جامبىل وبلىسى وتكەن جىلدى ۇلكەن تابىسپەن قورىتىندىلادى. كورسەتكىشتەرىندە كەرى كەتكەن جەرى جوق. بارلىق سالادا ءوسىم بار. بۇل تۋرالى جامبىل وبلىسىنىڭ اكىمى كارىم كوكىرەكباەۆ كەشە حالىق الدىندا بەرگەن ەسەپتىك جيىنىندا جان-جاقتى باياندادى. وتكەن جىلى وبلىستىڭ ونەركاسىپ كاسىپورىندارى 274,5 ملرد. تەڭگەگە ءونىم شىعاردى. اۋىل شارۋاشىلىعىندا بارلىعى 172 ملرد. تەڭگەنىڭ ءونىمى ءوندىرىلدى. «بارشامىزدىڭ ءبىر عانا ماقساتىمىز بار – ول حالىقتىڭ يگىلىگى. 2015 جىلى جالپى سوماسى 30,5 ملرد. تەڭگەگە 6 ينۆەستيتسيالىق جوبا ىسكە اسىرىلىپ, مۇندا 425 جاڭا جۇمىس ورنى قۇرىلدى. 2015 جىلدىڭ قورىتىندىلارى بويىنشا يندۋستريالاندىرۋ كارتاسى بويىنشا پايدالانۋعا بەرىلگەن ينۆەستيتسيالىق جوبالاردان شىعارىلعان ءونىمنىڭ كولەمى 3,052 ملرد. تەڭگەنى قۇراپ وتىر», دەدى كارىم كوكىرەكباەۆ.
جىل وتكەن سايىن وبلىس اكىمدەرىنىڭ حالىق الدىنداعى ەسەپ بەرۋ جيىندارى دا ەتەك-جەڭىن جيىپ, ۇتىمدى تۇردە ۇيىمداستىرىلىپ كەلەدى. جاسىراتىنى جوق, مۇنداي جيىنداردىڭ ەڭ ءبىر قىزىق جەرى تۇرعىنداردىڭ وبلىس باسشىسىنا سۇراق قويىپ, جاۋاپ الۋى بولسا كەرەك. جينالعان جۇرت ۋاقىتتى ءتيىمدى پايدالانۋعا ۇيرەنگەن. ءسوز سويلەۋگە شىققاندار اكىمدى ماقتاپ نەمەسە ىستەگەن تىرلىگىن ايتىپ, كوپشىلىكتى ىعىر قىلسا, زالداعى حالىق قايتا-قايتا قول شاپالاقتاپ, تەك ناقتى ويىڭدى, ۇسىنىسىڭدى, ماسەلەڭدى عانا ايتۋعا ءماجبۇر ەتەدى. وبلىس اكىمى ك. كوكىرەكباەۆ تا بوس سوزدەن گورى ناقتى ىسكە كوشكەندى ءجون ساناپ, تاراز تورىندە وتكەن بۇل ەسەپتىك جيىندا ءبىراز ماسەلەلەر ايتىلدى. ءبىز سونىڭ كەيبىرىنە توقتالا كەتتىك.
اتىركۇل يساەۆا,
مەركى اۋدانىنىڭ تۇرعىنى:
– ءبىزدى جەمىس-جيدەك اۋىلىنداعى بۇرىنعى «وگونەك» بالا- باقشاسىنىڭ قازىرگى جاعدايى الاڭداتادى. قاراۋسىز قالعان بۇل عيماراتتى قايتادان جوندەپ, ىسكە قوسسا, اۋداندا بالاباقشا تىزىمىندە تۇرعانداردىڭ قاتارى الدەقايدا ازايىپ قالار ەدى…
كارىم كوكىرەكباەۆ,
جامبىل وبلىسىنىڭ اكىمى:
– مەركى اۋدانىنىڭ اكىمى باقتيار كوپبوسىنوۆ بۇل ماسەلەنى كوتەرگەن. اۋداندى ارالاعان كەزدە ءوزىم دە بارىپ كورگەنمىن. بالاباقشا عيماراتىن كۇردەلى جوندەۋگە بيىل قارجى ءبولىندى. الداعى ۋاقىتتا پايدالانۋعا بەرىلەدى.
قۇرالاي ساليەۆا,
تاراز قالاسىنىڭ تۇرعىنى:
– تاراز قالاسىنىڭ شەتىندەگى «بارىسحان» شاعىن اۋدانىندا 2014 جىلى جول جوندەۋ جۇمىستارى وتە قارقىندى باستالىپ ەدى. بىراق بىلتىردان باستاپ توقتاپ قالدى. بۇل ءىس بيىل جالعاسىن تابا ما؟
– ءيا, بۇل شاعىن اۋدانداردىڭ جولدارىن جوندەۋگە كەزىندە 142 ملن. تەڭگە بولىنگەن بولاتىن. بىراق وتكەن جىلى قازاق حاندىعىنىڭ 550 جىلدىق مەرەيتويىنا بايلانىستى جۇمىستار سايابىرسىپ قالدى. بىراق بيىلعا تاعى دا 142 ملن. تەڭگە قاراستىرىلدى. جول جوندەۋ جۇمىستارى تولىق اياقتالادى.
