قازىر كوپشىلىك ادامدارعا بيزنەس دەگەن ءسوز قول جەتپەس بيىكتەگى نارسە سەكىلدى كورىنەدى. سوندىقتان ولار ءىس اشۋ ءۇشىن تاۋەكەل جاساۋعا تارتىنشاقتايدى. الايدا ءوز اتەلەسىن اشقان ۆەرونيكا پوبرۋس مۇنداي پىكىرمەن كەلىسپەيدى. ەرىنبەي ەڭبەك ەتىپ, سۇيگەن ءىسىنىڭ سوڭىنا تۇسكەن كىسى عانا كاسىبىن دوڭگەلەتەدى. ۇلى اجەسىنەن نەمەرە, شوبەرەلەرىنە جالعاسىپ كەلە جاتقان تىگىنشىلىك ۆەرونيكانىڭ دا سۇيگەن ءىسى بولاتىن. ت ۇلىمشاعى جەلبىرەپ جۇرگەن بالا كەزىندە اجەسى رايسا يلينيچنا بەبەح الاڭسىز ءتىگىن ماشيناسىندا وتىراتىن. نەمەرەسى دە ونى اينالشىقتاپ, ماتالاردى ۇستاپ كورىپ, قايشىمەن ماتا قىرقامىن دەپ قيعىلىقتى سالار ەدى. اجەسىنە ينە ساباقتاپ بەرەتىن كەزدەرى دە بولاتىن. «انا كورگەن تون پىشەر» دەگەن قازاق ماقالىنىڭ دانالىق ەكەنىن بەبەحتەر وتباسىنىڭ ساباقتاستىق ءداستۇرى دە دالەلدەگەندەي ەدى. اجەسىنەن تىگىنشىلىككە كوزى قانىپ وسكەن ۆەرونيكا 9-سىنىپتا وقىپ جۇرگەندە وزىنە العاشقى پالتوسىن تىگىپ الدى. سودان كەيىن-اق وندا باسقا ماماندىق تۋرالى وي بولعان ەمەس. تىگىن ماشيناسىندا ساعاتتاپ وتىرادى, تىككەن ءار كيىمى وعان راحات سەزىمىن سىيلايتىن. تىگىنشىلىك كاسىبىنە, كۇن كورىسىنە اينالدى. بەرى كەلە اتەلە اشۋدى ارماندادى.
– جىلدار جىلجىپ وتە بەردى. مەن سۇرانىس جاساعاندارعا بۇيىمدارىن ۇيدەن تىگىپ بەرەتىنمىن. ال اتەلە اشۋ مەن ءۇشىن ارمان كۇيىندە قالا بەرگەن ەدى. سەبەبى, بارلىعى دا قارجىعا كەلىپ تىرەلەدى عوي. بىردە ماعان تانىستارىم «كاسىپكەرلەر پالاتاسىنا بارىپ, جوسپارىڭدى ايتساڭ كومەك بەرەدى, تالپىنىپ كورسەي», دەگەن كەڭەس ايتتى. راسىندا كاسىپكەرلەر پالاتاسىنا بارعان سوڭ, ايىم وڭىنان تۋعانداي بولدى, ارمانىمنىڭ الداماعانىن سەزىندىم, – دەيدى ۆەرونيكا.
قازىر ۆەرونيكانىڭ ءوزى تۇرىپ جاتقان ماي سەلوسىندا اشقان اتەلەسى جۇمىس ىستەي باستادى. تىگىنشى بيزنەسىم جۇرمەي قالادى دەپ ساسقان جوق. ويتكەنى, ول ۇيىندە تىگىن تىگىپ جۇرگەندە-اق وعان ءساندى كويلەككە, باسقا دا كيىمدەر تىگۋگە سۇرانىس بەرەتىندەر از بولمايتىن. اتەلە اشىلعالى كەلۋشىلەر قاتارى كوبەيە ءتۇستى. سۇرانىس بەرۋشىلەر كەلگەن سايىن ونىڭ كاسىبى دە دوڭگەلەنە تۇسەدى.
– اتەلە اشىلعان كۇننەن-اق اۋىلداستارىم ماعان كۇزگى, قىسقى كيىمدەرىن جوندەتۋگە الىپ كەلدى. العاشقى سۇرانىس تا وسى بولدى. بۇل ۇيرەنشىكتى كورىنىس, ويتكەنى قالادا دا, دالادا دا جاماۋ-جاسقاۋ ءىسى بولماي قالمايدى. ءتىپتى, دۇكەننەن ساتىپ العان كيىمنىڭ ءوزىن كەيدە كىشىرەيتۋگە, قىسقارتۋعا تۋرا كەلەدى. تىرلىكتىڭ ءبىر ۇزىلمەيتىن ءىسى وسى, – دەيدى ۆەرونيكا.
تىگىنشى قىز اۋدانداعى نارىقتى «زەرتتەپ» تە قويعان ەكەن. تاران اۋدانىنىڭ ورتالىعىندا, وعان جاقىن ەلدى مەكەندەردە مۇنداي اتەلە جوق ەكەن. كەيبىر اۋەسقوي تىگىنشىلەر قولى بوس كەزىندە ۇيىندە تىگەدى. ال ۆەرونيكانىڭ اتەلەسىنە كەلگەندەر نەگىزىنەن كيىمدى جوندەتەدى, جاماۋ-جاسقاۋ دەگەندەي ىستەردى اتقارادى. الداعى ۋاقىتتا ول اتەلەنىڭ قىزمەت اياسىن كەڭەيتۋدى ويلاستىرىپ وتىر. ونىڭ ءوزى ويلاعان ءىسىن ورىنداۋعا بىلىكتىلىگى جەتەدى. ۆەرونيكا رۋدنىي قالاسىنداعى ءبىر اۆتورلىق مەكتەپتەن مامانداندىرىلعان تىگىنشىلىك كۋرستى ءبىتىرىپ, سەرتيفيكات الدى. «شەبەردىڭ قولى ورتاق» دەگەندەي, ول اۋىلداستارىنىڭ قانداي كيىمىن بولسا دا جۇتىندىرىپ شىعارادى.
بۇگىندە ۆەرونيكا پوبرۋس «بيزنەستىڭ جول كارتاسى-2020» باعدارلاماسى بويىنشا شاعىن نەسيە كۇتىپ ءجۇر. ول سول قارجىعا جاڭا تىگىن ماشيناسىن, فۋرنيتۋرا, قوسىمشا جابدىقتار العىسى كەلەدى. «ۆەرونيكا» اتەلەسىنىڭ جەرلەستەرىنە كورسەتەر قىزمەتى ءمىنسىز بولاتىنىنا ۆەرونيكا سەنىمدى.
ءنازيرا جارىمبەتوۆا,
«ەگەمەن قازاقستان».
قوستاناي وبلىسى,
تاران اۋدانى.