.
«مەركى اۋدانىنداعى «اگروستان» جاۋاپكەرشىلىگى شەكتەۋلى سەرىكتەستىگىنىڭ مالايزيالىق كاسىپكەرلەرمەن بىرگە جاڭا زەلانديانىڭ جوباسى نەگىزىندە سالىنعان 5000 ۇساق مالعا ارنالعان بورداقىلاۋ كەشەنى پايدالانۋعا بەرىلدى. مويىنقۇم اۋدانىنداعى «اگرو فيرما تۇرىكپەن» جاۋاپكەرشىلىگى شەكتەۋلى سەرىكتەستىگى 3 مىڭ باس ءمۇيىزدى ءىرى-قارا مالعا ارنالعان بورداقىلاۋ كەشەنىن جانە 5 مىڭ باس ءمۇيىزدى ءىرى-قارا مال شارۋاشىلىق رەپرودۋكتور جوباسىنىڭ قۇرىلىسىن جۇزەگە اسىرۋدا. وسى جوبانى ىسكە اسىرۋ ماقساتىندا رەسەي فەدەراتسياسىنان 900 باس قالمىق تۇقىمىنىڭ ءىرى قارا مالىن جانە 1200 باستان جىلقى ساتىپ الىندى. جالپى وسى سالادا ونىمدىلىكتى ارتتىرۋىمىز كەرەك», – دەدى ايماق باسشىسى.
ەكى كۇنگە سوزىلاتىن سەمينار كەڭەس بارىسىندا عالىمدار اۋدانداردى ارالاپ, شارۋاشىلىق باسشىلارىمەن پراكتيكالىق كەزدەسۋلەر وتكىزەتىن بولادى.
ورالحان ءداۋىت.
دەرەك, سۋرەت: جامبىل وبلىسى اكىمىنىڭ ءباسپاسوز قىزمەتى.