استانا قالاسىنداعى ىبىراي التىنسارين اتىنداعى BINOM SCHOOL مەكتەپ-ليتسەيىندە ۇلتتىق قۇندىلىقتاردى ۇلىقتاۋعا ارنالعان «ناۋرىز-دۋمان» اتتى اۋقىمدى مەرەكەلىك ءىس-شارا ءوتتى.
تاڭعى ساعات 9:00-دەن 17:00-گە دەيىن جالعاسقان دۋماندى باسقوسۋ ءبىلىم ورداسىنىڭ اۋلاسىن ۇلتتىق ناقىشقا تولى مادەني كەڭىستىككە اينالدىردى. ونداعى ماقسات – جاس ۇرپاققا قازاق حالقىنىڭ سالت-ءداستۇرىن, مادەنيەتى مەن رۋحاني مۇراسىن تانىتۋ, ۇلتتىق بىرەگەيلىكتى نىعايتۋ جانە ناۋرىز مەيرامىنىڭ مازمۇنىن تەرەڭ ۇعىندىرۋ.
مەكتەپ ديرەكتورى بەرىكبول مارات ۇلىنىڭ ايتۋىنشا, بۇل كۇنى اۋلادا 42 كيىز ءۇي بوي كوتەرىپ, ءار شاڭىراقتا حالقىمىزدىڭ تۇرمىس-تىرشىلىگى مەن داستۇرلەرى كەڭىنەن دارىپتەلدى. كەلۋشىلەرگە ارنالعان ءتۇرلى تانىمدىق ءارى ويىن-ساۋىق الاڭدارى ۇيىمداستىرىلىپ, كوپشىلىكتىڭ قىزىعۋشىلىعىن ارتتىردى.
اتاپ ايتقاندا, «كوكتەم سىيى» اشەكەي بۇيىمدار كورمەسى, «Altybaqan Zone» التىباقان الاڭى, «ناۋرىز ءدامى» ۇلتتىق تاعامدار جارمەڭكەسى, «بايگە» اتقا ءمىنۋ ايماعى مەن ساداق اتۋ بۇرىشى ەرەكشە ىقىلاسقا يە بولدى. بۇعان قوسا, توعىزقۇمالاق, ارقان تارتىس, قوزى كوتەرۋ, بەستاس, اسىق اتۋ, قول كۇرەسى, كوكپار سەكىلدى ۇلتتىق ويىندار وتكىزىلىپ, قاتىسۋشىلار بەلسەندىلىك تانىتتى.
سونىمەن قاتار «شەبەرلىك شەبەرحاناسى: دالا ورنەگى» (اعاش ويۋ), «تاقيا – ۇلت ءسانى», «قىش-قۇمىرالار قۇپياسى» باعىتتارىندا قولونەر ساباقتارى ۇيىمداستىرىلدى. ء«بىلىم الەمى» كىتاپ كورمەسى مەن «تابيعات ءسانى» تال ەگۋ اكتسياسى دا جۇرت نازارىنان تىس قالمادى. ال «BINOM BARYSY» قازاق كۇرەسى سايىسى مەن «گۇلدەر شۋاعى» فلەشموبى مەرەكەنىڭ كوركىن اشا ءتۇستى.