قوجايحان بيجانوۆ,
ت. رىسقۇلوۆ اۋدانىنىڭ تۇرعىنى:
– اۋدانىمىزداعى ەلدى مەكەندەرگە گاز قۇبىرى تارتىلىپ, حالىق قۋانىپ جاتىر. بىراق كەيبىر ەلدى مەكەندەردە گاز قىسىمى تومەن.
– بۇل ماسەلەدەن حاباردارمىن. الداعى ۋاقىتتا ت. رىسقۇلوۆ اۋدانىنداعى اقىرتوبە ەلدى مەكەنىنەن ۇلكەن گاز تورابىن سالۋعا 484 ملن. تەڭگە قاراستىرىلدى. وسى نىساننىڭ قۇرىلىسى بىتسە, گاز قىسىمى كوبەيەدى.
ابدوللا باقبەرگەنوۆ,
تاراز قالاسىنىڭ تۇرعىنى:
– بۇل ماسەلەنى بىلتىر دا ايتقان بولاتىنمىن. بىراق ەشقانداي ناتيجە جوق. تاراز قالاسىندا «قىزىل سىزىققا» شىعىپ كەتكەن جايما بازارلار ءالى كۇنگە جويىلعان جوق. «اۋىل بەرەكە» بازارىندا سانيتاريا ماسەلەسى تىپتەن تالاپقا ساي كەلمەيدى.
– تاراز قالاسىنداعى تاشكەنت كوشەسىنىڭ بويىندا جايما بازارلاردىڭ كوبەيىپ كەتكەنى راس ەدى. قازىر كوبىسى جابىلدى. بىراق ءالى دە بەي-بەرەكەتسىزدىك بار. سوندىقتان تاراز قالاسىنىڭ اكىمىنە كوميسسيا قۇرىپ, «قىزىل سىزىققا» شىعىپ كەتكەن جانە الگى «اۋىل بەرەكە» بازارىنداعى جاعدايدى تەكسەرۋگە تاپسىرما بەرەمىن.
سەرىك قالىقوۆ,
شۋ قالاسىنىڭ تۇرعىنى:
– شۋ قالاسىنداعى لوكوموتيۆ جوندەۋ زاۋىتىندا بۇگىندە 808 ادام جۇمىس ىستەيدى. بىراق قارجىلىق قيىندىققا بايلانىستى سولاردىڭ 519-ى جالاقىلارىنىڭ جارتىسىن عانا الىپ ءجۇر. ويتكەنى, تاپسىرىس از. وسى زاۋىتتىڭ جۇمىسىنىڭ العا باسۋىنا قولۇشىن سوزساڭىز…
– ماماندىعىم – تەمىرجولشى بولعاندىقتان بۇل زاۋىتتىڭ جۇمىسىمەن جاقسى تانىسپىن. جامبىل وبلىسىنداعى «قازفوسفات», حانتاۋ, مىڭارال تسەمەنت زاۋىتتارىندا جۇك تاسيتىن قانشاما ۆاگوندار بار. بىراق ولار بۇل ۆاگونداردى باسقا وبلىستارعا اپارىپ جوندەتىپ جاتادى. سوندىقتان الداعى ۋاقىتتا بۇل ۆاگونداردىڭ جوندەۋىن شۋداعى زاۋىتتا جاساۋعا كۇش سالۋ كەرەك. بۇل ماسەلەنى نازاردا ۇستايمىن.
مىنە, ەسەپتى جيىندا جەرگىلىكتى تۇرعىندار ماسەلەلەرىن اشىق ايتىپ جاتتى. مەنىڭشە ەلىمىزدىڭ ساياسي-ەكونوميكالىق جەتىستىكتەرىنەن بولەك, ءبىز نازار اۋدارا بەرمەيتىن ءبىر ماسەلە بار. ول – قوعامنىڭ وزگەرگەنى. جاڭا ۇرپاقتىڭ ەرجەتكەنى. سانانىڭ وزگەرگەنى. بۇل – تاۋەلسىزدىك جىلدارىنىڭ ەڭ ۇلكەن جەمىسى. جانە بۇل اشىقتىق پەن جاڭاشىلدىق ەلدىڭ دامۋىنا تۋرا جول باستايتىنى تاعى انىق.
ورالحان ءداۋىت,
«ەگەمەن قازاقستان».
جامبىل وبلىسى.