كەشە استانادا قازاقستان رەسپۋبليكاسىندا سايلاۋدى بايقاۋ جونىندەگى رەسپۋبليكالىق قوعامدىق كوميسسيا (سبرقك) ءوزىنىڭ كەزەكتى سەمينار-ترەنينگىن وتكىزدى. «بايقاۋشىنىڭ قۇقىقتارى مەن مىندەتتەرى. پارلامەنت ءماجىلىسى جانە بارلىق دەڭگەيدەگى ءماسليحاتتار دەپۋتاتتارىنىڭ سايلاۋلارىن بايقاۋشىلاردىڭ قىزمەتىندەگى ادىستەر مەن تاسىلدەر» تاقىرىبىنداعى بۇل شارا استانالىق بايقاۋشىلار ءۇشىن ۇيىمداستىرىلدى.
سەمينار-ترەنينگتى اشقان سبرقك مۇشەسى ارمان ەشمۇراتوۆ قاتىسۋشىلارعا ءبىرىنشى كەزەكتە الداعى سايلاۋ ناۋقانىنىڭ ەلىمىز ءۇشىن ماڭىزدى ەكەنىن ءتۇسىندىرىپ ءوتتى. سونداي-اق, ول سايلاۋدىڭ ءوز دەڭگەيىندە وتۋىنە بايقاۋشىلاردىڭ ساۋاتتى ءارى بەلسەندى قىزمەتى تىكەلەي اسەر ەتەتىنىن جەتكىزدى.
«بىزگە قازىرگى تاڭدا بايقاۋشىلارعا وزدەرىنىڭ سايلاۋ كەزىندەگى قۇقىعى مەن مىندەتتەرىن جەتە ۇعىندىرۋ كەرەك. بايقاۋشىلاردىڭ ءاربىر ءىس-ارەكەتى ساۋاتتى بولعانى ءجون. وزدەرىڭىز بىلەتىندەي, الداعى سايلاۋدىڭ حالقىمىز ءۇشىن, ەلىمىزدىڭ كەلەشەگى ءۇشىن ماڭىزى زور.
ءبىزدىڭ بايقاۋشىلارىمىز بۇعان دەيىن دە وسىنداي ماڭىزدى ناۋقاندا بەلسەندى جۇمىس ىستەگەن. ولاردىڭ تاجىريبەلەرى بار. دەگەنمەن, ءار سايلاۋدىڭ وزىندىك باستى ەرەكشەلىكتەرى بولاتىندىقتان, بايقاۋشىلاردىڭ دايىندىقتارىن پىسىقتاعان ءجون. قازىر ءبىز سايلاۋ كۇنى بايقاۋشىلاردىڭ بارلىعى ساقاداي ساي بولۋىن قامتاماسىز ەتۋ ماقساتىندا ءتيىستى جۇمىستاردى جۇرگىزىپ جاتىرمىز. سونىڭ ءبىر دالەلى رەتىندە وسى وتكىزىلىپ وتىرعان سەمينار-ترەنينگتى ايتار ەدىم. جالپى, ءبىز سايلاۋدىڭ اشىق ءارى تازا وتۋىنە مۇددەلىمىز. بۇل ءوز كەزەگىندە بايقاۋشىلارعا ۇلكەن جاۋاپكەرشىلىك ارتادى», – دەدى ارمان ەشمۇراتوۆ. سبرقك مۇشەسىنىڭ ايتۋىنشا, بايقاۋشىلار كۇنىنە 2 اەك كولەمىندە جالاقى الادى. 20 ناۋرىزدا جۇمىسقا كىرىسەتىن ولار ازىرگە ارنايى دايىندىقتان وتەدى.
سايلاۋ كۇنى داۋىس بەرۋدىڭ بارىسىن قاداعالايتىن سبرقك بايقاۋشىلارىنىڭ بىلىكتىلىگىن ارتتىرۋعا باعىتتالعان بۇل شارادا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى ساياساتتانۋ كافەدراسىنىڭ پروفەسسورى مىندەتىن اتقارۋشى, ساياسي عىلىمدار كانديداتى مارينا ونۋچكو سايلاۋدى بايقاۋ ۇدەرىسىندەگى بايقاۋشىنىڭ ءرولى, قۇقىقتارى مەن مىندەتتەرى تۇرعىسىندا كەڭەس بەردى. م.ونۋچكو بايقاۋشى داۋىس بەرۋ بارىسىن قاداعالاپ, بارلىق حاتتامالارمەن تانىسىپ, بەينە, اۋديو جازۋعا, قانداي دا ءبىر زاڭ بۇزۋشىلىق كورسە, ونى اكتپەن تىركەۋگە قۇقىلى ەكەنىن جەتكىزدى.
سونداي-اق, ول بايقاۋشىلاردىڭ مىندەتتەرىن دە اتاپ كورسەتتى. ونىڭ ايتۋىنشا, بايقاۋشىلار سايلاۋ كوميسسيالارىنىڭ جۇمىسىنا ارالاسپاۋى كەرەك. بۇل ءۇشىن ول اكىمشىلىك جانە قىلمىستىق جاۋاپكەرشىلىككە تارتىلۋى مۇمكىن. بۇعان قوسا, م.ونۋچكو بايقاۋشىلاردىڭ بۇلاردان باسقا دا قۇقىقتارى مەن مىندەتتەرىن ءتۇسىندىرىپ ءوتتى.
ودان ءارى ءسوز العان سبرقك مۇشەسى تالانت رامازانوۆ بايقاۋشىلاردىڭ قىزمەتىندەگى ادىستەر مەن تاسىلدەر جونىندە ايتىپ بەردى. سونداي-اق, ول بايقاۋشىلار سايلاۋ ۇدەرىسىنە بوگەت جاساماۋ قاجەتتىگىن, تەك داۋىس بەرۋدىڭ زاڭنامالارعا سايكەس جۇرگىزىلۋىن قاداعالاپ وتىرۋى ءتيىس ەكەنىن جەتكىزدى.
سەمينار-ترەنينگ بارىسىندا سبرقك رەسپۋبليكالىق شتابى تاراپىنان ازىرلەنگەن بايقاۋشىنىڭ ادىستەمەلىك قۇرالى تانىستىرىلدى.
جولدىباي بازار,
«ەگەمەن قازاقستان».