استانا. 22 اقپان. فيدجي ارالىندا «ۋينستون» تروپيكالىق تسيكلوننىڭ سالدارىنان 10 ادام قازا تاۋىپ, 7 ادام جوعالىپ كەتتى. بۇل تۋرالى تاسس اقپارات اگەنتتىگىنە سىلتەمە جاساعان egemen.kz ءتىلشىسى حابارلادى.
وزگە دە ارالداردان ناقتى مالىمەت بولماعاندىقتان قازا تاپقانداردىڭ سانى ارتۋى مۇمكىن دەگەن بولجام بار. مەتەورولوگتار جويقىن داۋىلدىڭ جىلدامدىعى ساعاتىنا 325 شاقىرىمدى قۇراعانىن, ال مۇحيت تولقىندارى 12 مەترگە دەيىن كوتەرىلگەندىگىن انىقتادى.
مەملەكەت استاناسى سۋۆا قالاسىنىڭ بيلىگى تابيعات اپاتىنان 140-تان استام ءۇيدىڭ قيراپ قالعاندىعىن مالىمدەدى. باتىس ايماقتارداعى ەڭ ءىرى ۆيتي لەۆۋ ارالىندا بارلىعى 680 ءۇيدىڭ 425-ءى زاقىمدانعان. بۇل ارالدا حالىقتىڭ 70 پايىزى تۇرادى. كوبىنە تومەنگى اۋدانداردىڭ تۇرعىندارى زارداپ شەكتى. باسپاناسىنان ايرىلعاندارعا قاۋىپسىز ايماقتاردان ارنايى ورىندار بەرىلدى.
فيدجي رەسپۋبليكاسى تىنىق مۇحيتتىڭ وڭتۇستىك-باتىسىندا فيدجي ارالدارىندا ورنالاسقان مەملەكەت. اۋماعى 18333 شارشى شاقىرىمدى قۇرايدى. حالقى 890 مىڭ.
ايان ءابدۋالي.
دەرەك, سۋرەت: تاسس.