استانا. 20 اقپان. قازاقستان رەسپۋبليكاسىنىڭ ەڭبەك سىڭىرگەن مادەنيەت قىزمەتكەرى, بەلگىلى جازۋشى نۇرعوجا وراز 84 جاسىندا دۇنيەدەن ءوتتى. بۇل تۋرالى egemen.kz ءتىلشىسى حابارلادى.
قازاق پوەزياسىندا وزىندىك قولتاڭباسى بار اقىن سوڭعى ساتتەرگە دەيىن قولىنان قالامىن تاستامادى. 1964 جىلى جارىق كورگەن «تۇڭعىش كىتابىنان» باستاپ بۇگىنگە دەيىن جىر سۇيەر قاۋىمعا «شۇعىلا», «كوڭىل كوكتەمى» , «تىڭ تۇلەگى», «قىراندار ۇياسى» , «جاۋقازىن شاق» , «دالا دەمى» سەكىلدى سۇبەلى شىعارمالارىن ۇسىندى.
نۇرعوجا وراز 1932 جىلى 20 قازاندا قوستاناي وبلىسى ۋريتسكي اۋدانىنداعى «ماياك» كەڭشارىندا دۇنيەگە كەلگەن. 1947 جىلى اۋىلىنداعى جەتىجىلدىق مەكتەپتى ءبىتىرىپ, گۋرەۆ پەدۋچيليششەسىن 1950 جىلى تامامداعان. مۇنايلى جەتىجىلدىق مەكتەبىندە ءبىر جىلدىق ۇستازدىق ەتكەن. ال 1951 جىلى قازاق مەملەكەتتىك ۋنيۆەرسيتەتىنىڭ فيلولوگيا فاكۋلتەتىنە وقۋعا تۇسەدى. 1956 جىلى العاشقى ولەڭدەرى «جاس جۇرەك» اتتى جاس اقىندار جيناعىنا ەنگەن. 1956-1958 جىلدارى مەكتەپتە مۇعالىم بولدى. 1958-1963 جىلدارى قوستاناي وبلىستىق گازەتىندە, 1963-1965 جىلدارى «تىڭ ولكەسى» گازەتىندە قىزمەت ەتكەن. 1965 جىلى اقمولا وبلىسىنا قاراستى تسەلينوگراد وبلىسارالىق بولىمشەسىندە جاۋاپتى حاتشى بولدى. كەيىننەن «جاڭا سارىارقا» جۋرنالىنىڭ اشىلۋىنا تىكەلەي سەبەپكەر بولىپ, باس رەداكتورلىق قىزمەتىن اتقاردى.
نۇرعوجا وراز قازاقستان رەسپۋبليكاسىنىڭ ەڭبەك سىڭىرگەن مادەنيەت قىزمەتكەرى, جۋرناليستەر وداعىنىڭ م.سەرالين اتىنداعى سىيلىعىنىڭ لاۋرەاتى, «استانا» جانە «تاۋەلسىزدىكتىڭ 10 جىلدىعى» مەدالدارىمەن ماراپاتتالعان, «قازاقستاننىڭ ەڭبەك سىڭىرگەن قايراتكەرى» اتاعىنا يە بولعان. ەل تاۋەلسىزدىگىنىڭ دامۋىنا وزىندىك ۇلەس قوسقان ۇلت پەرزەنتى.
ايان ءابدۋالي.
دەرەك: egemen.kz.
سۋرەت: tugel.kz.