سايلاۋ-2016
كەشە استانادا قازاقستان رەسپۋبليكاسىندا سايلاۋدى بايقاۋ ءجونىندەگى رەسپۋبليكالىق قوعامدىق كوميسسيا (سبرقك) «پارلامەنت ءماجىلىسىنىڭ جانە بارلىق دەڭگەيدەگى ءماسليحاتتار دەپۋتاتتارىنىڭ سايلاۋلارىن بايقاۋ ءجونىندەگى رەسپۋبليكالىق قوعامدىق كوميسسيانىڭ ءرولى: دەموكراتيالىق ۇستانىم» تاقىرىبىندا سەمينار-ترەنينگ وتكىزدى. بۇل شارا قازاقستانداعى سايلاۋدى بايقاۋ جونىندەگى ءوڭىرلىك ورتالىقتاردىڭ جەتەكشىلەرىنە ارنالدى.
اتالعان سەمينار-ترەنينگكە ورتالىق سايلاۋ كوميسسياسىنىڭ, سىرتقى ىستەر مينيسترلىگىنىڭ, باس پروكۋراتۋرانىڭ وكىلدەرى, سايلاۋدى بايقاۋ جونىندەگى ايماقتىق ورتالىقتاردىڭ جەتەكشىلەرى, قوعام قايراتكەرلەرى جانە ساراپشىلار قاتىستى.
سەمينار-ترەنينگتى اشقان سبرقك توراعاسى نۇرلان ەرىمبەتوۆ الداعى سايلاۋ ناۋقانىنىڭ ماڭىزدىلىعىنا كەڭىنەن توقتالدى. سونداي-اق, ول بۇل جاۋاپتى كەزەڭدە باقىلاۋشىلارعا ۇلكەن جاۋاپكەرشىلىك ارتىلاتىنىن اتاپ ءوتتى.
«بارلىق بايقاۋشىلار ءتيىستى دايىندىقتان ءوتۋى ءتيىس. سايلاۋ كۇنى بايقاۋشىلاردىڭ بارلىعى ساقاداي ساي بولعانى ءجون. ويتكەنى, ءبىز ءۇشىن سايلاۋدىڭ اشىق ءارى تازا وتكەنى ماڭىزدى», – دەدى نۇرلان ەرىمبەتوۆ.
سونداي-اق, ن.ەرىمبەتوۆ سبرقك ورتالىق سايلاۋ كوميسسياسىمەن, سايلاۋدىڭ زاڭدىلىعىن باقىلايتىن باس پروكۋراتۋرامەن جانە شەتەلدىك بايقاۋشىلارمەن تىعىز بايلانىستا جۇمىس ىستەۋگە نيەتتى ەكەنىن جەتكىزدى.
ودان ءارى ءسوز كەزەگىن العان وسك مۇشەسى مارات سارسەمباەۆ «قازاقستان رەسپۋبليكاسى ورتالىق سايلاۋ كوميسسياسىنىڭ بايقاۋشىلارمەن ءوزارا ءىس-ارەكەتى» تاقىرىبىندا حابارلاما جاسادى. م.سارسەمباەۆ ءوز سوزىندە سايلاۋ ناۋقانىنا قاتىستى وسك تاراپىنان جاسالىپ جاتقان جۇمىستاردى جۇيەلى تۇردە ءتۇسىندىرىپ بەردى. ونىڭ سوزىنە قاراعاندا, وسك ءوزىنىڭ بارلىق قىزمەتىن زاڭ شەڭبەرىندە اتقارىپ وتىر, سونداي-اق, ءوڭىرلەردەگى وكىلدىكتەرمەن بايلانىس ءوز دەڭگەيىندە جولعا قويىلعان. بۇدان بولەك, ول وسك تاراپىنان سايلاۋ كوميسسيالارىنا ارنالعان ادىستەمەلىك قۇرالدار, جادىنامالار شىعارىلعانىن جەتكىزدى.
سىرتقى ىستەر مينيسترلىگى جانىنداعى پارلامەنت ءماجىلىسى سايلاۋىن دايىنداۋ جانە وتكىزۋ ماسەلەلەرى بويىنشا شتابتىڭ حاتشىسى ەرجان قىستافين «سايلاۋدى بايقاۋ بويىنشا حالىقارالىق ميسسيالار جۇمىسىنىڭ ەرەكشەلىكتەرى» تاقىرىبىندا حابارلاما جاسادى. ول ءوز سوزىندە حالىقارالىق ميسسيالار جۇمىسىن ۇيىمداستىرۋدا ءتيىستى شارالار قولعا الىنىپ وتىرعانىن ءسوز ەتتى.
باس پروكۋراتۋرا الەۋمەتتىك-ەكونوميكالىق سالاداعى زاڭدىلىقتى قاداعالاۋ دەپارتامەنتى ءبولىمىنىڭ اعا پروكۋرورى لاۋرا تۋعانبەكوۆا سايلاۋ كەزەڭىندە پروكۋراتۋرا ورگاندارىنىڭ ءرولى مەن قىزمەتى تۋرالى اڭگىمەلەپ بەردى. ونىڭ ايتۋىنشا, قازىرگى تاڭدا جەرگىلىكتى پروكۋراتۋرا ورىندارىنا سايلاۋ بارىسىندا زاڭدىلىقتى قاداعالاۋ جونىندە ءتيىستى پارمەن بەرىلگەن. بۇل باعىتتا ارنايى توپتار جۇمىس ىستەمەك.
سونىمەن قاتار, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى ساياساتتانۋ كافەدراسىنىڭ پروفەسسورى مىندەتىن اتقارۋشى, ساياسي عىلىمدار كانديداتى مارينا ونۋچكو سايلاۋدى بايقاۋ ۇدەرىسىندەگى بايقاۋشىنىڭ ءرولى تۇرعىسىندا ءسوز ەتتى. ونىڭ ايتۋىنشا, ءاربىر بايقاۋشى ءوزىنىڭ موينىنا ۇلكەن جاۋاپكەرشىلىك ارتىلاتىنىن سەزىنۋى ءتيىس.
بۇدان كەيىن سايلاۋدى بايقاۋ جونىندەگى ايماقتىق ورتالىقتاردىڭ جەتەكشىلەرى سەمينار بارىسىندا وزدەرىن تولعاندىرىپ جۇرگەن سۇراقتارىن قويىپ, ءتيىستى جاۋاپتارىن الدى.
سەميناردا بەلگىلى بولعانداي, 20 ناۋرىزدا ەلىمىز بويىنشا داۋىس بەرۋ بارىسىن بايقاۋعا 11 مىڭعا جۋىق قازاقستاندىق بايقاۋشى قاتىساتىن كورىنەدى.
سەمينار سوڭىندا قاتىسۋشىلار سايلاۋ دوداسى كەزىندە بايقاۋدىڭ ءادىل ءارى تازا بولۋىنا ءوز ۇلەستەرىن قوساتىندارىن جەتكىزدى.
ايتا كەتەيىك, سايلاۋدى بايقاۋ جونىندەگى رەسپۋبليكالىق قوعامدىق كوميسسيا قۇرامىندا كورنەكتى قوعام قايراتكەرلەرى, عالىمدار, ساراپشىلار, زيالى قاۋىم وكىلدەرى, مادەنيەت, ونەر ادامدارى جانە باق وكىلدەرى بار.
جولدىباي بازار,
«ەگەمەن قازاقستان».