اتىراۋدا ءبىر كۇندە وسىنشا وتباسى باسپانالى بولدى
اتىراۋ قالاسىندا تۇرعىن ءۇي قۇرىلىسى كەڭ قانات جايعان شاعىن اۋداندار قاتارى كوبەيىپ كەلەدى. سولاردىڭ قاتارىنداعى «نۇرسايا» شاعىن اۋدانىنا تۇرعىندار ەرەكشە قىزىعادى. ويتكەنى, مۇندا جىل سايىن زاماناۋي تۇرعىن ۇيلەر بوي كوتەرەدى. وتكەن جىلى دا بۇل شاعىن اۋداندا بىرنەشە باعدارلامامەن تۇرعىن ءۇي قۇرىلىسى باستاۋ الدى. سونداي باعدارلامالاردىڭ قاتارىنداعى «وڭىرلەردى دامىتۋ-2020» باعدارلاماسىمەن سالىنعان باسپانالار شاعىن اۋدانعا ءسان بەرەرلىكتەي اسەمدىگىمەن كوز تارتادى. ەندى مىنە, بۇرناعى كۇنى 11 تۇرعىن ءۇيدىڭ 555 پاتەرى كەزەكتە تۇرعان وتباسىلارعا بەرىلدى. ءبىر كۇندە جاڭا باسپانا العانداردىڭ ىشىندە 1 ۇلى وتان سوعىسىنىڭ ارداگەرى, 17 اتا-انا قامقورلىعىنسىز قالعان جاس, 29 الەۋمەتتىك تۇرمىسى تومەن وتباسى, 57 مەملەكەتتىك قىزمەتكەر مەن بيۋدجەتتىك مەكەمە وكىلدەرى بار. باسپاناسى اپاتتى كۇيگە جاتقىزىلعان وتباسى دا جاڭا پاتەر باقىتىنا بولەندى.
ال 450 وتباسى تۇرعىن ءۇي الۋ ءۇشىن تۇرعىن ءۇي قۇرىلىس جيناق بانكىنىڭ سالىمشىسى اتانىپ, كەزەككە تۇرعاندار ەكەن. ولاردىڭ 218-ءى تولەم قابىلەتى بارلار ساناتىنا جاتسا, 232-ءسى ارنايى بانكتىڭ سالىمشىسى بولعان. وسىلايشا, اتىراۋدا ءبىر كۇندە 555 ءپاتەر يەلەرى قۋانىشقا بولەندى. تۇرعىنداردىڭ باسپانالى بولۋ قۋانىشىنا وبلىس اكىمى باقتىقوجا ىزمۇحامبەتوۆ ورتاقتاسىپ, جاڭا تۇرعىن ۇيلەردەگى پاتەرلەردى ارالاپ كوردى.
– وسى كەزگە دەيىن بەس بالاممەن جاتاقحانانىڭ 1 بولمەسىندە تۇرىپ كەلدىك. ارينە, كوپ بالالى وتباسى ءۇشىن ءبىر بولمە تارلىق ەتەتىن. بالالارىمىز ويناي دا المايتىن. تۇرعىن ءۇي كەزەگىن 10 جىلدان اسا كۇتىپ ەدىك. بۇگىن مەملەكەتتىڭ قولداۋىمەن پاتەر العانىمىز ءۇشىن قۋانىشىمىز قوينىمىزعا سىيماي تۇر. ەندى, اسىرەسە, بالالارىمىز الاڭسىز ساباعىنا دايىندالىپ, ەركىن دەمالاتىن بولدى, – دەيدى كوپ بالالى انا كۇنزيرا ەلەمەسوۆا.
ايتقانداي, وتكەن جىلى وسى شاعىن اۋداننان «جاس وتاۋ» باعدارلاماسىمەن سالىنعان تۇرعىن ۇيگە جاستار قونىستانىپ ەدى. تەك جاستار ەمەس, سولارمەن ءبىرگە, بىلتىر وبلىستا 795 وتباسى تۇرعىن ءۇيمەن قامتىلىپتى. ەندى بيىلعى جىلدىڭ اياعىنا دەيىن تاعى دا 100 وتباسىنىڭ باسپانالى بولاتىنى كۇتىلۋدە.
جولداسبەك شوپەعۇل,
«ەگەمەن قازاقستان».
اتىراۋ.
سۋرەتتى تۇسىرگەن
راحىم قويلىباەۆ.