استانا. 20 اقپان. اقش-تىڭ بەلگىلى جازۋشىسى, «سايقىمازاقتىڭ كوزىن جويۋ» (To kill a mockingbird), «كۇزەتشىنى تاعايىندا» (Go set a watchman) سىندى كىتاپتاردىڭ اۆتورى حارپەر لي 89 جاسىندا دۇنيەدەن ءوتتى. بۇل تۋرالى تاسس اقپارات اگەنتتىگىنە سىلتەمە جاساعان egemen.kz ءتىلشىسى حابارلادى.
جازۋشىنىڭ قايتىس بولعانى تۋرالى العاش بولىپ, الاباما شتاتىنا قاراستى مونروۆيلل قالاسىنداعى Book Shoppe كىتاپ دۇكەنىنىڭ رەسمي سايتى حابارلادى. سونداي-اق, بۇل اقپاراتتى قالا اكىمى دە راستادى.
«سايقىمازاقتىڭ كوزىن جويۋ» تۋىندىسى 1960 جىلى شىققان. كىتاپتا اقش-تىڭ وڭتۇستىگىندە ورنالاسقان شاعىن قالاشىقتاعى ناسىلشىلدىك, ەسكىلىك ۇعىمنىڭ قالىپتاسىپ كەتۋى جايلى جازىلعان. وسىدان سوڭ, 55 جىل بويى كىتاپ جازباسا دا, تانىمال جازۋشىلاردىڭ ءبىرى سانالدى. 2015 جىلى حارپەر ءليدىڭ «كۇزەتشىنى تاعايىندا» كىتابى جارىققا شىعادى. ءبىر قىزىعى بۇل رومان «سايقىمازاقتىڭ كوزىن جويۋ» تۋىندىسى باسىلىپ شىققانعا دەيىن جازىلىپ قويعان ءارى وسى كىتاپتىڭ جالعاسى رەتىندە جازىلدى.
1961 جىلى حارپەر لي ادەبيەت سالاسىنداعى ەڭبەگى ءۇشىن پۋليتتسەر سىيلىعىن الادى. اقش-تىڭ پرەزيدەنتى كىشى دجوردج بۋش پرەزيدەنت مەدالىمەن, ال ونىڭ ءىزباسارى باراك وباما ادەبيەتكە قوسقان ۇلەسى ءۇشىن ۇلتتىق مەدالمەن ماراپاتتاعان.
ول 1926 جىلى 28 ءساۋىر كۇنى مونروۆيلل قالاسىندا دۇنيەگە كەلگەن. 1947 جىلى الاباما ۋنيۆەرسيتەتىندەگى زاڭ سالاسى بويىنشا وقۋىن اياقتاماستان, نيۋ-يورك قالاسىنا ادەبيەت باعىتىن قولعا الۋ ءۇشىن كوشىپ كەتەدى. الايدا «سايقىمازاقتىڭ كوزىن جويۋ» كىتابى جاريالانباس بۇرىن تۋعان جەرىنە قايتا كوشىپ كەلىپ, ءومىرىنىڭ سوڭىنا دەيىن مونروۆيلدە ءومىر سۇرگەن.
ايان ءابدۋالي.
دەرەك: تاسس.
سۋرەت: bbc.com.