استانا. 20 اقپان. گەرمانيانىڭ ديۋسسەلدورف قالاسىندا ءوتىپ جاتقان دزيۋدودان «Grand Prix» ءتۋرنيرىنىڭ ءبىرىنشى جارىس كۇنى ەكى قازاقستاندىق دزيۋدوشى جۇلدەگەر اتاندى. اتاپ ايتقاندا, 60 كيلو سالماق دارەجەسىندە بەلدەسكەن ەلدوس سمەتوۆ پەن ايەلدەر اراسىندا 48 كيلودا باق سىناعان گالبادراح وتگونتسەگتسەگ كۇمىس مەدالدى مويىندارىنا تاقتى. بۇل تۋرالى قازاقستان دزيۋدو فەدەراتسياسىنىڭ ءباسپاسوز قىزمەتىنى سىلتەمە جاساعان egemen.kz ءتىلشىسى حابارلادى.
ەلدوس سمەتوۆ ءوز توبىندا ليتۆالىق اندرەي كلوكوۆتى, موڭعوليا وكىلى تسوگتبااتار تسەندوچيردى جانە رەسەيلىك بەسلان مۋدرانوۆتى جەڭدى. جارتىلاي فينالدا ول تۇركيا پالۋانى بەكەر وزلۋعا سان سوقتىردى. ال شەشۋشى كەزدەسۋدە 60 كيلو سالماق دارەجەسىندە الەم رەيتينگىندە كوش باستاپ تۇرعان وڭتۇستىككورەيالىق كيم ۆون دجيمەن كەزدەستى. ناتيجەسىندە ەلدوس قارسىلاسىنا ەسە جىبەرىپ, كۇمىس جۇلدەنى قانجىعاسىنا بايلادى.
ءوز كەزەگىندە گالبادراح وتگونتسەگتسەگ الدىمەن تۋنيستىك ساودي ولفانى, ودان كەيىن كىلەم يەسى مەنز كاترينانى جانە ءوزىنىڭ باستى قارسىلاسى ەسەپتەلەتىن مونعول قىزى مۋنحبات ۋرانتسەگتسەگتى جەڭدى. فينالعا جولداما الۋ ءۇشىن كۋبالىق مەسترە الۆارەس داياريستەن باسىم تۇسكەن ول سوڭعى كەزدەسۋىندە وڭتۇستىك كورەيانىڭ وكىلى دجەونگ بو كەونگپەن كۇش سىناستى. گالبادراح وتگونتسەگتسەگ بىلتىر استانادا وتكەن الەم بىرىنشىلىگىندە العاشقى كەزدەسۋىندە-اق وسى سپورتشىدان جەڭىلگەن بولاتىن. بۇل جولى سوڭعى ساتكە دەيىن قارسىلاسىپ باققانىمەن, قوسىمشا ۋاقىتتا قارسىلاسىنا ءبىر ەسكەرتۋمەن جول بەرىپ قويدى.
ايتا كەتەيىك, جارىسقا ەلىمىزدىڭ ۇلتتىق كومانداسىنىڭ ءبىرىنشى قۇرامى قاتىسىپ جاتىر. الايدا, ماكسيم راكوۆ جاراقاتىنا بايلانىستى بايراقتى باسەكەدە باعىن سىناي المايتىن بولدى. تۋرنيرگە 86 ەلدىڭ 546 سپورتشىسى قاتىسۋدا. جارىس ناتيجەسى بويىنشا ءبىرىنشى ورىن العان دزيۋدوشى 300, ەكىنشى ورىن يەگەرى 180, «قولاعا» قول جەتكىزگەن بالۋان 120 ۇپايعا يە بولادى. سونىمەن قاتار, بەسىنشى ورىنعا تۇراقتاعان سپورتشى 60, ال جەتىنشى ورىنعا جەتكەن پالۋان 48 ۇپاي الادى.
ەلامان قوڭىر.
دەرەك, سۋرەت: قازاقستان دزيۋدو فەدەراتسياسىنىڭ ءباسپاسوز قىزمەتى.