كەشە ۇلتتىق اكادەميالىق كىتاپحانادا اكادەميك سالىق زيمانوۆتىڭ 95 جىلدىعىنا بايلانىستى «اكادەميك زيمانوۆ – عالىم, ازامات جانە عىلىم ابىزى» اتتى تاقىرىپتا دوڭگەلەك ۇستەل ءوتتى.
اۋەلى كىتاپ كورمەسىنەن باستاۋ العان بۇل رۋحاني شارانى زاڭ عىلىمدارىنىڭ دوكتورى, پروفەسسور ەسبەرگەن الاۋحانوۆ جۇرگىزىپ وتىردى. س.زيمانوۆ – قازاقستانداعى زاڭ عىلىمدارىنىڭ العاشقى دوكتورى, قازاقستان عىلىم اكادەمياسىندا زاڭ سالاسى بويىنشا العاشقى پروفەسسورى جانە ءبىرىنشى اكادەميك. ونىڭ ەسىمىمەن قازاقستانداعى جوعارى زاڭ ءبىلىمىنىڭ دامۋى مەن عىلىمي-زەرتتەۋ جۇمىسىنىڭ وركەندەۋىنىڭ جاڭا, شىنايى كەزەڭى بايلانىستىرىلادى.
ونىڭ ەگەمەن ەلىمىزدىڭ العاشقى زاڭدارىن قۇراستىرۋعا, تاۋەلسىز قازاقستاننىڭ قۇقىقتىق جاعىنان قالىپتاسۋعا, وتاندىق زاڭنامانى دامىتۋعا قوسقان ۇلەسى تۋراسىندا, سونداي-اق ونىڭ جەلتوقسان وقيعاسى كەزىندە كورسەتكەن ازاماتتىق ەرلىك ىستەرى, يمپەريالىق ورتالىقتىڭ لاۋازىمدى وكىلدەرىنىڭ قازاق حالقى اتىنا ايتقان استام پىكىرلەرىنە تايسالماي قارسى شىعىپ, ۇلت نامىسىن, ەل ابىرويىن ناقتى دا كەسىمدى دالەلدەرمەن قورعاپ قالعاندىعى تۋرالى ونىڭ ازاماتتىق, قايراتكەرلىك, قىرىنا ارقاۋ بولعان نەبىر باياندامالار مەن ەستەلىكتەردى شاراعا جينالعان زيالى قاۋىم وكىلدەرى باستاعان زامانداس ءىنى-ءىزباسارلارى, شاكىرتتەرى جارىسا ايتتى. بۇعان قوسا, بەينەتاسپا ارقىلى س.زيمانوۆ ومىرىنە قىسقاشا شولۋ جاسالدى.
دوڭگەلەك ۇستەلدە ءسوز العان كەنجەعالي ساعاديەۆ كورنەكتى عالىم سالىق زيمانوۆتىڭ زەرتتەۋلەرى ارقىلى قازاقستان مەن ورتالىق ازيا رەسپۋبليكالارىندا ساياسي تاريح پەن ساياسي-قۇقىقتىق عىلىمعا قوسقان ەرەن ەڭبەگىنە توقتالا كەلە: «ءومىرىنىڭ سوڭعى ساعاتىنا دەيىن بىرگە بولعان اعامىز ەدى. قازاق عىلىمىنا, سونىڭ ىشىندە زاڭ عىلىمىنا, ۇلتتىق عىلىم اكادەمياسىنا سىڭىرگەن ەڭبەگى ەرەكشە. ەگەمەندىكتى ەندى العان كەزدە تاۋەلسىز قازاقستاننىڭ زاڭ عىلىمىنىڭ نەگىزىن قالاعان عالىمداردىڭ ءبىرى دە بىرەگەيى – سالىق زيمانوۆ», – دەدى.
ولاي ايتۋعا نەگىز بار, ويتكەنى س.زيمانوۆ قازاق مەملەكەتتىلىگى مەن قازاق حالقىنىڭ تاريحىندا شەشۋشى ءرول اتقارعان 1990 جىلعى «قازاق كسر-ءىنىڭ مەملەكەتتىك ەگەمەندىگى تۋرالى دەكلاراتسيانىڭ» جوباسىن دايىنداۋ جونىندەگى كوميسسيانى باسقاردى. ەل تاريحىنداعى ەكىنشى ءبىر اسا ماڭىزدى ساياسي اكتىنىڭ – «قازاقستان رەسپۋبليكاسىنىڭ مەملەكەتتىك تاۋەلسىزدىگى تۋرالى» كونستيتۋتسيالىق زاڭنىڭ (16.12.1991) جوباسىن دايىنداۋ جونىندەگى كوميسسيا جەتەكشىلەرىنىڭ ءبىرى بولدى. سونداي-اق, ول جوعارعى كەڭەستە قازاقستان رەسپۋبليكاسىنىڭ جاڭا كونستيتۋتسياسىنىڭ جوباسىن ءازىرلەۋ جونىندەگى كونستيتۋتسيالىق كوميسسيانىڭ مۇشەسى بولدى, مۇندا ول ساراپشىلار توبىن باسقارعان بولاتىن.
شاراعا اكادەميكتەر كامال ورمانتاەۆ, جابايحان ءابدىلدين, عاريفوللا ەسىم, كونستيتۋتسيالىق كەڭەس توراعاسى يگور روگوۆ, قازاقستاننىڭ ەڭبەك سىڭىرگەن قايراتكەرى سۇلتان ورازالين, «ەگەمەن قازاقستان رەسپۋبليكالىق گازەتى» اق پرەزيدەنتى ساۋىتبەك ابدراحمانوۆ, پروفەسسور نيكولاي اكۋەۆ, عالىم قابىلسايات ابىشەۆ جانە تاعى باسقا زيالى قاۋىم وكىلدەرى قاتىسىپ, ءسوز سويلەدى.
راۋشان تاۋىرحانقىزى,
جۋرناليست.
سۋرەتتى تۇسىرگەن
ەرلان وماروۆ.