ەلباسى نۇرسۇلتان نازارباەۆ تۇرىك رەسپۋبليكاسىنىڭ پرەزيدەنتى رەجەپ تايپ ەردوعانعا انكارا قالاسىندا بولعان تەررورلىق اكتىگە بايلانىستى كوڭىل ايتۋ جەدەلحاتىن جولدادى, دەپ حابارلادى پرەزيدەنتتىڭ ءباسپاسوز قىزمەتى.
جەدەلحاتتا كوپتەگەن جازىقسىز ادامداردىڭ قازا بولۋىنا, جاراقاتتانۋىنا اكەپ سوقتىرعان جانتۇرشىگەرلىك وقيعا تۋرالى سۋىت حاباردىڭ قازاقستاندىقتاردى بەيجاي قالدىرماعانى ايتىلعان.
نۇرسۇلتان نازارباەۆ باۋىرلاس ەلدەرىمىز ءۇشىن مۇنىڭ ورتاق قايعى ەكەنىن اتاپ ءوتتى. وسىعان بايلانىستى مەملەكەت باسشىسى بولعان وقيعاعا الاڭداۋشىلىعىن ءبىلدىرىپ, بارشا قازاقستاندىقتار اتىنان تۇرىك حالقىنا قولداۋ ءسوزىن جەتكىزۋدى ءوتىندى.
«قازاقستان تەرروريزمنىڭ كەز كەلگەن ءتۇرىن, ونىڭ كۇرەس تاسىلدەرى مەن جولدارىن قاتاڭ ايىپتايدى. قانداي ماقساتتا بولسا دا, جازىقسىز قان توگۋدى ەش اقتاۋعا بولمايدى. زاماناۋي سىن-قاتەرلەر ءورشىپ تۇرعان اۋمالى-توكپەلى كەزەڭدە ءبىز تۇركيامەن بىرگە حالىقارالىق قاۋىپسىزدىك پەن تۇراقتىلىقتى قامتاماسىز ەتۋ ءۇشىن كۇش جۇمىلدىرۋعا دايىنبىز», – دەلىنگەن جەدەلحاتتا.
مەملەكەت باسشىسى جەكە ءوزىنىڭ جانە قازاقستان حالقىنىڭ اتىنان ر.ەردوعانعا, قازا بولعاندار مەن زارداپ شەككەندەردىڭ تۋعان-تۋىستارى مەن بارلىق تۇرىك اعايىندارعا كوڭىل ايتتى. سونداي-اق, نۇرسۇلتان نازارباەۆ جاراقات العانداردىڭ تەزىرەك ساۋىعىپ, وتباسىلارىنا ورالۋىنا تىلەكتەستىك ءبىلدىردى.